રેલવે કર્મચારીઓ સહકર્મીના અંતિમ સંસ્કારમાં હાજરી આપવા ગયા 147 ટ્રેન રદ થઈ

તમે અવારનવાર સાંભળ્યું હશે કે, જોયું હશે કે, ખરાબ હવામાન અથવા વિરોધ પ્રદર્શનને કારણે કેટલીકવાર રેલ સેવાઓ પ્રભાવિત થાય છે, જે ખૂબ જ સામાન્ય બાબત છે. પરંતુ એવો એક કિસ્સો મુંબઈમાં પ્રકાશમાં આવ્યો છે કે જ્યાં 88 લોકલ ટ્રેનો સહિત કુલ 147 ટ્રેનોની સેવાઓ રદ કરવી પડી હતી અને તેની પાછળનું કારણ હવામાન કે વિરોધ પ્રદર્શન નથી.

હકીકતમાં, શનિવારે સાંજે, મુંબઈના ભાયખલા અને સેન્ડહર્સ્ટ રોડ સ્ટેશનો વચ્ચે મધ્ય અને હાર્બર લાઇન પર ઉપનગરીય ટ્રેન સેવાઓ વિલંબિત થવા લાગી, જેના કારણે મુસાફરો પરેશાન થઈ ગયા. આ પછી જ્યારે લોકોએ રેલવે સેવા પ્રભાવિત થવાનું કારણ જાણવાનો પ્રયાસ કર્યો, તો જે કારણ બહાર આવ્યું તે ચોંકાવનારું હતું. એવું જાણવા મળ્યું હતું કે, ઘણા કર્મચારીઓ (મોટરમેન) તેમના સાથીદારના અંતિમ સંસ્કારમાં હાજરી આપવા માટે સ્મશાન ગયા હતા, જેના કારણે સેવાઓને અસર થઈ હતી.

આ ઘટનાથી સવાલો ઉઠી રહ્યા છે કે, શું આ આયોજનબદ્ધ વિરોધ પ્રદર્શન હતું? કારણ કે ભૂતકાળમાં મોટરમેનોએ કામના વધુ પડતા દબાણનો મુદ્દો ઉઠાવ્યો હતો. સાંજના ભીડના સમયમાં સેવાઓમાં વિલંબને કારણે, મોટી સંખ્યામાં મુસાફરો CSMT અને અન્ય સ્ટેશનો પર અટવાયા હતા અને તેમને ઘણી બધી સમસ્યાઓનો સામનો કરવો પડ્યો હતો.

એક અધિકારીએ બતાવ્યું કે, 'સેવાઓમાં વિલંબ થયો હતો, કારણ કે ઘણા મોટરમેન તેમના સાથીદાર મુરલીધર શર્માના અંતિમ સંસ્કારમાં હાજરી આપવા માટે કલ્યાણ ગયા હતા, જેઓ શુક્રવારે પાટા ઓળંગતી વખતે ભાયખલા અને સેન્ડહર્સ્ટ રોડ સ્ટેશનો વચ્ચે મૃત્યુ પામ્યા હતા.' તેમણે કહ્યું કે, મુરલીધર શર્માના અંતિમ સંસ્કાર બપોરે થવાના હતા, પરંતુ તે સાંજે 5 વાગ્યા સુધી વિલંબિત થયા.

રેલવે અધિકારીએ જણાવ્યું હતું કે, મોટી સંખ્યામાં મોટરમેન અંતિમ સંસ્કારમાં સામેલ થયા હતા, જેના કારણે તેઓ ટ્રેન ચલાવવા માટે ઉપલબ્ધ નહોતા, જેના કારણે વિલંબ થયો હતો. અધિકારીના જણાવ્યા અનુસાર, 88 લોકલ ટ્રેન સેવાઓ સહિત લગભગ 147 ટ્રેનો રદ કરવામાં આવી હતી. તેમણે એમ પણ કહ્યું કે સેવાઓ ખોરવાઈ નથી પરંતુ વિલંબ થયો છે. સ્થિતિ ધીમે ધીમે સામાન્ય થઈ રહી છે. થાણેમાં ઉપનગરીય મુલુંડની રહેવાસી અરુંધતી P.એ જણાવ્યું હતું કે, તેણે ભીડભાડવાળી લોકલ ટ્રેનમાં ચડતા પહેલા CSMT ખાતે 40 મિનિટ રાહ જોવી પડી હતી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.