રેલવેની 250 વર્ષ જૂનું ચામુંડા મા મંદિર હટાવવા ચેતવણી, નહિતર સ્ટેશન બંધ કરી દેશે

રાજસ્થાનના અલવરમાં મંદિર તોડી પાડવાને લઈને ચાલી રહેલા હોબાળા વચ્ચે ઉત્તર પ્રદેશના આગ્રામાં રેલવેની જમીન પર અતિક્રમણ કરીને બનાવવામાં આવેલા મંદિરનો મામલો ગરમાયો છે. મંદિરના કારણે સ્ટેશનના વિસ્તરણના કામને અસર થઈ રહી છે. આવી સ્થિતિમાં, રેલ્વે પ્રશાસને સ્પષ્ટ કર્યું છે કે કાં તો મંદિરના અતિક્રમણવાળા ભાગને દૂર કરવામાં આવે અથવા સ્ટેશનને જ બંધ કરી દેવામાં આવે. DRMની ચેતવણી બાદ વિવાદ વધુ ઘેરો બન્યો હતો. મામલો રાજામંડી રેલવે સ્ટેશનનો છે. તે જ સમયે, સિટી સ્ટેશન સ્થિત નૂરી મસ્જિદના અતિક્રમણના કેસમાં પણ નોટિસ આપવામાં આવી છે.

રેલ્વે પ્રશાસને આગ્રા, યુપીના રાજામંડી રેલ્વે સ્ટેશન પર ચામુંડા દેવી મંદિરના સ્થાનને બદલવા અંગે નોટિસ જારી કરી છે. આ મંદિરને લઈને ઘણા સમયથી વિવાદ ચાલી રહ્યો છે. રેલવેનું કહેવું છે કે અહીં પ્લેટફોર્મ-1 પર 72 ચોરસ મીટર ગેરકાયદે બાંધકામ છે. DRMએ મંદિર નહીં હટાવે તેવી સ્થિતિમાં મુસાફરોની સુરક્ષાને ધ્યાનમાં રાખીને સ્ટેશન બંધ કરવામાં આવશે. વાસ્તવમાં, ચામુંડા દેવી મંદિર રાજામંડી રેલવે સ્ટેશન પર 1716 ચોરસ મીટરમાં ફેલાયેલું છે. તેમાં 600 ચોરસ મીટરમાં મંદિરની ઇમારત છે.

આગ્રા રેલવે ડિવિઝનના મેનેજર આનંદ સ્વરૂપે ટ્વીટ કરીને સ્ટેશન બંધ કરવાની ચેતવણી આપી છે. તેઓ કહે છે કે આ ગેરકાયદે બાંધકામને કારણે વાહનો બંધ થઈ જતાં મુસાફરોને આવવા-જવામાં મુશ્કેલી પડે છે. રેલવેને પણ આ અંગે લોકોની ફરિયાદો મળી છે. સૌથી મોટી અડચણ ટ્રેનોની સ્પીડને લઈને છે. તેમણે માહિતી આપી હતી કે આગ્રા-દિલ્હી રૂટ પર ટ્રેનોની ગતિ સુધારવા માટે રૂ.6 કરોડનો ખર્ચ કરવામાં આવી રહ્યો છે. આ રૂટ પર 150 કિમી પ્રતિ કલાકની ઝડપે ટ્રેન દોડી શકે છે, પરંતુ મંદિરના કારણે ટ્રેનની સ્પીડ ઘટીને 30 કિમી પ્રતિ કલાક થઈ ગઈ છે.

રાજામંડી રેલ્વે સ્ટેશન પર દરરોજ 23 ટ્રેનો ઉભી રહે છે. આમાં 12 ટ્રેનો દિલ્હી તરફથી આવે છે, જ્યારે 11 ટ્રેનો દિલ્હી તરફ જાય છે. આગ્રા કેન્ટ - નવી દિલ્હી, દિલ્હી ઇન્ટરસિટી, પંજાબ મેલ, જેલમ, ઇન્દોર અમૃતસર ઇન્ટરસિટી મુખ્ય ટ્રેનો છે. આ સ્ટેશન પર દરરોજ ત્રણ હજારથી વધુ મુસાફરો દિલ્હી માટે મુસાફરી કરે છે. સ્ટેશન દરરોજ 5000 મુસાફરોને હેન્ડલ કરે છે. આગ્રા કેન્ટ પછી રાજમંડી આગ્રાનું મહત્વનું રેલ્વે સ્ટેશન છે.

રાજામંડી સ્ટેશનના પ્લેટફોર્મ નં-1ના કિનારે બનેલું ચામુંડા મંદિર લગભગ 250 વર્ષ જુનું છે. રેલવેએ મંદિરના પુજારીનેને 10 દિવસની અંદર મંદિર શિફ્ટ કરવા માટે નોટિસ આપી હતી. આ સમય સીમા મર્યાદા શુક્રવારે સમાપ્ત થઇ રહી છે. એ પછી રેલવેએ મંદિર હટાવવાની કાર્યવાહી કરવાની ચેતવણી આપી છે.એવું કહેવાય છે કે જ્યારે અંગ્રેજોએ અહીં પહેલી વાર લાઇન નાંખી ત્યારે રેલવે ટ્રેકને સીધો લઇ જવા માટે મંદિરને હટાવવાનો પ્રયાસ કર્યો હતો. તમામ પ્રયાસો છતાં અંગ્રેજ અધિકારીઓ મંદિર તોડી શક્યા ન હતા. અંતે, તેઓએ અહીં રેલ્વે ટ્રેકને વળાંકવાળા આકારમાં નાખવો પડ્યો હતો.

રાજામંડી સ્ટેશન પર ચામુંડા દેવી મંદિર પછી સિટી રેલવે સ્ટેશનની પાસેની જમીર પર બનેલી નૂરી મસ્જિદને પણ નોટિસ આપવામાં આવી છે. રેલવેએ 8 દિવસનો સમય આપ્યો છે,જો તેમ નહીં કરવાં આવે તો કાર્યવાહી કરવાની રેલવેએ ચેતવણી આપી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.