આ મામલે CM મમતા બેનર્જી મોદી સરકાર સાથે કેન્દ્રના નિર્ણયમાં હસ્તક્ષેપ નહીં કરું

પશ્ચિમ બંગાળના CM મમતા બેનર્જીએ ગુરુવારે બાંગ્લાદેશમાં હિંદુ ઈસ્કોન સાધુ ચિન્મય કૃષ્ણ દાસની ધરપકડની નિંદા કરી હતી. CM મમતાએ કહ્યું કે, કેન્દ્રની મોદી સરકાર આ મુદ્દે જે પણ નિર્ણય લેશે, તે તેનું સમર્થન કરશે.

CM મમતા બેનર્જીએ કહ્યું કે, કોઈપણ ધર્મ પર હુમલો નિંદનીય છે. અમે આવા હુમલાની નિંદા કરીએ છીએ. ઘટના પછી મેં રાજ્યના ઇસ્કોન વડા સાથે બે વાર વાત કરી. પરંતુ આ એક આંતરરાષ્ટ્રીય મામલો છે. અમે કેન્દ્રના નિર્ણયમાં દખલ ન કરી શકીએ, પરંતુ અમે આ હુમલાની નિંદા કરી શકીએ છીએ.

CM મમતા રાજ્ય વિધાનસભામાં કેન્દ્રના તાજેતરના વકફ સુધારા બિલ પર સવાલ-જવાબ સત્રમાં બોલી રહ્યા હતા. બુધવારે TMC સાંસદ અભિષેક બેનર્જીએ કહ્યું હતું કે, અમે આંતરરાષ્ટ્રીય મુદ્દા પર પ્રતિક્રિયા આપી શકતા નથી, પરંતુ આ ઘટના દુર્ભાગ્યપૂર્ણ છે.

દાસની સોમવારે ઢાકાના શાહજલાલ ઈન્ટરનેશનલ એરપોર્ટ પર કથિત 'દેશદ્રોહ'ના આરોપમાં ધરપકડ કરવામાં આવી હતી, જ્યાંથી તેઓ ચટગાંવ જવાના હતા, જ્યાં હિન્દુ ધર્મના વૈષ્ણવ સંપ્રદાયનું મંદિર અને ઈસ્કોનનું સંલગ્ન પુંડરિક ધામ છે, જે મહત્વનું કેન્દ્ર છે.

તે બાંગ્લાદેશમાં લઘુમતીઓ પરના કથિત અત્યાચારની નિંદા કરવા માટે અનેક રેલીઓનું આયોજન કરી રહ્યો હતો. ધરપકડ પછી તરત જ, બરીશાલ, ચટગાંવ અને ઢાકાના શાહબાગમાં વિરોધ ફાટી નીકળ્યો, જ્યાં પોલીસે વિરોધીઓ પર લાઠીચાર્જ કર્યો.

પશ્ચિમ બંગાળ BJPએ પણ ધરપકડનો વિરોધ શરૂ કર્યો છે. પાર્ટીના ધારાસભ્યોએ બાંગ્લાદેશના ડેપ્યુટી હાઈ કમિશન ઓફિસ સુધી કૂચ કરી અને અધિકારીઓને મળ્યા. રાજ્ય એકમે એ પણ જાહેરાત કરી છે કે, તેઓ આવતા સોમવારે પશ્ચિમ બંગાળમાં આવેલી તમામ ભારત-બાંગ્લાદેશ સરહદોને બંધ કરશે.

હાઈકોર્ટે ગુરુવારે બાંગ્લાદેશમાં ઈસ્કોનની પ્રવૃત્તિઓ પર પ્રતિબંધ મૂકવાનો ઈન્કાર કરી દીધો હતો. એક સ્થાનિક અખબારે અહેવાલ આપ્યો છે કે, રાજદ્રોહના આરોપમાં ધરપકડ કરાયેલા હિંદુ નેતાના સમર્થકો અને સુરક્ષા કર્મચારીઓ વચ્ચેની અથડામણમાં એક વકીલનું મોત થયું છે. આ વકીલે બુધવારે સંગઠન સબંધિત કેટલાક અખબારોનો અહેવાલ આપ્યા પછી હાઈકોર્ટ પાસેથી ઈન્ટરનેશનલ સોસાયટી ફોર કૃષ્ણા ચેતના (ઈસ્કોન) પર પ્રતિબંધ મૂકવાની માંગ કરી હતી.

મીડિયા સૂત્રોની ખબર અનુસાર, કોર્ટે એટર્ની જનરલને ઈસ્કોનની તાજેતરની ગતિવિધિઓને લઈને સરકાર દ્વારા ઉઠાવવામાં આવેલા પગલાઓની માહિતી આપવા કહ્યું હતું. આ અઠવાડિયે ધરપકડ કરાયેલા હિન્દુ નેતા ચિન્મય કૃષ્ણ દાસને અગાઉ ઇસ્કોનમાંથી હાંકી કાઢવામાં આવ્યા હતા. તેની ધરપકડ પછી મંગળવારે અથડામણ થઈ હતી, જેમાં સહાયક સરકારી વકીલ એડવોકેટ સૈફુલ ઈસ્લામનું મોત થયું હતું.

મીડિયા સૂત્રએ અહેવાલ આપ્યો કે, જ્યારે ગુરુવારે હાઈકોર્ટની કાર્યવાહી શરૂ થઈ ત્યારે એટર્ની જનરલની ઓફિસે જસ્ટિસ ફરાહ મહેબૂબ અને જસ્ટિસ દેબાશિષ રોય ચૌધરીની બેંચ સમક્ષ કોર્ટ દ્વારા માંગવામાં આવેલી માહિતી રજૂ કરી. એડિશનલ એટર્ની જનરલ અનિક R હક અને ડેપ્યુટી એટર્ની જનરલ અસદ ઉદ્દીને હાઈકોર્ટની બેંચને માહિતી આપી હતી કે, વકીલ સૈફુલ ઈસ્લામ અલીફની હત્યાના અને ઈસ્કોનની પ્રવૃત્તિઓ સંદર્ભમાં ત્રણ અલગ-અલગ કેસ નોંધવામાં આવ્યા છે અને આ મામલે 33 આરોપીઓની ધરપકડ કરવામાં આવી છે. અખબારે વધુમાં અહેવાલ આપ્યો છે કે, બેન્ચને આશા છે કે, સરકાર કાયદો અને વ્યવસ્થાની સ્થિતિ અને બાંગ્લાદેશના લોકોના જીવન અને સંપત્તિની સુરક્ષા અંગે સતર્ક રહેશે.

ભારતે મંગળવારે દાસની ધરપકડ અને જામીન નકારવા અંગે ઊંડી ચિંતા વ્યક્ત કરી હતી અને ઢાકાને હિંદુઓ અને અન્ય તમામ લઘુમતી જૂથોની સુરક્ષા સુનિશ્ચિત કરવા વિનંતી કરી હતી. આ ઉપરાંત, સુપ્રીમ કોર્ટના વકીલોના એક જૂથે બુધવારે બાંગ્લાદેશ સરકારને એક કાનૂની નોટિસ મોકલી જેમાં ઇસ્કોનને 'કટ્ટરવાદી સંગઠન' ગણાવ્યું અને તેના પર પ્રતિબંધ મૂકવાની માંગણી કરી.

એક સ્થાનિક અખબારે નોટિસનો ઉલ્લેખ કરીને કહ્યું હતું કે, 10 વકીલો વતી અલ મામુન રસેલ દ્વારા મોકલવામાં આવેલી તે નોટિસમાં એડવોકેટ ઇસ્લામની હત્યા માટે જવાબદાર લોકો સામે કાર્યવાહી કરવાની પણ માંગ કરવામાં આવી હતી. નોટિસમાં આરોપ છે કે, 'ઇસ્કોન બાંગ્લાદેશમાં એક કટ્ટરપંથી સંગઠન તરીકે કામ કરી રહ્યું છે, જે સાંપ્રદાયિક અશાંતિને ભડકાવવા માટે રચાયેલ પ્રવૃત્તિઓમાં સામેલ છે.'

પૂર્વ બાંગ્લાદેશી ગુપ્તચર અધિકારીઓના એક પુસ્તકનો ઉલ્લેખ કરીને, નોટિસમાં આક્ષેપ કરવામાં આવ્યો છે કે, ઇસ્કોન 'સાંપ્રદાયિક હિંસા ભડકાવવાના હેતુથી ધાર્મિક કાર્યક્રમોનું આયોજન કરે છે અને પરંપરાગત હિંદુ સમુદાયો પર તેની માન્યતાઓ લાદવામાં આવે છે અને નિમ્ન હિંદુ જાતિના સભ્યોની બળજબરીથી ભરતી કરે છે.'

રસેલની નોટિસ ગૃહ મંત્રાલય, કાયદા અને ન્યાય મંત્રાલય અને પોલીસ મહાનિરીક્ષકને સંબોધવામાં આવી હતી અને આતંકવાદ વિરોધી અધિનિયમ, 2009ની સંબંધિત કલમ હેઠળ બાંગ્લાદેશમાં ઇસ્કોન પર તાત્કાલિક પ્રતિબંધ મૂકવાની હાકલ કરવામાં આવી હતી. આ અગાઉ, ઇસ્કોને બાંગ્લાદેશના સત્તાવાળાઓને દેશમાં હિંદુઓ માટે 'શાંતિપૂર્ણ સહઅસ્તિત્વ'ને પ્રોત્સાહન આપવા વિનંતી કરી હતી, કારણ કે તેણે દાસની ધરપકડની 'ભારે' નિંદા કરી હતી.

દાસની સોમવારે ઢાકાના હઝરત શાહજલાલ ઈન્ટરનેશનલ એરપોર્ટ પરથી ધરપકડ કરવામાં આવી હતી જ્યારે તે એક રેલીમાં ભાગ લેવા માટે ચટગાંવ જઈ રહ્યો હતો. મંગળવારે, ચટગાંવની છઠ્ઠી મેટ્રોપોલિટન મેજિસ્ટ્રેટ કોર્ટે રાજદ્રોહના કેસમાં તેને જામીન નકારી કાઢી અને તેને જેલમાં મોકલી દીધો. મંગળવારે એક નિવેદનમાં, ઇસ્કોન બાંગ્લાદેશના જનરલ સેક્રેટરી ચારુ ચંદ્ર દાસ બ્રહ્મચારીએ કહ્યું, 'અમે અમારી ગંભીર ચિંતા વ્યક્ત કરીએ છીએ અને ચિન્મય કૃષ્ણ દાસની તાજેતરની ધરપકડની સખત નિંદા કરીએ છીએ..., અમે બાંગ્લાદેશના વિવિધ વિસ્તારોમાં સનાતનીઓ સામેની હિંસા અને હુમલાની પણ નિંદા કરીએ છીએ.'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.