પાંચ વર્ષ રાહ જોઈ, બે વાર વિઝા રદ્દ.. પાકિસ્તાની 'દુલ્હન' ભારત પહોંચી, કરશે લગ્ન

મંગળવારે સવારે ભારતને વધુ એક સારા સમાચાર મળ્યા. પાકિસ્તાનની દીકરી જવેરિયા ખાન ભારતમાં રહેતા છોકરાની વહુ બનવા ભારત પહોંચી છે અને મંગળવારે તે અટારી બોર્ડરથી ભારતમાં પ્રવેશી છે. અહીં તેના ભાવિ પતિ સમીર ખાન અને ભાવિ સસરા અહેમદ કમાલ ખાન યુસુફઝાઈ તેનું સ્વાગત કરવા પહોંચ્યા હતા. અહીં તમને જણાવી દઈએ કે ભારત સરકારે જવેરિયાને 45 દિવસનો વિઝા આપ્યો છે.

છેલ્લા પાંચ વર્ષથી પોતાની ભારતીય મંગેતર સાથે લગ્નની રાહ જોઈ રહેલી જવેરિયા ખાનુમ પાકિસ્તાનથી વાઘા બોર્ડર થઈને ભારત પહોંચી છે. વાઘા બોર્ડર પર તેના મંગેતર સમીર ખાને તેને ફૂલોનો ગુલદસ્તો આપીને તેનું સ્વાગત કર્યું હતું. જવેરિયાએ ભારતની ધરતી પર પગ મૂકતાની સાથે જ ભગવાનનો આભાર માન્યો હતો. તેણે કહ્યું કે, તેનું સપનું પાંચ વર્ષ પછી પૂરું થવા જઈ રહ્યું છે.

અહીં તમને જણાવી દઈએ કે, કરાચીની રહેવાસી 21 વર્ષીય જવેરિયા ખાનુમનો વિઝા આ પહેલા પણ બે વખત કેન્સલ કરવામાં આવ્યો હતો. જેના કારણે તે ભારત આવી શકી ન હતી. આના કારણે વર સમીર ખાન અને જાવરિયા બંનેના પરિવારો ભારે ટેન્શનમાં હતા.

સૂત્રો પાસેથી મળતી માહિતી મુજબ, જવેરિયા ખાનુમને ભારતનો 45 દિવસનો વિઝા આપવામાં આવ્યો છે. જવેરિયાના લગ્ન કોલકાતાના રહેવાસી સમીર ખાન સાથે નક્કી થયા હતા. લગ્નની તારીખ પણ નક્કી થઈ ગઈ. પરંતુ જ્યારે જવેરિયાએ ભારત આવવા માટે વિઝા માટે અરજી કરી ત્યારે તે રદ થઈ ગયો. જેના કારણે પરિવારના સભ્યો ભારે નિરાશ થઈ ગયા હતા.

પરંતુ તેણે ફરીથી વિઝા માટે અરજી કરી. જવેરિયાનો વિઝા બીજી વખત પણ રદ કરવામાં આવ્યો હતો. ત્યાર પછી સમીરના પરિવારે સામાજિક કાર્યકર અને પત્રકાર મકબૂલ અહેમદ વાસી કાદિયાનો સંપર્ક કર્યો હતો. તેમને ખબર પડી કે, મકબૂલે ઘણી પાકિસ્તાની દુલ્હનોને વિઝા અપાવવામાં મદદ કરી હતી. સમીર અને તેના પિતા યુસુફઝાઈએ મકબૂલને તેમની સમસ્યાઓ વિશે જણાવ્યું. ત્યાર પછી મકબૂલના પ્રયાસો ફળ્યા અને ભારત સરકારે જવેરિયાને વિઝા આપ્યા. આ વિઝા 45 દિવસ માટે માન્ય છે.

સમીરે કહ્યું, 'હું ખૂબ જ ખુશ છું કે મારી મંગેતર ભારત આવી છે. અમે 6 જાન્યુઆરીએ લગ્ન કરીશું. 45 દિવસ પછી અમે વિઝા એક્સટેન્શન માટે અરજી કરીશું. જવેરિયાના વિઝા કેન્સલ થતાં અમારા બંને પરિવારો ખૂબ જ પરેશાન હતા. પરંતુ હવે જ્યારે જવેરિયા ભારત આવી છે ત્યારે અમે ખૂબ જ ખુશ છીએ.'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.