INDIA ગઠબંધન માટે કેજરીવાલનું બલિદાન, એક હાથે આપવાનો અને બીજા હાથે લેવાનો દાવ
લોકસભા ચૂંટણી 2024ને લઈને વિપક્ષી પાર્ટીઓના INDIA ગઠબંધનમાં સીટ શેરિંગનો મામલો મોડેથી ઉકેલાવા લાગ્યો છે. શુક્રવારે આસામમાં એક મોટું બલિદાન આપીને આમ આદમી પાર્ટી એ ગઠબંધનના સિદ્ધાંતને લઈને કોંગ્રેસ માટે એક દાખલો બેસાડ્યો છે. કેજરીનાલે ગૌહાટીથી પોતાના એક ઉમેદવારનું નામ પાછી ખેંચી લીધું છે. આ સાથે અરવિંદ કેજરીવાલની પાર્ટીએ કોંગ્રેસને ગઠબંધન માટે બલિદાન આપવાનું પણ કહ્યું છે. AAPએ કોંગ્રેસને ડિબ્રુગઢ અને સોનિતપુર લોકસભા બેઠકો પરથી જાહેર કરાયેલા ઉમેદવારોના નામ પાછા ખેંચવાની માંગ કરી હતી. મતલબ કે કેજરીવાલે એક હાથે આપવાનો અને બીજા હાથે લેવાનો દાવ રમ્યો છે.
કોંગ્રેસે આસામની 14માંથી 13 બેઠકો માટે ઉમેદવારો ફાઈનલ કર્યા છે. જ્યારે આમ આદમી પાર્ટી (AAP) પહેલા જ અહીં ત્રણ ઉમેદવારોના નામ જાહેર કર્યા હતા.. AAPએ ગૌહાટી, સોનિતપુર અને ડિબ્રુગઢ માટે ઉમેદવારોના નામ જાહેર કર્યા હતા. કોંગ્રેસે 13 બેઠકો પર ચૂંટણી લડવાની જાહેરાત કરી હતી. પાર્ટીએ આશા વ્યક્ત કરી હતી કે તે ડિબ્રુગઢ માટે તેના પ્રાદેશિક સહયોગી આસામ રાષ્ટ્ર પરિષદ (AJP) સાથે સીટ શેરિંગ પર સમાધાન કરી લેશે. જ્યારે AAPએ ડિબ્રુગઢથી મનોજ ધનોવરને મેદાનમાં ઉતાર્યા છે.
AJPએ આ સીટ પરથી લુરીનજ્યોતિ ગોગોઈને પોતાના ઉમેદવાર જાહેર કર્યા છે. હવે AAPએ આડકતરી રીતે કોંગ્રેસ પર ગૌહાટીથી પોતાનો ઉમેદવાર પાછો ખેંચીને મોટું પગલું ભરવાનું આડકતરી રીતે દબાણ કર્યું છે.
બીજી તરફ ભાજપે પૂર્વ મુખ્યમંત્રી સર્બાનંદ સોનોવાલને ડિબ્રુગઢથી પોતાના ઉમેદવાર બનાવ્યા છે. જ્યારે મમતા બેનર્જિની TMC એ પણ કોકરાઝાર (ST), બરપેટા, લખીમપુર અને સિલચર (SC) બેઠકો માટે તેના ઉમેદવારોના નામની જાહેરાત કરી દીધી છે.
કેજરીવાલે કહ્યું કે, અમે કોંગ્રેસ અને ભારત ગઠબંધનની અન્ય પાર્ટીઓને પણ પડકાર આપીએ છીએ કે તેઓ સોનિતપુર અને ડિબ્રુગઢ લોકસભા બેઠકો પરથી તેમના ઉમેદવારો પાછા ખેંચીને અમારા ઈશારાનો જવાબ આપે. અન્યથા તે સ્પષ્ટ થઈ જશે કે કોંગ્રેસનું ભાજપ સાથે સેટઅપ છે. અને તે માત્ર ભાજપની જીત સુનિશ્ચિત કરવા ચૂંટણી લડી રહી છે.
AAPનું આ પગલું આસામ કોંગ્રેસના અધ્યક્ષ ભૂપેન બોરાની અપીલ બાદ આવ્યું છે. રાજકીય પરિદ્રશ્યમાં સંભવિત પરિવર્તનનો સંકેત આપતા, બોરાએ AAP, CPI અને CPMને 2026 રાજ્યની ચૂંટણીઓ માટે એક થવા વિનંતી કરી હતી. આ દરમિયાન સીપીએમે પણ એક ઉમેદવારનું નામાંકન કર્યું હતું અને કોંગ્રેસને તેના ઉમેદવારને પાછા ખેંચવાની અપીલ કરી હતી.
નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.
તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.
ગુજરાતનું અગ્રેસર ન્યૂઝ પોર્ટલ, અહીં વાત થાય છે માત્ર ગુજરાત અને ગુજરાતનાં હિતની... Download Khabarchhe APP www.khabarchhe.com/downloadApp