ચાલુ વરસાદમાં ભાષણ આપતા શરદ પવારે કહ્યું- વરસાદ પરેશાન કરે છે પણ...

રાષ્ટ્રવાદી કોંગ્રેસ પાર્ટી (શરદ જૂથ)ના સ્થાપક શરદ પવારે રવિવારે નવી મુંબઈમાં વરસાદ વચ્ચે ભાષણ આપ્યું હતું. તેમણે કહ્યું, વરસાદે અમારા કાર્યક્રમમાં અવરોધ ઉભો કર્યો છે, પરંતુ અમે આટલી સરળતાથી હાર માની કે પીછેહઠ કરવાના નથી. અમે સંઘર્ષ કરતા રહીશું.

ભારે વરસાદમાં ભાષણ આપતા શરદ પવારની તસવીરો અને વીડિયો સોશિયલ મીડિયા પર સામે આવ્યા છે. NCP સમર્થકો આ ઘટનાને ચાર વર્ષ પહેલા શરદ પવારના ભાષણ સાથે જોડી રહ્યા છે.

તે સમયે 18 ઓક્ટોબર, 2019ના રોજ, મહારાષ્ટ્ર વિધાનસભા ચૂંટણીના ત્રણ દિવસ પહેલા, પવાર લોકસભા પેટાચૂંટણી માટે NCPના ઉમેદવારના પ્રચાર માટે સતારા ગયા હતા. મહારાષ્ટ્ર વિધાનસભા ચૂંટણીની સાથે સાતારામાં લોકસભાની પેટાચૂંટણી યોજાઈ હતી.

પવારના સંબોધન પહેલા અચાનક જ ભારે વરસાદ શરૂ થઈ ગયો. પવારને છત્રી આપવામાં આવી હતી, પરંતુ તેમણે તે લેવાનો ઈન્કાર કરી દીધો હતો, એમ કહીને કે, ભગવાન ઈન્દ્રએ NCPને આશીર્વાદ આપ્યા હતા. આ કાર્યક્રમના વીડિયો અને ફોટા પણ ઘણા વાયરલ થયા હતા.

2019ની વિધાનસભા ચૂંટણીમાં NCP 53 બેઠકો જીતીને ત્રીજી સૌથી મોટી પાર્ટી બની હતી. 2014ની વિધાનસભા ચૂંટણીમાં પાર્ટીને માત્ર 41 બેઠકો મળી હતી. એવું માનવામાં આવે છે કે, શરદ પવારના ભાષણે NCPની જીતમાં મહત્વની ભૂમિકા ભજવી હતી.

2019માં, મહારાષ્ટ્રની 288 વિધાનસભા બેઠકોમાંથી, BJPએ 106, શિવસેના 56, કોંગ્રેસ 44 અને અન્ય 29 બેઠકો જીતી હતી. NCPના ઘણા નેતાઓ લોકસભા અને વિધાનસભાની ચૂંટણી પહેલા BJPમાં જોડાયા હતા.

2019માં મહારાષ્ટ્રમાં 288 વિધાનસભા બેઠકો પર ચૂંટણી યોજાઈ હતી. BJP 106 ધારાસભ્યો સાથે રાજ્યની સૌથી મોટી પાર્ટી બની. CM પદને લઈને શિવસેના અને BJP વચ્ચે ગઠબંધન ચાલી શક્યું નથી. આ પછી શિવસેના, કોંગ્રેસ અને NCPએ મળીને મહાવિકાસ અઘાડીની સરકાર બનાવી.

જૂન 2022માં શિવસેનાના CM એકનાથ શિંદે અને પાર્ટીના અન્ય 39 ધારાસભ્યોએ મહારાષ્ટ્રના તત્કાલિન CM ઉદ્ધવ ઠાકરે સામે બળવો કર્યો હતો. CM એકનાથ શિંદેએ BJP સાથે મળીને નવી સરકાર બનાવી. જેના કારણે મહાવિકાસ આઘાડીની ગઠબંધન સરકાર પડી ગઈ હતી. શિવસેના પણ બે ભાગમાં વહેંચાઈ ગઈ હતી. નવી સરકારમાં શિંદેને CM અને દેવેન્દ્ર ફડણવીસને DyCM બનાવવામાં આવ્યા હતા.

આ વર્ષે જુલાઈમાં, શરદ પવારના ભત્રીજા અજિત પવાર રાષ્ટ્રવાદી કોંગ્રેસ પાર્ટી (NCP) તોડીને 9 ધારાસભ્યો સાથે BJP-શિંદે સરકારમાં જોડાયા હતા. અજિત પવારે 2 જુલાઈ, 2023ના રોજ બીજા DyCM તરીકે શપથ લીધા હતા. NCPના નામ અને ચિહ્નને લઈને અજિત પવાર અને શરદ પવાર વચ્ચે લડાઈ ચાલી રહી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.