રાધારાણી મંદિરનું વીજળીનું બિલ રૂ.12 લાખ બાકી હતું, વિભાગે કનેક્શન કાપી નાખ્યું

ઉત્તર પ્રદેશમાં વીજળી બિલની વસૂલાત માટે સતત અભિયાન ચલાવવામાં આવી રહ્યું છે. વીજ વિભાગના લોકો જે ગ્રાહકોના બિલ બાકી છે, તેમના કનેક્શન કાપી રહ્યા છે. વિદ્યુત વિભાગની આ કાર્યવાહીને કારણે મથુરાના શ્રી રાધા રાણી મંદિરનું કનેક્શન પણ કાપી નાખવામાં આવ્યું હતું. લાખો રૂપિયાનું બિલ જમા ન થતાં વીજ વિભાગે કનેકશન કાપી નાખ્યું હતું. જેના કારણે મંદિર પરિસરમાં અંધકાર છવાઈ ગયો હતો.

28 ફેબ્રુઆરીની રાત્રે બરસાનાના પ્રસિદ્ધ રાધારાણી મંદિરનો વીજ પુરવઠો કાપી નાખવામાં આવ્યો હતો. મંદિરનું બાકી વીજ બિલ ચૂકવવામાં આવ્યું ન હોવાથી આવું કરવામાં આવ્યું હતું. જેના કારણે રાધારાણીનું મંદિર આખી રાત અંધકારમાં ડૂબેલું રહ્યું હતું.

રાધારાણી મંદિર ખાતે વીજ નિગમનું આશરે રૂ.12 લાખનું વીજ બિલ બાકી છે. જેના કારણે કોર્પોરેશનના કાર્યકરોએ મંદિરની વીજળી કાપી નાખી હતી. જેના કારણે મંદિરમાં પાણીની સમસ્યા ઉભી થઇ હતી. વિદ્યુત નિગમના સબ-ડિવિઝનલ ઓફિસર સંજય કુમારે જણાવ્યું કે, થોડા મહિના પહેલા લાડલીજી મંદિરના સહ-પ્રાપ્તકર્તા રાસવિહારી ગોસ્વામીને 12 લાખ 55 હજાર રૂપિયાના બાકી વીજળી બિલ અંગે નોટિસ મોકલવામાં આવી હતી. જો બાકી રકમ જમા નહીં થાય તો કનેક્શન કાપી નાખવામાં આવશે તેવી ચેતવણી આપી હતી.

જ્યારે બુધવાર સુધીમાં પણ બિલ ન ભરાયું તો મંદિરની વીજળી કાપી નાખવામાં આવી હતી. કો-રિસીવર રાસ વિહારી ગોસ્વામીએ જણાવ્યું કે, બિલ જમા કરાવવા માટે કોર્ટમાં અરજી આપવામાં આવી છે. તે અંગે હજુ સુધી કોઈ આદેશ આપવામાં આવ્યો નથી. જેના કારણે વીજ બિલ જમા થઈ શક્યું નથી.

મંદિરમાં લાંબા સમય સુધી લાઇટ ન આવતાં ગભરાટ ફેલાયો હતો. ત્યાર પછી સ્થાનિક લોકોએ વીજળી વિભાગના SDO સાથે વાત કરી. ત્યાર પછી અમુક શરતોના આધારે રાત્રે લગભગ 1 વાગ્યે મંદિરનું કનેક્શન જોડવામાં આવ્યું હતું. અંધારાના કારણે મંદિરમાં હાજર ભક્તોને ભારે હાલાકીનો સામનો કરવો પડ્યો હતો.

ઉલ્લેખનીય છે કે UPના મથુરાના બરસાનામાં આવેલું રાધારાની મંદિર વિશ્વ પ્રસિદ્ધ છે. આ મંદિર રાધારાણીને સમર્પિત છે અને ભાનુગઢ ટેકરીની ટોચ પર બનેલ છે. અહીં રાધા કૃષ્ણની પૂજા કરવામાં આવે છે. આ મંદિરમાં રાધાષ્ટમી અને લઠ્ઠમાર હોળી પર દેશ-વિદેશના લોકો એકઠા થાય છે. આ મંદિર લાલ રેતીના પથ્થરથી બનેલું છે. મંદિરમાં 200થી વધુ પગથિયાં છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.