અરવિંદ કેજરીવાલે વન નેશન વન ઇલેક્શનનો વિરોધ કર્યો, આપ્યું આ કારણ

દિલ્હી અને પંજાબમાં સત્તામાં રહેલી આમ આદમી પાર્ટીએ વન નેશનલ વન ઇલેક્શનનો વિરોધ કર્યો છે. શનિવારે તેમણે વન નેશન વન ઈલેક્શનના મુદ્દાને લઈને ઉચ્ચ સ્તરીય સમિતિને પોતાની ભલામણો મોકલી હતી. AAP મહાસચિવ પંકજ ગુપ્તાએ ઉચ્ચ સ્તરીય સમિતિના સચિવ નિતેન ચંદ્રાને સંબોધીને 13 પાનાનો ભલામણ પત્ર લખ્યો છે.

AAP પત્રમાં કહ્યું છે કે તેનાથી લોકશાહીના વિચાર અને બંધારણના મૂળભૂત માળખાને નુકસાન થશે. આનાથી સભ્યો વચ્ચે હોર્સ ટ્રેડિંગને પણ પ્રોત્સાહન મળશે. સાંસદોની ખુલ્લેઆમ ખરીદીને વેગ મળશે.

AAPએ વધુમાં કહ્યું કે, એકસાથે ચૂંટણી યોજીને ખર્ચ બચાવવાના પ્રયાસો કરવામાં આવી રહ્યા છે. જે ભારત સરકારના વાર્ષિક બજેટના માત્ર 0.1 ટકા છે. સંકુચિત નાણાકીય લાભ અને વહીવટી સગવડ માટે બંધારણ અને લોકશાહીના સિદ્ધાંતોનું બલિદાન આપી શકાય નહીં.

આમ આદમી પાર્ટી પહેલા AIMIMના પ્રમુખ અને હૈદ્રાબાદથી સાંસદ અસદુદીન ઔવેસીએ પણ ઉચ્ચ સ્તરિય સમિતિને પત્ર લખીને વન નેશન વન ઇલેક્શનનો વિરોધ કર્યો હતો. ઔવેસી લખ્યું હતું કે, સંસદીય સ્થાયી સમિતિ, નીતિ આયોગ કે કાયદા પંચે આ પગલું શા માટે જરૂરી છે તે દર્શાવ્યું નથી. તેના બદલે તેને કેવી રીતે અમલમાં મૂકી શકાય તેના પર ચર્ચા ધ્યાન કેન્દ્રિત કરે છે. કમનસીબે, હાઇ લેવલ કમિટીના સંદર્ભની શરતોમાં સમાન ખામીઓ અસ્તિત્વમાં છે.

એકસાથે ચૂંટણી યોજવાનું એક મુખ્ય કારણ અલગ ચૂંટણી યોજવાના ખર્ચમાં ઘટાડો કરવાનું હશે. અહેવાલો અનુસાર, 2019ની લોકસભા ચૂંટણીમાં 60,000 કરોડ રૂપિયાનો ખર્ચ કરવામાં આવ્યો હતો. આ રકમમાં ચૂંટણી લડતા રાજકીય પક્ષો દ્વારા કરવામાં આવેલ ખર્ચ અને ભારતીય ચૂંટણી પંચ (ECI) દ્વારા ચૂંટણીઓ કરાવવા માટે કરવામાં આવેલ ખર્ચનો સમાવેશ થાય છે.

એકસાથે ચૂંટણી યોજવાથી કેન્દ્ર અને રાજ્ય સરકારોની નીતિઓ અને કાર્યક્રમોમાં નિરંતરતા સુનિશ્ચિત કરવામાં પણ મદદ મળશે. હાલમાં જ્યારે પણ ચૂંટણીઓ યોજાવાની હોય છે ત્યારે આદર્શ આચારસંહિતા લાગુ કરવામાં આવે છે, જેના કારણે નવા લોકકલ્યાણના પ્રોજેક્ટો શરૂ કરવા પર પ્રતિબંધ મુકવામાં આવે છે. આ સિવાય કાયદા પંચે કહ્યું કે એકસાથે ચૂંટણી યોજવાથી મતદાતાઓની સંખ્યામાં વધારો થશે, કારણ કે તેમના માટે એક સાથે મતદાન કરવું વધુ અનુકૂળ છે.

1967 સુધી, ભારતમાં વિધાનસભા અને લોકસભાની ચૂંટણીઓ એક સાથે યોજાતી હતી, પરંતુ 1968-69માં કેટલીક વિધાનસભાઓ અને 1970માં લોકસભાના અકાળ વિસર્જન પછી, ચૂંટણીઓ અલગ-અલગ યોજાવા લાગી. આ પછી વર્ષ 1983માં ચૂંટણી પંચે એક સાથે ચૂંટણી કરાવવાનો પ્રસ્તાવ મૂક્યો હતો, પરંતુ તત્કાલીન સરકારે તેને ફગાવી દીધો હતો.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.