રાહુલ ગાંધીની ન્યાય યાત્રામાં જોડાવવા માટે અખિલેશ યાદવે મૂકી આ શરત

રાહુલ ગાંધીની 'ભારત જોડો ન્યાય યાત્રા' ઉત્તર પ્રદેશમાં છે. કોંગ્રેસનો 'ગઢ' ગણાતા અમેઠી-રાયબરેલીમાંથી ન્યાય યાત્રા પસાર થઈ રહી છે. પરંતુ 'INDIA' ગઠબંધનમાં સહયોગી હોવા છતાં, સમાજવાદી પાર્ટીના વડા અખિલેશ યાદવ તેમની યાત્રામાં હાજરી આપશે નહીં. અખિલેશે સ્પષ્ટ શરત મૂકી છે, પહેલા સીટની વહેંચણીને આખરી ઓપ આપો, પછી સાથે મળીને આગળ વધીશું.

મીડિયા સાથે વાત કરતા પૂર્વ CMએ સ્પષ્ટ કહ્યું કે, 'વાતચીત ચાલી રહી છે. ઘણા લિસ્ટ ત્યાંથી આવ્યા, ઘણા અહીંથી ગયા. જે ક્ષણે સીટોનું વિતરણ થશે, સમાજવાદી પાર્ટી તેમની ન્યાય યાત્રામાં જોડાશે.'

2024ની સામાન્ય ચૂંટણી માટે ઘણા વિરોધ પક્ષોએ ગઠબંધન કર્યું હતું, પરંતુ ખુરશીની વાત જ એવી છે કે, મામલો થાળે પડતો જ નથી. તૃણમૂલ કોંગ્રેસ અને આમ આદમી પાર્ટી જેવી મોટી પાર્ટીઓ ટિકિટની વહેંચણીને લઈને અલગ થઈ ગઈ છે. મહાગઠબંધનથી અલગ નથી થયા, પરંતુ એકલા હાથે ચૂંટણી લડવાનો નિર્ણય લીધો છે.

ચૂંટણીની દૃષ્ટિએ ઉત્તર પ્રદેશ સૌથી મહત્વપૂર્ણ રાજ્યોમાંનું એક છે. અહીં લોકસભાની કુલ 80 બેઠકો છે. ઉત્તર પ્રદેશના પ્રાદેશિક પક્ષોના દબાણ વિના વિપક્ષી ગઠબંધનની નૌકા આગળ વધી શકતી નથી. ઉત્તર પ્રદેશમાં સરકારો ચલાવનાર બે મુખ્ય પક્ષો છેઃ સમાજવાદી પાર્ટી અને બહુજન સમાજ પાર્ટી. BSPએ ભારત ગઠબંધનમાં વધુ રસ દર્શાવ્યો નથી. SP શરૂઆતથી જ બેઠકોનો ભાગ હતી, ચૂંટણી રણનીતિમાં ભાગ લીધો હતો.

પરંતુ કોંગ્રેસ અને SP વચ્ચે બેઠકોની વહેંચણી પર વાતચીતમાં મડાગાંઠ સર્જાઈ હતી. રાજ્યના રાજકારણને નજદીકથી જાણનારાઓ કહી રહ્યા છે કે, કોંગ્રેસ રાજ્યની 80માંથી 20 બેઠકો માંગી રહી છે અને જે બેઠકો પર વાતચીત ચાલી રહી છે, તેનાથી તેઓ સંતુષ્ટ નથી. તેઓ 'જીતવાવાળી બેઠકો' ઈચ્છે છે. જ્યારે, સમાજવાદી પાર્ટી કોંગ્રેસની 'ગંભીરતા' પર સવાલો ઉઠાવી રહી છે. ન્યાય યાત્રા શરૂ થાય તે પહેલા જ SPના નેતાઓ કહી રહ્યા હતા કે, સીટની વહેંચણી પહેલા થઈ જવી જોઈતી હતી. તેનો અર્થ એ છે કે, બંને પક્ષો હજી એક જ પૃષ્ઠ પર નથી.

બંને વચ્ચે છેલ્લી રૂબરૂ વાતચીત 19 જાન્યુઆરીએ થઈ હતી. ત્યારથી માત્ર પત્રવ્યવહાર ચાલુ છે. સૌથી પહેલા કોંગ્રેસના રાજ્યસભા સાંસદ અને પાર્ટીની નેશનલ એલાયન્સ કમિટીના કન્વીનર મુકુલ વાસનિકે પત્ર લખીને પૂછ્યું હતું કે, કોંગ્રેસ શું ઈચ્છે છે. જવાબમાં, SPના રાજ્યસભા સાંસદ રામ ગોપાલ યાદવે કોંગ્રેસ દ્વારા માંગવામાં આવી રહેલી બેઠકો પર SPના વાંધાઓની ગણતરી કરી.

29 જાન્યુઆરીએ SP પ્રમુખે આશા વ્યક્ત કરી હતી કે, બંને પક્ષો જીતનું સમીકરણ બનાવવામાં સફળ થશે. તેણે સોશિયલ મીડિયા પ્લેટફોર્મ X પર પોસ્ટ કર્યું કે, તેઓ કોંગ્રેસ માટે 11 સીટો છોડી રહ્યા છે. પરંતુ પછી કોંગ્રેસે જવાબ આપ્યો કે, વાતચીત હજુ ચાલુ છે અને 11 અંતિમ સંખ્યા નથી.

હકીકતમાં જયંત સિંહના રાષ્ટ્રીય લોકદળ અને SP વચ્ચે ગઠબંધન હતું. તેમણે RLD માટે સાત બેઠકો છોડી હતી. પરંતુ હવે જ્યારે RLDએ પક્ષ બદલી લીધો છે, કોંગ્રેસ વધુ બેઠકો પર નજર રાખી રહી છે. સૂત્રોને ઉલ્લેખીને એવા પણ સમાચાર છે કે, SP 14 સીટો આપવા તૈયાર છે, પરંતુ કોંગ્રેસનું કહેવું છે કે, જે સીટો આપવામાં આવી રહી છે, તે બેઠકો પર કોંગ્રેસ મજબૂત સ્થિતિમાં નથી.

જાણકારી માટે તમને જણાવી દઈએ કે, છેલ્લી સામાન્ય ચૂંટણીમાં કોંગ્રેસે ઉત્તર પ્રદેશમાં એક સીટ જીતી હતી. SPએ BSP સાથે ગઠબંધન કર્યું હતું. આ મહાગઠબંધનમાં SPને 5 અને BSPને 10 બેઠકો મળી હતી.

#WATCH | Lucknow, UP: On joining Congress' Bharat Jodo Nyay Yatra, Samajwadi Party chief Akhilesh Yadav says "Right now talks are going on, lists have come from them, we have also given them the list. The moment, seat distribution is done, Samajwadi Party will join their Nyaya… pic.twitter.com/BzyTXcc0lM

— ANI (@ANI) February 19, 2024

શું આ વખતે કોંગ્રેસ અને માયાવતી વચ્ચે ગઠબંધન થઈ શકે છે? રાજ્યમાં સમાચાર ફેલાઈ રહ્યા છે કે, કોંગ્રેસના કેટલાક નેતાઓ BSP નેતૃત્વના સંપર્કમાં છે. જ્યારે અખિલેશ યાદવને આ પ્રશ્ન પૂછવામાં આવ્યો ત્યારે તેમણે કહ્યું કે, તેઓ કઇ પાર્ટી, કોની સાથે વાતચીત કરી રહ્યા છે તે અંગે ટિપ્પણી કરવા માંગતા નથી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.