વિશાખાપટ્ટનમમાં ઈંગ્લેન્ડ 4 સ્પિનરો રમાડશે! બ્રેન્ડન મેક્કુલમનો ભારતને પડકાર

ઈંગ્લેન્ડની ટીમ 5 મેચની ટેસ્ટ શ્રેણીમાં 1-0થી આગળ છે. બીજી ટેસ્ટ મેચ શુક્રવાર, 2 ફેબ્રુઆરીથી વિશાખાપટ્ટનમમાં રમાશે. આ પહેલા ઈંગ્લેન્ડના કોચ બ્રેન્ડન મેક્કુલમે ભારતને ટર્નિંગ પિચ બનાવવાનો પડકાર ફેંક્યો હતો. ઈંગ્લેન્ડે 3 સ્પિનરો અને 1 ઝડપી બોલર સાથે પ્રથમ ટેસ્ટમાં પ્રવેશ કર્યો હતો. નવોદિત ટોમ હાર્ટલીએ પોતાની શાનદાર બોલિંગના જોરે આખી મેચને પલટી નાખી હતી. આવી સ્થિતિમાં મેક્કુલમે કહ્યું કે, જો વિશાખાપટ્ટનમની પીચ સ્પિનરો માટે વધુ મદદરૂપ થશે તો ઈંગ્લેન્ડ 4 સ્પિનરોને રમાડવામાં અચકાશે નહીં.

જો ઈંગ્લેન્ડ 4 સ્પિનરો સાથે જશે તો જેક લીચ, રેહાન અહેમદ અને ટોમ હાર્ટલી સિવાય શોએબ બશીરને પ્લેઈંગ 11માં તક મળશે. વિઝા સંબંધિત સમસ્યાઓના કારણે બશીર મોડો ભારત આવ્યો હતો. દુબઈથી બ્રિટન પરત ફરવાના કારણે તે પ્રથમ ટેસ્ટમાંથી બહાર થઈ ગયો હતો. વિઝા મળ્યા પછી તે ભારત આવ્યો અને હૈદરાબાદ ટેસ્ટના ચોથા દિવસે ઈંગ્લેન્ડની ટીમ સાથે જોડાઈ ગયો.

મેક્કુલમે સેન્ઝ રેડિયો પર બશીર વિશે કહ્યું, 'તે અબુ ધાબીના શિબિરમાં અમારી સાથે હતો અને તે ખરેખર તેની કુશળતાથી પ્રભાવિત થયો. તે ટીમમાં ફિટ થઈ જાય છે. ટોમ હાર્ટલીની જેમ, તેની પાસે પણ પ્રથમ-વર્ગનો બહુ ઓછો અનુભવ છે, પરંતુ અમને લાગ્યું કે તેની કુશળતા અહીં અમારા માટે ઉપયોગી થઈ શકે છે. તે બરાબર યોગ્ય સમયે આવ્યો હતો. લોકોએ તેને ખૂબ જ ઉત્સાહિત કર્યો અને તે ટેસ્ટ જીતનો સાક્ષી બન્યો. તે આગામી ટેસ્ટ મેચની ગણતરીમાં છે. જો વિકેટ વધુ ટર્ન થશે તો અમે તમામ સ્પિનરોને રમાડવાથી ડરીશું નહીં.'

મેક્કુલમે કહ્યું, 'જ્યારે અમે ટોમને પસંદ કર્યો, ત્યારે ઘણા લોકોએ ગુસ્સો કર્યો હતો, પરંતુ આપણે એ ન ભૂલવું જોઈએ કે, નાથન લિયોન માત્ર 40ની આસપાસની સરેરાશ સાથે ફર્સ્ટ-ક્લાસ ક્રિકેટ જ રમ્યો હતો, જ્યારે તેને ઓસ્ટ્રેલિયા માટે પ્રથમ વખત ટેસ્ટ ટીમ માટે પસંદ કરવામાં આવ્યો હતો.'

પ્રથમ ટેસ્ટમાં ભારતની હાર પછી તમામની નજર વિશાખાપટ્ટનમની વિકેટ પર રહેશે. શું આ વિકેટ પણ હૈદરાબાદની જેમ ધીમી અને નીચી હશે કે, પછી આપણે રેન્ક ટર્નર જોશું? ભારતીય ટીમની બેટિંગ નબળી છે. વિરાટ કોહલી પછી, KL રાહુલ અને રવિન્દ્ર જાડેજા બીજી ટેસ્ટમાંથી બહાર થઈ ગયા છે, તેથી રેન્ક ટર્નર્સ જોવા મળે તેવી શક્યતા નથી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.