ભાજપ પાસે ફાઈવ સ્ટાર ઓફિસો, અમારી પાસે ચૂંટણી લડવાના પૈસા નથી, ખાતા સીઝ કરી દીધા

કોંગ્રેસ પાર્ટીએ આજે એક મોટી પ્રેસ કોન્ફરન્સ કરીને સત્તાધારી ભારતીય જનતા પાર્ટી (BJP) પર મોટો આરોપ લગાવ્યો છે. તેમાં કોંગ્રેસ અધ્યક્ષ મલ્લિકાર્જુન ખડગે, સોનિયા ગાંધી અને રાહુલ ગાંધી હાજર રહ્યા હતા. કોંગ્રેસે આરોપ લગાવ્યો છે કે, BJPએ ચૂંટણી દાનથી પોતાના ખાતા ભર્યા છે. તેમણે કહ્યું કે, દરેક જગ્યાએ માત્ર BJPની જાહેરાતો જ દેખાય છે. બીજી તરફ કોંગ્રેસના બેન્ક ખાતાઓ સીઝ કરી દેવામાં આવ્યા છે. BJP પર શ્રેણીબદ્ધ આરોપો લગાવતા ખડગેએ કહ્યું કે, હું એ જણાવવા માંગતો નથી કે BJPએ કંપનીઓ પાસેથી પૈસા કેવી રીતે લીધા. તેમણે કહ્યું કે BJPની દરેક જગ્યાએ ફાઈવ સ્ટાર ઓફિસ છે.

ભૂતપૂર્વ કોંગ્રેસ અધ્યક્ષ સોનિયા ગાંધીએ પણ ખડગેને સમર્થન આપ્યું હતું અને શાસક ભારતીય જનતા પાર્ટી પર દેશના PM નરેન્દ્ર મોદી દ્વારા કોંગ્રેસના ભંડોળને ખતમ કરવાનો પ્રયાસ કરવાનો આરોપ લગાવ્યો હતો. કોંગ્રેસના ખાતામાંથી પણ પૈસા લેવામાં આવી રહ્યા છે. અમે ચૂંટણી લડવા માટે સંપૂર્ણ રીતે તૈયાર છીએ. ચૂંટણી બોન્ડથી BJPને સૌથી વધુ ફાયદો થયો છે.

રાહુલ ગાંધીએ કહ્યું, આજે અમે રેલ્વે ટિકિટ ખરીદી શકતા નથી, અમારા નેતાને એક શહેરથી બીજા શહેરમાં મોકલી શકતા નથી. કોંગ્રેસના તમામ બેંક ખાતાઓ ફ્રીઝ કરવામાં આવ્યા હતા. અમે પ્રચાર કરવા સક્ષમ નથી. કોંગ્રેસ વિરુદ્ધ આ ગુનાહિત કાર્યવાહી છે. ભારતના PM નરેન્દ્ર મોદી આ ગુનાઓ કરી રહ્યા છે.

કોંગ્રેસ અધ્યક્ષ ખરગેએ કહ્યું કે, 18મી લોકસભાની ચૂંટણી ચાલી રહી છે. તેમણે કહ્યું કે, આપણે બધા જોઈ રહ્યા છીએ કે ભાજપ અમને કચડી રહી છે. તેઓ અમને ચૂંટણી લડી શકીએ એવી સ્થિતિમાં રાખવા નથી માંગતા. તેઓ અમારા પૈસાનો નાશ કરીને એકતરફી ચૂંટણી કરાવવા માંગે છે. લોકો સ્માર્ટ છે, તેઓ આ બધું જાણે છે. તેમણે કહ્યું કે, કોઈપણ લોકશાહી માટે નિષ્પક્ષ ચૂંટણી જરૂરી છે. તમામ રાજકીય પક્ષો માટે લેવલ પ્લેઇંગ ફિલ્ડ હોવું જોઈએ. દરેક પાસે એક જ પ્રકારના સંસાધનો હોવા જોઈએ. એવું નથી કે, જેઓ સત્તામાં છે તેમનો જ એકાધિકાર હોવો જોઈએ. અને મીડિયા પર પણ તેમનો એકાધિકાર હોવો જોઈએ.

ખડગેએ કહ્યું કે, ઈલેક્ટોરલ બોન્ડ ઈશ્યુએ દેશની ઈમેજને ઠેસ પહોંચાડી છે. સુપ્રીમ કોર્ટે જેને ગેરકાયદેસર જાહેર કર્યું છે, તે સ્કીમ હેઠળ વર્તમાન સત્તાધારી પક્ષે પોતાના ખાતામાં હજારો કરોડથી વધુ રકમ જમા કરાવી લીધી છે. બીજી તરફ મુખ્ય વિપક્ષી પાર્ટીનું બેંક એકાઉન્ટ કાવતરું કરીને ફ્રીઝ કરવામાં આવ્યું છે. જેથી પૈસાના અભાવે અમે તેમની બરાબર થઈને ચૂંટણી લડી શકીએ નહીં. ખડગેએ કહ્યું કે, આની દૂરગામી અસરો પડશે. દેશમાં લોકશાહી બચાવવી હોય તો લેવલ પ્લેઈંગ ગ્રાઉન્ડની જરૂર છે. કોઈપણ રાજકીય પક્ષને લાચાર બનાવીને અને ચૂંટણીમાં અવરોધો ઊભા કરીએ, તેને મુક્ત અને નિષ્પક્ષ ચૂંટણી કહી શકાય નહીં. BJPને ચૂંટણી ડોનેશન બોન્ડમાંથી 56 ટકા પૈસા મળ્યા છે. જ્યારે કોંગ્રેસને માત્ર 11 ટકા જ ચૂંટણી ડોનેશન મળ્યું છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.