લોકસભા ચૂંટણી પર વિદેશી મીડિયાએ શું કહ્યુ?ન્યૂયોર્ક ટાઈમ્સ,અલઝઝીરાથી લઈ ડોન સુધી

લોકસભા ચૂંટણી માટે મતગણતરી ચાલી રહી છે, BJPની આગેવાની હેઠળના NDAને અપેક્ષા મુજબની બેઠકો મળી નથી. આવી સ્થિતિમાં માત્ર દેશની જ નહીં પરંતુ વિશ્વભરના વિદેશી મીડિયાની નજર વિશ્વના સૌથી મોટા લોકતંત્ર ભારતની લોકસભા ચૂંટણીના પરિણામો પર ટકેલી છે.

દેશની આ લોકસભાની ચૂંટણીને અમેરિકાના ન્યૂયોર્ક ટાઈમ્સથી લઈને બ્રિટનની BBC સુધી દરેક દ્વારા આવરી લેવામાં આવી રહી છે. વિદેશી મીડિયા પ્રારંભિક પરિણામોને પોતાના પરિપ્રેક્ષ્યથી જોઈ રહ્યું છે.

ન્યૂયોર્ક ટાઈમ્સે પરિણામોને PM મોદીના 10 વર્ષના કાર્યકાળ પર જનમત ગણાવ્યા છે. ટાઈમ્સ અનુસાર, 'મોટા પ્રમાણમાં PM નરેન્દ્ર મોદીને ત્રીજી ટર્મ મળશે. ભારતમાં નવા રચાયેલા વિપક્ષી ગઠબંધને PM મોદીની વિભાજનકારી રાજનીતિ સામે મત માંગ્યા હતા. વિપક્ષે લોકોના મનમાં ડર જગાવ્યો હતો કે, જો BJP સત્તામાં આવશે તો તે બંધારણને બદલી નાખશે.'

ન્યૂયોર્ક ટાઈમ્સે લખ્યું, 'એક્ઝિટ પોલમાં BJPની મોટી જીતની આગાહી કરવામાં આવી હતી. મોટી બહુમતીના સમાચારને કારણે સોમવારે ભારતના શેરબજારે રેકોર્ડ બનાવ્યો. જો કે, મંગળવારે સવારે આખી વાર્તા બદલાઈ ગઈ. પરિણામ આવતા જ એક્ઝિટ પોલથી વિપરીત વિપક્ષોએ હરીફાઈ આપવાનું શરૂ કર્યું.'

CNNએ લખ્યું, 'વિશ્વની સૌથી મોટી ચૂંટણીમાં મતોની ગણતરી ચાલુ છે. PM નરેન્દ્ર મોદીની BJP આગળ છે. જો કે વિપક્ષી પાર્ટી કોંગ્રેસ જોરદાર ટક્કર આપી રહી છે.'

CNN આગળ લખે છે, 'ભારતના સૌથી લોકપ્રિય પરંતુ વિવાદાસ્પદ નેતા તેમના ત્રીજા કાર્યકાળની રાહ જોઈ રહ્યા છે. દુનિયાના સૌથી વધુ વસ્તી ધરાવતા દેશમાં સતત ત્રીજી વખત ચૂંટણી જીતવા માટે PM મોદીએ પ્રચારમાં ઈસ્લામ વિરોધી ભાષાનો ઉપયોગ કર્યો હતો.'

અલજઝીરાએ લખ્યું, 'PM મોદીનું BJP અને NDA ગઠબંધન આગળ ચાલી રહ્યું છે. તેને પડકારવા માટે રચાયેલ ગઠબંધન INDIA એલાયન્સ તેને મજબૂત સ્પર્ધા આપી રહ્યું છે. કોંગ્રેસે અપેક્ષા કરતા વધુ સારું પ્રદર્શન કર્યું છે. પરિણામોમાં એક મજબૂત સંદેશ છુપાયેલો છે, એટલે કે PM મોદી ફરી સત્તામાં આવ્યા પછી ગમે તેટલી તેમની પીઠ થપથપાવે, પણ તેઓ બેરોજગારી અને મોંઘવારીના મુદ્દાને છુપાવી શકતા નથી. PM મોદીએ આ મુદ્દાઓ પર કંઈક કરવાની જરૂર છે, અત્યાર સુધી તેઓ જૂની સરકારોને દોષી ઠેરવે છે. લોકો તેમની પાસેથી જવાબ માંગી રહ્યા છે.'

જાવેદ નકવીએ પાકિસ્તાની અખબાર ડૉનમાં લખ્યું છે કે, આજના ચૂંટણી પરિણામ નક્કી કરશે કે ભારતને લોકતંત્રમાં કેટલો વિશ્વાસ છે. તેણે આગળ લખ્યું કે, ચૂંટણી પ્રચાર દરમિયાન PM મોદીએ મુસ્લિમો પર ઘણી વખત હુમલો કર્યો. તેમણે મુસ્લિમોને ઘૂસણખોર ગણાવ્યા અને 80 ટકા હિંદુઓને વસ્તી વિષયક ડર બતાવ્યો. તેમણે દાવો કર્યો હતો કે, મુસ્લિમો હિંદુ મહિલાઓના મંગળસૂત્ર અને હિંદુઓના રોજગાર પર નજર રાખે છે. તેમણે કોંગ્રેસના મેનિફેસ્ટોને મુસ્લિમ લીગનો દસ્તાવેજ ગણાવ્યો હતો.

અમેરિકાના વોલ સ્ટ્રીટ જર્નલે લખ્યું છે કે, 'ભારતના PM નરેન્દ્ર મોદી બહુમત મેળવવા માટે સંઘર્ષ કરી રહ્યા છે. પ્રારંભિક વલણોમાં, તેઓ અપેક્ષા મુજબ પરિણામ મેળવી રહ્યાં નથી. વોલ સ્ટ્રીટ જર્નલે લખ્યું છે કે PM મોદી અને તેમની હિંદુ રાષ્ટ્રવાદી પાર્ટીને વિપક્ષ દ્વારા જોરદાર ફટકો પડ્યો છે.'

ફ્રાન્સ 24એ લખ્યું, 'ભારતીય ચૂંટણીમાં વિપક્ષ અપેક્ષા કરતાં વધુ સખત લડાઈ આપી રહ્યું છે. પોતાના 10 વર્ષના શાસનમાં PM નરેન્દ્ર મોદીએ ભારતીય રાજનીતિનો લેન્ડસ્કેપ બદલી નાખ્યો હતો. તેમની લોકપ્રિયતાએ તેમની પાર્ટીને પાછળ છોડી દીધી. PM મોદીએ સંસદીય ચૂંટણીને રાષ્ટ્રપતિની ચૂંટણી જેવી કરી. પરિણામ એ છે કે BJP ચૂંટણી જીતવા માટે મોદી બ્રાન્ડ પર નિર્ભર છે.'

BBCએ લખ્યું, 'પરિણામો નક્કી કરશે કે PM નરેન્દ્ર મોદીને ત્રીજી ટર્મ મળશે કે નહીં. શું તેઓ જવાહર લાલ નેહરુના સતત સૌથી લાંબા સમય સુધી ભારતના PM તરીકે ચૂંટાયા હોવાનો રેકોર્ડ તોડી શકશે કે નહીં?'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.