કાશ્મીરમાં દાલ સરોવરના કિનારે PMની સેલ્ફી સ્ટાઈલ, નવા યોગ અર્થતંત્ર પર કહી વાત

આંતરરાષ્ટ્રીય યોગ દિવસ પર આજે વરસાદના કારણે PM નરેન્દ્ર મોદીનો કાર્યક્રમ મોડો શરૂ થયો હતો. શરૂઆતમાં તે શ્રીનગરના દાલ સરોવરના કિનારે ખુલ્લા મેદાનમાં યોજવાનું હતું, પરંતુ જ્યારે વરસાદ બંધ ન થયો, ત્યારે તે એક મોટા હોલમાં યોજવામાં આવ્યો. PM મોદીએ કહ્યું કે, વિશ્વ આજે યોગને વૈશ્વિક સુખાકારી માટે એક શક્તિશાળી માધ્યમ તરીકે જુએ છે, કારણ કે તે લોકોને ભૂતકાળનો બોજ વહન કર્યા વિના વર્તમાનમાં જીવવામાં મદદ કરે છે. 10મા આંતરરાષ્ટ્રીય યોગ દિવસ પર, PM નરેન્દ્ર મોદીએ શેર-એ-કાશ્મીર ઇન્ટરનેશનલ કોન્ફરન્સ સેન્ટરમાં યોગ અર્થતંત્ર વિશે પણ વાત કરી હતી. યોગાસન કર્યા પછી તેમણે દાલ સરોવરના કિનારે સેલ્ફી પણ લીધી હતી.

તેમણે કહ્યું કે યોગના વૈશ્વિક પ્રસારથી તેના વિશેની ધારણા બદલાઈ ગઈ છે, કારણ કે મોટી સંખ્યામાં લોકો અધિકૃત માહિતી મેળવવા માટે ભારતની યાત્રા કરી રહ્યા છે. તેમણે કહ્યું, 'આપણે હવે ઉત્તરાખંડ અને કેરળ જેવા રાજ્યોમાં યોગ ટુરિઝમ જોઈ રહ્યા છીએ. લોકો ભારત આવી રહ્યા છે, કારણ કે તેઓને અધિકૃત યોગ જોવા મળે છે.' તેમણે કહ્યું, 'લોકો હવે ફિટનેસ માટે વ્યક્તિગત યોગ ટ્રેનર્સની નિમણૂક કરી રહ્યા છે અને કંપનીઓ તેમના કર્મચારીઓને સ્વસ્થ રાખવા માટે યોગ કાર્યક્રમોનું આયોજન પણ કરી રહી છે. આનાથી આજીવિકાના નવા રસ્તાઓ ખુલ્યા છે.'

તેમણે કહ્યું કે, યોગે લોકોને એ સમજવામાં મદદ કરી છે કે, તેમની સુખાકારી તેમની આસપાસની દુનિયાની સુખાકારી સાથે જોડાયેલી છે. PM મોદીએ કહ્યું, 'વિશ્વ યોગને વૈશ્વિક સુખાકારી માટે એક શક્તિશાળી માધ્યમ તરીકે જોઈ રહ્યું છે. યોગ આપણને ભૂતકાળના બોજ વિના વર્તમાનમાં જીવવામાં મદદ કરે છે.' PM મોદીએ કહ્યું કે, 'જ્યારે આપણું મન શાંત રહે છે, ત્યારે આપણે વિશ્વ પર સકારાત્મક પ્રભાવ પાડી શકીએ છીએ... યોગ સમાજમાં સકારાત્મક પરિવર્તનના નવા માર્ગો બનાવી રહ્યો છે.'

સંબોધન કર્યા પછી PM મોદીએ સમૂહ યોગાભ્યાસમાં ભાગ લીધો હતો. PM મોદીએ આંતરરાષ્ટ્રીય યોગ દિવસ પર દેશવાસીઓને શુભેચ્છા પાઠવી હતી અને કહ્યું હતું કે, આજે સમગ્ર વિશ્વમાં યોગ કરનારા લોકોની સંખ્યા સતત વધી રહી છે અને યોગ પ્રત્યે લોકોનું આકર્ષણ પણ સતત વધી રહ્યું છે. તેમણે કહ્યું, 'હું જ્યાં પણ જાઉં છું ત્યાં ભાગ્યે જ કોઈ નેતા (આંતરરાષ્ટ્રીય) હશે જે યોગના ફાયદાઓ વિશે મારી સાથે વાત ન કરતા હોય.' તેમણે વધુમાં કહ્યું કે, 'આંતરરાષ્ટ્રીય યોગ દિવસ પર મને યોગ અને સાધનાની ભૂમિ કાશ્મીરમાં આવવાનું સૌભાગ્ય મળ્યું છે. યોગથી જે શક્તિ મળે છે તે અમે શ્રીનગરમાં અનુભવી રહ્યા છીએ. હું કાશ્મીરની ધરતી પરથી દેશના તમામ લોકોને અને વિશ્વના ખૂણે ખૂણે યોગ કરી રહેલા તમામ લોકોને અભિનંદન આપું છું.'

તુર્કમેનિસ્તાન, સાઉદી અરેબિયા, મંગોલિયા અને જર્મનીના ઉદાહરણ આપતા PM મોદીએ કહ્યું કે, યોગના પ્રાચીન સ્વરૂપો ત્યાં વધુને વધુ લોકપ્રિય થઈ રહ્યા છે અને લોકો યોગને તેમના જીવનનો એક ભાગ બનાવી રહ્યા છે. તેમના સંબોધનમાં, PM મોદીએ 101 વર્ષીય ફ્રેન્ચ મહિલા ચાર્લોટ ચોપિનનો પણ ઉલ્લેખ કર્યો હતો, જેમને તેમના દેશમાં યોગને લોકપ્રિય બનાવવાની તેમની સેવાઓ માટે પદ્મશ્રીથી નવાજવામાં આવ્યા છે.

તેમણે કહ્યું, 'યોગ માત્ર જ્ઞાન જ નથી પણ એક વિજ્ઞાન પણ છે. માહિતી ક્રાંતિના આ યુગમાં માહિતી સ્ત્રોતોનું પૂર આવી ગયું છે અને લોકો માટે એક વિષય પર ધ્યાન કેન્દ્રિત કરવું એક પડકાર બની ગયું છે.' તેમણે કહ્યું, 'આનો ઉકેલ પણ યોગમાં રહેલો છે, કારણ કે તે ધ્યાન કેન્દ્રિત કરવામાં મદદ કરે છે, તેથી સેનાથી લઈને રમતગમત ક્ષેત્રે પણ, યોગ લોકોની દિનચર્યામાં સામેલ થઈ ગયું છે.'

Post Yoga selfies in Srinagar! Unparalled vibrancy here, at the Dal Lake. pic.twitter.com/G9yxoLUkpX

— Narendra Modi (@narendramodi) June 21, 2024

PM મોદીએ કહ્યું કે, વર્ષ 2014માં તેમણે સંયુક્ત રાષ્ટ્રમાં આંતરરાષ્ટ્રીય યોગ દિવસનો પ્રસ્તાવ મૂક્યો હતો અને ભારતના પ્રસ્તાવને 177 દેશોએ ટેકો આપ્યો હતો, જે પોતાનામાં એક રેકોર્ડ હતો. સંયુક્ત રાષ્ટ્ર મહાસભાએ ડિસેમ્બર 2014માં 21 જૂનને આંતરરાષ્ટ્રીય યોગ દિવસ તરીકે ઉજવવાની જાહેરાત કરી હતી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.