બિઝનેસમેન મંદિરના કોરિડોર માટે 510 કરોડ રૂપિયા આપવા તૈયાર

અલ્હાબાદ હાઈકોર્ટમાં શુક્રવારે મથુરાના વૃંદાવન બાંકે બિહારી ટેમ્પલ કોરિડોર નિર્માણ કેસમાં મહત્વની સુનાવણી હાથ ધરવામાં આવી હતી. હાઈકોર્ટમાં સુનાવણી દરમિયાન આગ્રાના વેપારી પ્રખર ગર્ગે એક અરજી દાખલ કરીને કહ્યું કે તે પ્રોજેક્ટ માટે 510 કરોડ રૂપિયા ચૂકવવા તૈયાર છે. જેમાંથી એક મહિનામાં 100 કરોડ રૂપિયા જમા થશે. તેના પર કોર્ટે સરકારને પૂછ્યું કે તમે મંદિર માટે પૈસા કેમ માંગો છો? કોર્ટે કહ્યું, શું સરકાર પાસે પૈસાની તંગી છે? જો સરકાર પાસે પૈસાની તંગી ન હોય તો તમામ વિવાદો ઉકેલાઈ જાય તો કોઈ વિવાદ બાકી રહેતો નથી.

સરકાર વતી એડવોકેટ જનરલ અજય કુમાર મિશ્રા અને એડિશનલ એડવોકેટ જનરલ મનીષ ગોયલે કહ્યું કે સરકારે જાહેર શાંતિ અને વ્યવસ્થા માટે પ્રસ્તાવિત યોજના તૈયાર કરી છે. જેમાં નાગરિક સુવિધાઓ પુરી પાડવામાં આવશે. મંદિરની વ્યવસ્થા માટે મંદિરના નાણાંનું રોકાણ કરવામાં કોઈને વાંધો ન હોવો જોઈએ. ચીફ જસ્ટિસ પ્રિતિંકર દિવાકર અને જસ્ટિસ આશુતોષ શ્રીવાસ્તવની ડિવિઝન બેંચ અનંત શર્મા અને અન્યો દ્વારા દાખલ કરવામાં આવેલી PILની સુનાવણી કરી રહી છે.

અત્રે ઉલ્લેખનીય છે કે, સેવકો તરફથી કહેવામાં આવ્યું હતું કે, સરકાર મંદિરની સુવિધાઓ વધારવા માંગે છે, તેમને કોઈ વાંધો નથી. પરંતુ, તે એક ખાનગી મંદિર ટ્રસ્ટ છે. સરકારે મંદિરમાં આવેલા ચડાવા પર દાવો ન કરવો જોઈએ. એડવોકેટ સંજય ગોસ્વામીએ અરજીની જાળવણી પર સવાલો ઉઠાવ્યા હતા અને કહ્યું હતું કે સુપ્રીમ કોર્ટે કહ્યું છે કે કોઈ પણ પિટિશન માત્ર તથ્ય પર આધારિત નથી. અરજી માત્ર કાનૂની અધિકારોના આધારે જ મેન્ટેનેબલ છે. અરજી ફગાવી દેવી જોઈએ. પિટિશનર એડવોકેટ શ્રેયા ગુપ્તાએ કહ્યું કે, બંધારણના અનુચ્છેદ 25 અને 26માં ધાર્મિક સ્વતંત્રતાનો અધિકાર છે, પરંતુ તે અમર્યાદિત નથી. વ્યાજબી હસ્તક્ષેપ કરી શકાય છે. હાલમાં મંદિર વ્યવસ્થાપન માટે કોઈ સમિતિ નથી. સિવિલ જજની દેખરેખ હેઠળ વ્યવસ્થા કરવામાં આવી રહી છે. મેનેજમેન્ટ વિવાદ મથુરાની સિવિલ કોર્ટમાં પેન્ડિંગ છે. મુલાકાતીઓની સુરક્ષા માટે સરકાર પગલાં લઈ શકે છે.

કોર્ટ એ જાણવા માંગતી હતી કે, જો આ યોજના અમલી બને છે તો મંદિરનું સંચાલન કોના હાથમાં રહેશે? સેવાઓ, ટ્રસ્ટ અથવા સરકારના હાથમાં. જો કે સરકાર દ્વારા આ પ્રશ્નનો જવાબ આપવામાં આવ્યો નથી. એડવોકેટ રાઘવેન્દ્ર મિશ્રાએ કહ્યું કે સરકારે સૂચિત યોજનાનો અમલ કરવો જોઈએ. તમામ ખર્ચ પ્રખર ગર્ગ ઉઠાવશે. સરકારે મંદિરમાં આવેલ દાન ન લેવું જોઈએ, અમે આખો ખર્ચ ઉઠાવીશું. કોર્ટે કહ્યું કે, જો સરકાર મંદિરમાં આવેલ દાનની રકમ નહીં લે તો સમગ્ર વિવાદ ખતમ થઈ જશે. હવે આ મામલામાં આગામી સુનાવણી 11 ઓક્ટોબરે થશે.

અત્રે ઉલ્લેખનીય છે કે, મંદિરનું સંચાલન ખાનગી ટ્રસ્ટ દ્વારા કરવામાં આવતું હતું. પરંતુ, હાલમાં મેનેજમેન્ટ વિવાદ અંગે સિવિલ કોર્ટમાં કેસ ચાલી રહ્યો છે. આ અંગે એક વટહુકમ છે અને સિવિલ જજ દ્વારા મોનિટરિંગ કરવામાં આવી રહ્યું છે. સેવકોનું કહેવું છે કે, સરકારે કોરિડોર બનાવવો જોઈએ અને સુરક્ષા વ્યવસ્થા કરવી જોઈએ. તેમને પોતાના પૈસાથી મંદિર બનાવવામાં કોઈ વાંધો નથી. મંદિર એક ખાનગી ટ્રસ્ટ છે. જેમાં દાનમાં આવેલી રકમમાંથી કેટલોક હિસ્સો ટ્રસ્ટ અને કેટલોક હિસ્સો સેવાઓમાં રોકાયેલા સેવાદારોને જાય છે. જેના કારણે કેટલાક પરિવારોનું ભરણ પોષણ થતું હોય છે. સરકારની નજર મંદિરના પૈસા પર છે. તે કોઈ પૈસા ખર્ચવા માંગતી નથી. તે મંદિરના પૈસાથી જ તમામ કામ કરવા માંગે છે, જેનાથી સેંકડો પરિવારોની આજીવિકા બરબાદ થઈ જશે. ગોસ્વામીઓને મંદિરમાં પૂજા કરવાનો અધિકાર છે, જે સેંકડો વર્ષોથી ચાલ્યો આવે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.