કાળા કાચ-નંબર પ્લેટ વગરની કાર લઈ ફરતા પોલીસકર્મી સાથે જુઓ મેહુલ બોઘરાએ શું કર્યુ

સુરતના યુવાન એડવોકેટ મેહુલ બોઘરા ફરી એકવાર ચર્ચામાં આવ્યા છે. તેમણે મીડિયા સાથેની વાતચીતમાં આરોપ લગાવ્યો છે કે, પોલીસે મારા પર ફરી હુમલો કર્યો છે. પુણા પોલીસ સ્ટેશનમાં ફરિયાદ નોંધાવ્યા પછી બોઘરાએ મીડિયા સાથે વાત કરી હતી.

ઘણી વખત પોલીસની કામગીરી સામે સોશિયલ મીડિયા પર વીડિયો વાયરલ કરીને જાણીતા બનેલા એડવોકેટ મેહુલ બોઘરા ફરી ચર્ચામાં આવ્યા છે. રવિવારે મીડિયા સાથેની વાતચીતમાં તેમણે કહ્યું હતું કે, હું મારા અંગત કામ માટે ઇસ્કોન મોલ જઇ રહ્યો હતો ત્યારે પરવત પાટીયા પાસે BRTSમાં એક બ્લેક કલરના કાચ વાળી ગાડી ઉભી હતી અને તેની પર નંબર પ્લેટ પણ લગાવવામાં નહોતી આવી. આ ગાડી પર પોલીસ લખેલું હતું.

બોઘરાએ કહ્યું કે, ગુજરાતના DGPનો એક પરિપત્ર છે કે, પોલીસે કાળા કાચવાળી કે નંબર પ્લેટ વગરના ગાડી રાખવી નહીં. એક જાગૃત નાગરિક તરીકે મેં કારમાંથી ઉતરીને ચેક કરવાની કોશિશ કરી હતી કે બ્લેક કાચ વાળી ગાડીમાં શું છે? બોઘરાએ કહ્યું કે, સલામતી ખાતર મેં સોશિયલ મીડિયા પર લાઇવ કર્યું હતું.

ટ્રાફીકના નિયમોના ઉલ્લંઘન માટે પોલીસ સામે પણ કાર્યવાહી થવી જોઇએ એટલે મેં સૌથી પહેલા 100 નંબર ડાયલ કર્યો હતો, પરંતુ કોઇએ ફોન ઉપાડ્યો નહોતો. બોઘરાએ આગળ કહ્યું કે, એ પછી મેં DCP ટ્રાફિકને પણ કોલ કર્યો હતો, પરંતુ તેમણે પણ મારો કોલ ઉંચક્યો નહોતો. ફરી 100 નંબર ડાયલ કર્યો, પરંતુ કોઇ જવાબ મળ્યો નહોતો. ટ્રાફીક હેલ્પ લાઇન પર પણ ફોન કર્યો, પરંતુ કોઇ જવાબ નહોતો.

મેહુલ બોઘરાએ આરોપ લગાવ્યો છે કે, એ પછી 6થી 7 જેટલાં લોકો આવ્યા હતા અને મારા પર અને ત્યાં ટોળે વળેલા લોકો પર પત્થરમારો કર્યો હતો. મને મારવામાં આવ્યો અને લોકોને પણ મારવામાં આવ્યા હતા. આ બાબતે ફરિયાદ કરવા માટે હું પુણા પોલીસ સ્ટેશન પહોંચ્યો હતો તો પોલીસે મને ઇન્વેસ્ટીગેશન રૂમમાં બેસાડી દીધો. ત્યાં પેલા કાળા કાચ વાલા ભાઇએ મને આવીને ધમકાવ્યો હતો કે તારી સર્વિસ કરવી પડશે.

પુણા પોલીસ સ્ટેશનના પી.આઇએ મારી ફરિયાદ લેવાને બદલે મને હાથ ખેંચીને પોલીસ સ્ટેશન બહાર કાઢ્યો હતો. બોઘરાએ કહ્યું કે અઢી કલાકની ખટપટ પછી પોલીસે આખરે ફરિયાદ નોંધવી પડી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.