32માંથી 31 સીટ જીતી SKM પણ એકમાત્ર તેનઝિંગ સામે હારી ગઈ, જાણો કોણ છે નોર્બૂ

સિક્કિમ વિધાનસભા ચૂંટણી માટે રવિવારે મતગણતરી હાથ ધરવામાં આવી હતી. ચૂંટણી પંચના ડેટા અનુસાર, સિક્કિમ ક્રાંતિકારી મોરચા ફરી એકવાર રાજ્યમાં ભારે બહુમતી સાથે સત્તામાં પરત ફર્યા છે. પાર્ટીના વડા અને રાજ્યના વર્તમાન CM પ્રેમ સિંહ તમાંગે રેનોક અને સોરેંગ-ચાકુંગ બેઠકો પરથી વિધાનસભા ચૂંટણી લડી હતી અને બંને બેઠકો જીતી હતી. ચૂંટણી પંચના ડેટા મુજબ સિક્કિમમાં સત્તારૂઢ SKMના રાજકીય વાવાઝોડાને કારણે વિપક્ષનો સંપૂર્ણ સફાયો થઈ ગયો છે.

પ્રેમ સિંહ તમાંગના નેતૃત્વમાં સિક્કિમ ક્રાંતિકારી મોરચાએ રાજ્યની 32 વિધાનસભા બેઠકોમાંથી 31 બેઠકો જીતી છે. પરંતુ SKMના આ રાજકીય વાવાઝોડામાં વિપક્ષના એક ઉમેદવાર એવા હતા જે બહાદુરીથી લડ્યા અને જીત્યા પણ. તે નેતાનું નામ તેનઝિંગ નોર્બુ લામથા છે, જે શ્યારી વિધાનસભા બેઠક પરથી સિક્કિમ ડેમોક્રેટિક ફ્રન્ટના ઉમેદવાર હતા. તેનઝિંગે તેમના નજીકના હરીફ સિક્કિમ ક્રાંતિકારી મોરચાના કુંગા નીમા લેપ્ચાને 1314 મતોના માર્જિનથી હરાવ્યા હતા. તેઓ એક સામાજિક કાર્યકર છે. તેમણે સામાજિક કાર્ય માટે રાજ્ય સરકારની નોકરીમાંથી રાજીનામું આપ્યું હતું.

તેનઝિંગ નોર્બુ લામથા (49)નો જન્મ કુનઝાંગ નામગ્યાલ લામથા અને ડેન લામુ લામથાને ત્યાં થયો હતો. તેના મૂળ કબી લંગચોક અને પામ ભુસુક ગામોમાંથી છે. તેના પિતા કાબી લંગચોકમાં રહેતા હતા, જ્યારે પામ ભુસુક તેની માતાનું મૂળ ગામ છે. તેનઝિંગે દિલ્હી પુસા ઇન્સ્ટિટ્યૂટ ઑફ ટેક્નોલોજીમાંથી એન્જિનિયરિંગમાં ડિપ્લોમા કર્યું છે. તેઓ 1992માં સિક્કિમના રોડ એન્ડ બ્રિજ વિભાગમાં જુનિયર એન્જિનિયર તરીકે નિયુક્ત થયા હતા.

2018માં સરકારી નોકરીમાંથી નિવૃત્તિ લીધા પછી, તેઓ સક્રિય રાજકારણમાં પ્રવેશ્યા અને સિક્કિમ ડેમોક્રેટિક ફ્રન્ટમાં જોડાયા અને 2024ની વિધાનસભા ચૂંટણીમાં તેઓ રાજ્યની શ્યારી વિધાનસભા બેઠક પરથી SDFના સત્તાવાર ઉમેદવાર બન્યા. ચૂંટણી પંચમાં દાખલ કરાયેલ ચૂંટણી એફિડેવિટ મુજબ, તેનઝિંગ નોર્બુ લામથાની કુલ જાહેર કરેલી સંપત્તિ 58.3 કરોડ રૂપિયા છે, જેમાં 1.2 કરોડ રૂપિયાની જંગમ સંપત્તિ અને 57.1 કરોડ રૂપિયાની સ્થાવર સંપત્તિનો સમાવેશ થાય છે.

તેમની કુલ જાહેર કરેલી આવક રૂ. 1.3 કરોડ છે, જેમાંથી રૂ. 1.3 કરોડ તેમની પોતાની આવક છે. તેનઝિંગ નોર્બુ લામથા પર કુલ રૂ. 23.2 કરોડનું દેવું છે. SDF નેતાના ચૂંટણી સોગંદનામા મુજબ, તેમની સામે કોઈ ફોજદારી કેસ નોંધાયેલ નથી. તેનઝિંગની પત્ની ડોમા લાડિંગપાનું અવસાન થયું છે. તેમને રિગપિયા વાનચંક લમથા નામનો પુત્ર છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.