શું રાયબરેલીમાં BJPના આ બે ધુરંધરોની નારાજગી દિનેશ પ્રતાપ સિંહની રમત બગાડશે?

ઉત્તર પ્રદેશની રાયબરેલી લોકસભા બેઠક પરથી ગાંધી પરિવારને હાંકી કાઢવાની BJPની રણનીતિ નિરર્થક જણાઈ રહી છે. 2019માં રાહુલ ગાંધી અમેઠી લોકસભાથી ચૂંટણી હારી ગયા હતા. આ વખતે સોનિયા ગાંધીએ ચૂંટણી લડવાની ના પાડી હોવાના કારણે રાહુલ ગાંધી રાયબરેલીમાંથી ચૂંટણી લડી રહ્યા છે. રાયબરેલી બેઠક પરથી પણ BJP રાહુલ ગાંધીને હરાવવા માટે તમામ પ્રયાસો કરી રહી છે. પરંતુ BJP પોતાની જ રણનીતિમાં અટવાઈ ગઈ છે. હકીકતમાં, એક વ્યૂહરચનાના ભાગરૂપે, ભારતીય જનતા પાર્ટી એક પછી એક રાયબરેલીના અગ્રણી નેતાઓને BJPમાં સામેલ કરી રહી છે. આ અંતર્ગત એક સમયે સોનિયા ગાંધીના નજીકના સાથી દિનેશ પ્રતાપ સિંહને પણ BJPમાં લાવવામાં આવ્યા હતા. 2019માં દિનેશ પ્રતાપ સિંહે પણ BJPની ટિકિટ પર સોનિયા ગાંધીને ટક્કર આપી હતી. તે પછી BJPએ મજબૂત સ્થાનિક નેતાઓને પાર્ટીમાં સામેલ કરવાનું ચાલુ રાખ્યું. પરંતુ રાહુલ ગાંધીને ટક્કર આપવા માટે BJPએ જે ઉમેદવારની વરણી કરી છે, તેના કારણે શાસક પક્ષની સ્થાનિક છાવણીમાં થોડો અસંતોષ ફેલાયો છે. જેના કારણે BJP માટે તેની મંઝિલ મુશ્કેલ બની રહી છે.

જો ગાંધી પરિવારને રાયબરેલીમાંથી બહારનો રસ્તો બતાવવો હોય તો પહેલા રાહુલ અને સોનિયાના ચાવીરૂપ લોકોને તોડવા જરૂરી હતા. આ અંતર્ગત સૌથી પહેલા દિનેશ પ્રતાપ સિંહને BJPમાં લાવવામાં આવ્યા હતા. દિનેશ સિંહનો આખો પરિવાર સ્થાનિક રાજકારણમાં છે. તેમના એક ભાઈ ધારાસભ્ય રહી ચૂક્યા છે. એક ભાઈ જિલ્લા પંચાયત પ્રમુખ પણ છે. એવું કહેવાય છે કે, તેમના નિવાસસ્થાન પંચવટીથી જ સમગ્ર જિલ્લાની રાજનીતિ નિયંત્રિત કરવામાં આવી રહી હતી. આની સમાંતર, રાયબરેલીમાં અખિલેશ સિંહનું નામ લોકપ્રિય હતું. સાત વખતના ધારાસભ્ય અખિલેશ પણ શક્તિશાળી હતા અને જિલ્લાના રાજકારણમાં તેમનો પણ પ્રભાવ હતો. આ બંને નામો બે ધ્રુવોથી અલગ હતા પરંતુ સોનિયા ગાંધીને વફાદાર હતા.

અખિલેશ સિંહના મૃત્યુ પછી, તેમની પુત્રી અદિતિ સિંહ તેમનો ઉત્તરાધિકાર સંભાળી રહી છે અને તે પહેલા રાયબરેલીથી કોંગ્રેસના ધારાસભ્ય બન્યા હતા પરંતુ હવે BJPમાં છે. તેઓ 2022માં BJPની ટિકિટ પર ચૂંટાયા છે. આ પહેલા BJPએ દિનેશ પ્રતાપને પાર્ટીમાં સામેલ કરીને તેમને સોનિયા સામે ચૂંટણી લડાવ્યા હતા. તેઓ ચૂંટણી હારી ગયા પરંતુ તેમણે સારી ટક્કર આપી હોવાથી ઈનામ તરીકે તેમને માત્ર MLC જ નહીં પરંતુ UP કેબિનેટમાં સ્થાન પણ આપવામાં આવ્યું. BJP દ્વારા દિનેશ પ્રતાપ સિંહને અમેઠી મોડ્યુલ પર કામ કરવા માટે કહેવામાં આવ્યું હતું. જે રીતે સ્મૃતિ ઈરાની અમેઠીમાં હાર્યા પછી સતત પાંચ વર્ષ સુધી અમેઠીની જનતામાં લોકસેવા સાથે જોડાયેલા રહ્યા, તેવી જ રીતે દિનેશ પ્રતાપ સિંહ પણ સતત કામ કરતા રહ્યા.

પરંતુ રાયબરેલી જીતવી હજુ પણ મુશ્કેલ હતી. કારણ કે, રાયબરેલીમાં જાતિનું ગણિત સંતુલિત બનતું નહોતું. આ બેઠક પર સૌથી વધુ બ્રાહ્મણ મતદારો છે. એક અંદાજ મુજબ આ વિસ્તારમાં 11 ટકા રાજપૂત અને 18 ટકા બ્રાહ્મણ મતદારો છે. બ્રાહ્મણો કોંગ્રેસના પરંપરાગત મતદારો હોવાથી BJP માટે આ સૌથી મોટી ચિંતાનો વિષય હતો. આનો સામનો કરવા માટે BJPએ પ્રદેશના સૌથી અગ્રણી બ્રાહ્મણ નેતા, ઉંચાહરના સમાજવાદી પાર્ટીના ધારાસભ્ય મનોજ પાંડે પર દાવ લગાવ્યો. મનોજ પાંડે સમાજવાદી પાર્ટીના બ્રાહ્મણ ચહેરા તરીકે જાણીતા છે. તેથી જ સમાજવાદી પાર્ટીએ તેમને વિધાનસભામાં વ્હીપ તરીકેની મહત્વની જવાબદારી સોંપી હતી. રાજ્યસભાની ચૂંટણી દરમિયાન BJPએ તેમને પોતાની છાવણીમાં સામેલ કર્યા હતા. મનોજ પાંડે એ રાયબરેલીનું તે પાત્ર છે જેને PM મોદીની લોકપ્રિયતાની ટોચ પર પણ સૌથી વધુ મતોથી રાજ્ય જીતવાનો શ્રેય છે. હાલમાં મનોજ પાંડે ટેકનિકલી હજુ પણ સમાજવાદી પાર્ટીમાં જ છે.

તાજેતરના સમયમાં જ રાયબરેલીમાં એવી ઘટનાઓ બની છે, જેને જોઈને એવું લાગે છે કે BJPની આ બંને મિસાઈલ લોન્ચ માટે જ તૈયાર નથી. બંનેની નારાજગીના પોતપોતાના કારણો છે. મીડિયા સૂત્રોના અહેવાલમાં જણાવાયું છે કે, રાયબરેલી સદરના BJP ધારાસભ્ય અદિતિ સિંહ અને ઉંચાહરના બળવાખોર SP ધારાસભ્ય મનોજ કુમાર પાંડે તેમના મતવિસ્તારમાં દિનેશ પ્રતાપ સિંહ માટે પ્રચાર કરવા માટે અનિચ્છા ધરાવે છે. BJPના સૂત્રોનું કહેવું છે કે, કેન્દ્રીય ગૃહ પ્રધાન અમિત શાહે તેમની રાયબરેલી મુલાકાત દરમિયાન બંનેને મનાવવાનો પૂરો પ્રયાસ કર્યો હતો.

રવિવારના રોજ રાયબરેલીમાં તેમના ચૂંટણી પ્રચાર દરમિયાન, શાહ દિનેશ પ્રતાપ સિંહ સાથે મનોજ પાંડેના ઘરે ગયા હતા અને તેમના માટે સમર્થન માંગ્યું હતું. કહેવામાં આવી રહ્યું છે કે, મનોજ પાંડેની નારાજગીના બે કારણ છે. પહેલું કારણ એ હતું કે, તેમને રાયબરેલી બેઠક પરથી BJPની ટિકિટ મળવાની આશા હતી. 27 ફેબ્રુઆરીની રાજ્યસભાની ચૂંટણીમાં, પાંડેએ SPના મુખ્ય દંડકનું પદ છોડી દીધું હતું અને BJPની તરફેણમાં ક્રોસ વોટિંગ કર્યું હતું. શક્ય છે કે તેમને પાર્ટી દ્વારા આ પ્રકારની ખાતરી આપવામાં આવી હોય.

જો કે, BJPના ઘણા નેતાઓ સ્પષ્ટતા કરે છે કે પાંડે, જેઓ હજુ સુધી ઔપચારિક રીતે BJPમાં જોડાયા નથી, તેમને ચિંતા છે કે, જો તેઓ ખુલ્લેઆમ દિનેશ પ્રતાપ સિંહ માટે પ્રચાર કરતા જોવા મળે તો તેઓ તેમની વિધાનસભાની સદસ્યતા ગુમાવી શકે છે. જો કે આ બધા પાછળ સૌથી મહત્વની વાત દિનેશ પ્રતાપ સાથેની જૂની અદાવત હોવાનું કહેવાય છે. દિનેશ પ્રતાપે ઉમેદવારી પત્ર ભર્યું તે દિવસે BJPના ઘણા સ્થાનિક નેતાઓ પણ પાંડેને સમજાવવા ગયા હતા, પરંતુ તેઓ સાથે જવા માટે રાજી થયા ન હતા. BJPએ તે દિવસે તેમના પુત્ર અને ભાઈને BJPમાં સામેલ કર્યા હતા. જ્યારે મનોજ પાંડે ઉમેદવારી નોંધાવવા ગયા ન હતા, ત્યારે બ્રાહ્મણ સમુદાયમાં હકારાત્મક સંકેત આપવા માટે BJPએ DyCM બ્રજેશ પાઠકને મેદાનમાં ઉતારવા પડ્યા હતા. મીડિયા સૂત્રોએ સ્થાનિક સૂત્રોનો ઉલ્લેખ કરીને કહ્યું કે, શાહે પાંડેને કહ્યું છે કે, તેમણે BJPના ઉમેદવારને સમર્થન આપવું જોઈએ અને પાર્ટી તેમને યોગ્ય સમયે પુરસ્કાર આપશે.

રાયબરેલી સદરના ધારાસભ્ય અદિતિ સિંહ પણ પાર્ટીના ઉમેદવાર દિનેશ પ્રતાપ સિંહ માટે પ્રચાર કરતી જોવા મળી નથી. સ્વાભાવિક છે કે, આની સીધી અસર BJPને મળતા મતો પર પડી શકે છે. અમિત શાહની રાયબરેલીની મુલાકાત દરમિયાન તેઓ જાહેર સભામાં હાજર રહ્યા હતા પરંતુ સભાને સંબોધિત કરી ન હતી. શાહે તેની સાથે ચર્ચા કરી હતી, પરંતુ શનિવારે તેણે 'X' પર તેના પિતા સાથેની જૂની તસવીર પણ પોસ્ટ કરી હતી, જેમાં તેણે કહ્યું હતું કે તેના 'ઉસૂલ' (સિદ્ધાંતો) સાથે સમાધાન કરવું તેમના માટે મુશ્કેલ હતું. આ પોસ્ટ પરથી ઘણા અર્થ કાઢવામાં આવી રહ્યા છે. હકીકતમાં, 2019ની લોકસભા ચૂંટણી દરમિયાન, કોંગ્રેસના તત્કાલિન ધારાસભ્ય અદિતિ સિંહે આરોપ લગાવ્યો હતો કે તેમની કાર પર દિનેશ પ્રતાપ સિંહના ભાઈ અને તત્કાલીન જિલ્લા પંચાયત પ્રમુખ અવધેશ સિંહ દ્વારા હુમલો કરવામાં આવ્યો હતો. BJPમાં જોડાયા અને પાર્ટીની ટિકિટ પર 2022ની ચૂંટણી જીત્યા પછી પણ દિનેશ સાથેના તેમના મતભેદો દૂર થઈ શક્યા નથી. આવી સ્થિતિમાં, તે કદાચ દિનેશ પ્રતાપ સિંહની ચૂંટણીમાં પોતાને અસ્વસ્થ માની રહી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.