એક દેશ, એક ચાર્જર! ભારતમાં પણ લાગુ થઈ શકે છે આ નિયમ, શું થશે ફેરફાર?

યુરોપિયન યુનિયનની જેમ જ ભારતમાં પણ એક ચાર્જરનો નિયમ લાગુ થઈ શકે છે. જો અહેવાલોનું માનીએ તો, સરકાર કોમન ચાર્જિંગ પોર્ટના નિયમને લાગુ કરવા વિચાર કરી રહી છે. આ નિયમ લાગુ થયા પછી તમામ સ્માર્ટફોન અને ટેબલેટ માટે માત્ર એક જ ચાર્જિંગ પોર્ટની જરૂર પડશે.

સરકાર ટાઇપ-C ચાર્જિંગ પોર્ટને સામાન્ય બનાવી શકે છે. યુરોપિયન યુનિયને વર્ષ 2022માં આ નિયમ પસાર કર્યો હતો, ત્યારપછી Appleને પણ iPhoneમાં Type-C ચાર્જિંગ પોર્ટ આપવાનું હતું. સરકાર આ વર્ષના અંત સુધીમાં આ અંગે જાહેરાત કરી શકે છે.

સરકાર E-વેસ્ટ ઘટાડવા માટે આ પગલાં લઈ રહી છે. આ નિયમ પછી યુઝર્સ તેમના તમામ સ્માર્ટફોન અને ટેબલેટને એક જ ચાર્જરથી ચાર્જ કરી શકશે. જો અહેવાલોનું માનીએ તો, સરકાર આગામી દિવસોમાં લેપટોપ માટે પણ ટાઇપ-C ચાર્જિંગ પોર્ટ ફરજિયાત બનાવી શકે છે.

ઈલેક્ટ્રોનિક્સ અને ઈન્ફોર્મેશન ટેકનોલોજી મંત્રાલય ઈચ્છે છે કે ઉત્પાદકો ટેબલેટ, સ્માર્ટફોન અને લેપટોપ માટે સમાન ચાર્જિંગ પોર્ટનો ઉપયોગ કરે. આ નિયમ લેપટોપ માટે 2026માં લાગુ કરવામાં આવશે, જ્યારે સ્માર્ટફોન અને ટેબલેટ માટે તેને જૂન 2025માં લાગુ કરી શકાશે.

આ યાદીમાં પહેરી શકાય તેવા ઉપકરણો અને ફીચર ફોનનો સમાવેશ કરી શકાતો નથી. અગાઉ વર્ષ 2022માં સરકારે આ અંગે વિચારણા શરૂ કરી હતી. ત્યારે એક દેશ એક ચાર્જર અંગે બેઠક પણ યોજાઈ હતી. ભારત ટૂંક સમયમાં તેના નવા નિયમોની જાહેરાત કરી શકે છે. જો કે, કોઈ નિશ્ચિત તારીખ જાહેર કરવામાં આવી નથી.

યુરોપિયન યુનિયને વર્ષ 2022માં આ નિયમ પસાર કર્યો હતો. તે સમયે એપલે તેનો વિરોધ કર્યો હતો. કંપનીએ લાઈટનિંગ પોર્ટ માટે ઘણી હિમાયત કરી હતી, પરંતુ તેમને તેમાં કોઈ સફળતા મળી ન હતી. જોકે, ગયા વર્ષે કંપનીએ તેના ફોનમાં લાઈટનિંગ પોર્ટને બદલે ટાઈપ-C ચાર્જિંગ પોર્ટનો ઉપયોગ કરવાનું શરૂ કર્યું છે.

Type-C પોર્ટ હોવા છતાં, iPhoneને જ્યારે અન્ય બ્રાન્ડના ચાર્જરથી ચાર્જ કરવામાં આવે ત્યારે તેને ગરમ થવાની સમસ્યાનો સામનો કરવો પડે છે. એપલે નવા ફોન લોન્ચ કરતી વખતે યુઝર્સને પણ આ અંગે જાણકારી આપી હતી. કંપનીએ સ્પષ્ટ કર્યું હતું કે અન્ય બ્રાન્ડના ચાર્જરનો ઉપયોગ કરવાથી iPhoneમાં સમસ્યા આવી શકે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.