'BJPએ મહારાષ્ટ્રમાં જે કર્યું એ જ પંજાબમાં કરશે', SADને શેનો છે ડર?

શિરોમણી અકાલી દળના સાંસદ હરસિમરત કૌર બાદલે BJP પર મોટો આરોપ લગાવ્યો છે. તેમણે કહ્યું કે, BJP મહારાષ્ટ્રની જેમ પંજાબમાં પણ ષડયંત્ર રચવાનો પ્રયાસ કરી રહી છે, પરંતુ કેન્દ્ર સરકાર તેની યોજનામાં સફળ નહીં થાય. કૌરે કહ્યું કે, સમગ્ર શિરોમણી અકાલી દળ એકજુટ છે અને સુખબીર બાદલની સાથે છે. BJPના કેટલાક કટ્ટરપંથીઓ શિરોમણી અકાલી દળને તોડવાનો પ્રયાસ કરી રહ્યા છે.

હરસિમરત કૌરે કહ્યું કે, BJPએ મહારાષ્ટ્રમાં જે કર્યું, પંજાબમાં પણ તે જ કરવા જઈ રહી છે, પરંતુ આખો પક્ષ સુખવીર સિંહ બાદલ જીની સાથે મજબૂતીથી ઉભો છે. પરંતુ BJP તેના આ ષડયંત્રમાં સંપૂર્ણપણે નિષ્ફળ જશે.

કૌરે કહ્યું કે 117 નેતાઓમાંથી માત્ર 5 નેતા સુખબીર બાદલની વિરુદ્ધ છે, જ્યારે 112 નેતાઓ પાર્ટી અને સુખબીર બાદલની સાથે ઉભા છે. તેમણે કહ્યું કે જે પાંચ લોકો વિરોધ કરી રહ્યા છે તે તમામ BJP સાથે છે અથવા તેમના સંપર્કમાં છે.

અકાલી દળના સાંસદે તે પાંચ લોકો વિશે પણ જણાવ્યું જે સુખબીર સિંહ બાદલની વિરુદ્ધ છે અને BJP સાથે છે અથવા તેમના સંપર્કમાં છે. તેમણે કહ્યું કે પાંચ લોકોમાંથી એકે BJPના ઉમેદવાર તરીકે લોકસભાની ચૂંટણી લડી હતી. બીજાને પણ BJP દ્વારા ચૂંટણી લડાવી હતી, ત્રીજાનો ભાઈ BJP સાથે છે અને ચોથો BJPમાં જોડાવા માટે અંદર બહાર ફરતો રહ્યો હતો. તેમણે કહ્યું કે આ બધા BJPના પીઠ્ઠુ છે, જે આ કરી રહ્યા છે. જ્યારે પંજાબ આ વાત સારી રીતે જાણે છે. તેમણે કહ્યું કે, આખી પાર્ટી સુખબીર સિંહ બાદલની સાથે છે. BJP એ 117માંથી પાંચ લોકોને તોડ્યા છે.

આવી સ્થિતિમાં પંજાબના રાજકીય વાતાવરણમાં એક સવાલ ઉઠી રહ્યો છે કે, અકાલી દળમાં બધુ બરાબર નથી ચાલી રહ્યું, કારણ કે પાર્ટીના કેટલાક નેતાઓ સુખબીર સિંહ બાદલનું રાજીનામું ઈચ્છે છે. આ જોતાં મંગળવારે અકાલી દળની અંદર બે બેઠકો યોજાઈ હતી. અકાલી દળના બળવાખોર નેતાઓએ જલંધરમાં બેઠક યોજી હતી અને આ બેઠકમાં પાર્ટીના કેટલાક જિલ્લાના વડાઓએ પણ હાજરી આપી હતી. જ્યારે બીજી બેઠક ચંદીગઢમાં પાર્ટી પ્રમુખ સુખબીર સિંહ બાદલની અધ્યક્ષતામાં યોજાઈ હતી. લોકસભા ચૂંટણીમાં અકાલી દળના પ્રદર્શનની સમીક્ષા કરવા માટે આ બેઠક યોજાઈ હતી.

જલંધરમાં યોજાયેલી બેઠક પછી બળવાખોર નેતાઓએ જાહેરાત કરી હતી કે, શિરોમણી અકાલી દળ બચાવો આંદોલન 1 જુલાઈથી શરૂ કરવામાં આવશે. જલંધરના વડાલા ગામમાં આયોજિત બળવાખોર નેતાઓની આ બેઠકમાં પૂર્વ સાંસદ પ્રેમ સિંહ ચંદુમાજરા, પૂર્વ SGPC અધ્યક્ષ બીબી જાગીર કૌર, પૂર્વ મંત્રી પરમિંદર સિંહ ઢીંડસા, પૂર્વ ધારાસભ્ય સિકંદર સિંહ મલુકા અને સુરજીત સિંહ રખડા જેવા મોટા નેતાઓ હાજર રહ્યા હતા.

બળવાખોર નેતાઓએ માંગ કરી હતી કે પાર્ટીના વડા સુખબીર સિંહ બાદલે પાર્ટી કાર્યકર્તાઓની ભાવનાઓને સમજવી જોઈએ અને બલિદાનની ભાવના બતાવવી જોઈએ અને પાર્ટીની કમાન એવા નેતાને સોંપવી જોઈએ જે અકાલી દળને મજબૂત કરી શકે અને ધર્મ અને રાજકારણ વચ્ચે સંતુલન પણ જાળવી શકે. અકાલી દળના બળવાખોર નેતાઓની બેઠકમાં સંત સમાજ સાથે જોડાયેલા કોઈ મોટા ચહેરાને પાર્ટી પ્રમુખનું પદ આપવા પર પણ વિચાર કરવામાં આવ્યો હતો.

બીજી તરફ ચંદીગઢમાં યોજાયેલી SADની બેઠકમાં પાર્ટીના વડા સુખબીર સિંહ બાદલના નેતૃત્વમાં વિશ્વાસ વ્યક્ત કરવામાં આવ્યો હતો. અકાલી દળે કહ્યું છે કે, આ તમામ બળવાખોર નેતાઓ નિરાશ છે અને BJP દ્વારા પ્રાયોજિત છે. પાર્ટીએ કહ્યું કે, તેઓ અકાલી દળને કમજોર કરવાનો પ્રયાસ કરી રહ્યા છે. સુખબીર સિંહ બાદલે બેઠકમાં કહ્યું કે, તેઓ દરેકનું સન્માન કરે છે અને તેમના માટે પાર્ટીના હિતથી ઉપર કંઈ નથી, તેમનો પોતાનો પરિવાર પણ પાર્ટી પછી જ આવે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.