તો શું ખરેખર NDA સરકાર પર છે સંકટ? રાહુલ ગાંધીના દાવાથી મચ્યો ખળભળાટ!

એક દાયકાની અંદર કેન્દ્રમાં એક પક્ષની બહુમતી સરકારનો યુગ સમાપ્ત થઈ ગયો. PM નરેન્દ્ર મોદી સતત ત્રીજી વખત PM બન્યા, પરંતુ તેમની પાર્ટી BJP એકલા જ બહુમતીના જાદુઈ આંકડાથી દૂર રહી. ઘટીને 240 બેઠકો પર સમેટાઈ ગયેલી BJP પાર્ટીને કેન્દ્રમાં સત્તામાં પાછા ફરવા માટે 53 બેઠકો ધરાવતા સાથી પક્ષોની મદદ લેવી પડી. BJPની આવી પરિસ્થિતિથી ફુલાઈ ગયેલી કોંગ્રેસ પાર્ટીના પૂર્વ અધ્યક્ષ રાહુલ ગાંધીએ મોટો દાવો કર્યો છે. તેમનું કહેવું છે કે, NDAના ઘણા સહયોગી તેમના એટલે કે કોંગ્રેસ પાર્ટીના સંપર્કમાં છે. તમે ચોક્કસપણે રાજકારણની ભાષામાં સંપર્કનો અર્થ સમજો છો. જો રાહુલ ગાંધી સાચા હોય તો મોદી સરકાર જોખમમાં છે તે સ્વીકારવામાં કોઈ ખચકાટ ન હોવો જોઈએ.

રાહુલ ગાંધીએ મંગળવારે કહ્યું હતું કે સત્તારૂઢ NDA સંખ્યાની દૃષ્ટિએ ખૂબ જ નબળો છે અને સહેજ પણ ગડબડી થાય તો સરકાર પડી શકે છે. રાહુલે મીડિયા સૂત્રોને આપેલા ઈન્ટરવ્યુ દરમિયાન લોકસભા ચૂંટણીના પરિણામો પર પોતાના વિચારો વ્યક્ત કર્યા હતા. તેમણે કહ્યું, 'આંકડો એટલો ઓછો છે કે, સરકાર ખૂબ જ નાજુક છે અને નાનામાં નાની ખલેલ પણ તેને પાડી શકે છે. મૂળભૂત રીતે, એક (NDA) સાથી પક્ષે બીજી તરફ વળવું પડશે.' તેમણે એવો પણ દાવો કર્યો હતો કે, NDAના કેટલાક સહયોગીઓ અમારા સંપર્કમાં છે. પણ કોણ? રાહુલે કોઈનું નામ જાહેર નથી કર્યું, પરંતુ કહ્યું કે મોદી કેમ્પમાં ઘણી મોટી 'અસંમતિ' છે.

કોંગ્રેસ નેતાએ કહ્યું કે, લોકસભા ચૂંટણીના પરિણામો દર્શાવે છે કે 'ભારતીય રાજનીતિમાં મોટો બદલાવ આવ્યો છે'. તેમણે દાવો કર્યો કે 'મોદીના વિચારો અને છબીને મોટો ફટકો પડ્યો છે'. તેમણે દલીલ કરી હતી કે, PM મોદીની આગેવાની હેઠળની ત્રીજી NDA સરકાર 'સંઘર્ષ કરશે, કારણ કે 2014 અને 2019માં જે બાબતો PM નરેન્દ્ર મોદીના પક્ષમાં હતી તે આ વખતે ક્યાંક ગાયબ થઇ ગઈ છે.'

પરિણામો પર ટિપ્પણી કરતા ગાંધીએ કહ્યું, 'તમે નફરત અને ગુસ્સાની રાજનીતિથી ફાયદો ઉઠાવી શકો છો તે વિચારને ભારતના લોકોએ આ ચૂંટણીમાં નકારી કાઢ્યો છે... જે પાર્ટીએ છેલ્લા 10 વર્ષથી અયોધ્યાની વાત કરી છે. અયોધ્યામાં તે સાફ થઇ ગઈ છે... મૂળભૂત રીતે શું થયું છે કે ધાર્મિક નફરત પેદા કરવા માટેનું BJPનું મૂળ માળખું પડી ભાંગ્યું છે.'

રાહુલ ગાંધીએ આ વખતે વિપક્ષના પ્રદર્શનને સુધારવા માટે તેમની બે ભારત જોડો મુલાકાતનો શ્રેય પણ આપ્યો. તેમણે કહ્યું, 'ન્યાય પ્રણાલી, મીડિયા, બંધારણીય સંસ્થાઓ બધુ જ (વિપક્ષ માટે) બંધ હતું. પછી અમે નક્કી કર્યું કે, અમારે જાતે જ લડવું પડશે. આ ચૂંટણીમાં સફળ થયેલા ઘણા વિચારો અમારી સામે ઉભી કરવામાં આવેલી દિવાલમાંથી આવ્યા હતા.'

જો કે રાહુલ ગાંધીના 'અમે ટચમાં છીએ'ના દાવા પર નજર કરીએ તો NDAને ઓછામાં ઓછા 21 સાંસદોનો ફટકો પડશે, તો જ મોદી સરકાર પડી શકે છે. બહુમત માટે 272નો આંકડો જરૂરી છે. જેમાંથી એકલા BJP પાસે 240 બેઠકો છે. તેથી BJPને સરકાર બચાવવા માટે સાથી પક્ષોના માત્ર 32 સાંસદોના સમર્થનની જરૂર છે. હાલમાં સાથી પક્ષો પાસે 53 સાંસદો છે.

તેમાં આંધ્રપ્રદેશના CM ચંદ્ર બાબુ નાયડુની પાર્ટી TDPના 14 અને બિહારના CM નીતિશ કુમારની JDUના 12 સાંસદ છે. જો બંને એકસાથે NDA છોડી દે તો કુલ સાંસદોની સંખ્યા ઘટીને 26 થઈ જશે. તેનો અર્થ એ કે સરકારને તોડવા માટે જરૂરી 21ના આંકડા કરતાં પાંચ વધુ. પરંતુ શું CM નાયડુ અને CM નીતિશ PM મોદીને આંચકો આપી શકે છે? રાજકારણમાં કંઈ પણ થઈ શકે છે. રાહુલના દાવાની કસોટી ત્યાં સુધી થતી રહેશે, જ્યાં સુધી આવું કંઈક નહીં થાય.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.