AFGને મળ્યા હતા 3 ઓપ્શન, છતા નોઇડા સ્ટેડિયમમાં કેમ થઇ રહી છે ટેસ્ટ

અફઘાનિસ્તાન અને ન્યૂઝીલેન્ડ વચ્ચે એકમાત્ર ટેસ્ટ મેચ ગ્રેટર નોઇડના શહીદ વિજય પાર્થિક સ્પોર્ટ્સ સ્ટેડિયમમાં રમાઇ રહી છે. મેચ 6 સપ્ટેમ્બરથી થવાની હતી, પરંતુ વરસાદ બાદ સ્ટેડિયમની દુર્દશાના કારણે પહેલા 2 દિવસોની રમત જરાય ન થઇ શકી. વરસાદના કારણે સ્ટેડિયમની હાલત ખૂબ ખરાબ થઇ ગઇ છે. મેનેજમેન્ટ 2 દિવસ સુધી પીચ અને આઉટફિલ્ડને સારી કરી ન શક્યું. તેના માટે તેણે ભાડાના પંખા અને કવર્સ પણ મગાવ્યા હતા, પરંતુ સફળતા ન મળી.

અફઘાનિસ્તાની ટીમ માટે આ હોમ ટેસ્ટ છે કેમ કે રાજકીય પરેશાનીઓના કારણે ટીમ પોતાના ઘર આંગણે ઇન્ટરનેશનલ મેચ રમી શકતી નથી. પરંતુ અહી એક મોટી વાત એ સામે આવી છે કે અફઘાનિસ્તાન માટે આ એકમાત્ર ટેસ્ટ મેચ રમવા માટે 3 વેન્યૂનો વિકલ્પ આપવામાં આવ્યો હતો. તેમાં કાનપુર, બેંગ્લોર અને ગ્રેટર નોઇડા સામેલ હતા, પરંતુ એ છતા અફઘાનિસ્તાને ગ્રેટર નોઇડા સ્ટેડિયમને જ પસંદ કર્યું. ખાસ વાત એ પણ છે કે BCCIએ આ સ્ટેડિયમ પર પ્રતિબંધ લગાવી રાખ્યો છે. હવે સવાલ એ ઉઠે છે કે આખરે તેણે એવું કેમ કર્યું? તેનો જવાબ છે દિલ્હીની નજીક હોવાનું.

દિલ્હી નોઇડાની ખૂબ નજીક છે અને અહીથી અફઘાની ટીમને કબૂલની સીધી જ ફ્લાઇટ મળે છે. આજ કારણ છે કે અફઘાનિસ્તાન ક્રિકેટ બોર્ડ (ACB)એ આ એકમાત્ર ટેસ્ટ માટે ગ્રેટર નોઇડાને પસંદ કર્યું હતું. પરંતુ અહી દુર્દશા જોઇને બોર્ડે કહ્યું હતું કે, હવે તે ક્યારેય પણ આ સ્ટેડિયામાં કોઇ મેચ નહીં રમે. માર્ચ 2017માં અહી છેલ્લી ઇન્ટરનેશનલ મેચ રમાઇ હતી, જ્યારે અફઘાનિસ્તાન અને આયરલેન્ડ વચ્ચે વ્હાઇટ બૉલ સીરિઝ રમાઇ હતી.

આ વર્ષના અંતમાં સપ્ટેમ્બર 2017માં કોર્પોરેટ મેચોમાં મેચ ફિક્સિંગના મામલા સામે આવ્યા હતા, ત્યારે BCCIએ સ્ટેડિયમને પ્રતિબંધિત કરી દીધું હતું. બીજી તરફ BCCIએ વર્ષ 2016માં એવી જાહેરાત કરી હતી કે આ સ્ટેડિયમ અફઘાનિસ્તાન ક્રિકેટ ટીમનું હોમ ગ્રાઉન્ડ હશે. એવું એ સમયે થયું હતું, જ્યારે ICCએ આ સ્ટેડિયમને ઇન્ટરનેશનલ ક્રિકેટ સ્ટેડિયમનો દરજ્જો આપ્યો હતો. ICCના માધ્યમથી દરજ્જો મળવા અને BCCIના દ્વારા પ્રતિબંધિત કરવા છતા અફઘાનિસ્તાને આ સ્ટેડિયમને પસંદ કર્યું.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.