નારાયણ મૂર્તિ પોતાનું શૌચાલય જાતે કેમ સાફ કરે છે? જવાબ સાંભળી તમે કહેશો વાહ

ભારતના અબજોપતિ ઉદ્યોગપતિ અને ઈન્ફોસિસના સહ-સ્થાપક નારાયણ મૂર્તિ પોતાનું ટોયલેટ જાતે સાફ કરે છે. આ જાણીને કોઈ ને પણ નવાઈ લાગશે. સવાલ એ થશે કે આટલા પૈસાવાળો માણસ, જે હજારો નોકર રાખી શકે છે, તે આવું કેમ કરશે? હવે આ તમામ શંકાઓને નારાયણ મૂર્તિએ જાતે જ દૂર કરી દીધી છે. તેમનું માનવું છે કે આ સિદ્ધાંતોની બાબત છે.

મીડિયા સૂત્ર સાથે વાતચીત દરમિયાન નારાયણ મૂર્તિને પૂછવામાં આવ્યું કે, તેઓ તેમના બાળકોને આ કેવી રીતે સમજાવે છે. આના પર નારાયણ મૂર્તિએ જવાબ આપ્યો, બાળકો ઉત્સુક હોય છે. તેઓ જુએ છે અને તેમના ઘણા પ્રશ્નો પણ હોય છે. જ્યારે તેઓ મને પૂછે છે, ત્યારે હું તેમને ખૂબ જ પ્રેમથી સમજાવું છું કે, બીજાને માન આપવાની આ એક શ્રેષ્ઠ રીત છે. કારણ કે આપણા સમાજમાં એવું માનવામાં આવે છે કે, જે લોકો તમારા ટોયલેટને સાફ કરે છે, તેઓ તમારા કરતા નીચા કે નાના હોય છે.

નારાયણ મૂર્તિએ વધુમાં કહ્યું કે, હું મારા બાળકોને સમજાવું છું કે, આપણાથી નાના કોઈ નથી. ભગવાને બસ આપણને સારી સ્થિતિમાં મૂક્યા છે. આપણે તેને આપણા અધિકાર તરીકે સ્વીકારી શકતા નથી. તેના પર ગર્વ ન કરી શકાય. શક્ય હોય ત્યાં સુધી, આપણે એ બધા કામો જાતે કરવાનો પ્રયાસ કરવો જોઈએ જે આપણને એવું લાગે કે, આપણે સમાજ પ્રત્યે ન્યાયી બનવાનો પ્રયાસ કરી રહ્યા છીએ. હું જે કહું તે બંને બાળકો સારી રીતે સમજે છે.

સુધા મૂર્તિએ પણ ઈન્ટરવ્યુમાં એક ટુચકો શેર કર્યો હતો. જ્યારે તેનો પુત્ર રોહન તેનો જન્મદિવસ ઉજવવા માંગતો હતો અને તેમણે તેને પૈસા બચાવવાની સલાહ આપી હતી. સુધા મૂર્તિએ કહ્યું કે, હું બાળકોને મારી સાથે કામ કરવા લઈ જતી હતી, તેમને એ બતાવવા માટે કે લોકો કેવી રીતે કામ કરે છે. એક વખત જ્યારે હું પછાત વિસ્તારમાં કામ કરતી હતી ત્યારે મેં મારા પુત્ર રોહનને કહ્યું હતું કે, આ બાળકોને જુઓ, તેઓ તમારા કરતાં તેજસ્વી હોઈ શકે છે. પરંતુ તમે સારા પરિવારમાં જન્મ્યા છો તેથી તમને ફાયદો છે. પણ હવે આ લોકો પ્રત્યે તમારી ફરજ છે. તેમના જન્મદિવસની ઉજવણી કરવાને બદલે જો તમે પૈસા ભેગા કરીને આ બાળકોને આપો તો તેમનું જીવન બદલાઈ શકે છે. તમારા માટે તે થોડા રૂપિયા છે પરંતુ તેમના માટે તે ઘણા બધા છે.

ઈન્ટરવ્યુમાં નારાયણ મૂર્તિને પૂછવામાં આવ્યું કે, શું તેઓ ક્યારેય રાજકારણમાં જોડાશે? આના પર તેણે જવાબ આપ્યો કે, તે રાજકારણ માટે ખૂબ જ વૃદ્ધ થઈ ગયા છે અને હવે તે તેના પરિવાર સાથે સંગીત સાંભળીને અને વાંચવામાં સમય પસાર કરવા માંગે છે. આ સવાલ પર સુધા મૂર્તિએ કહ્યું કે, જનતાની સેવા કરવા માટે તેમને રાજકારણમાં આવવાની જરૂર નથી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.