KKRની સફળતાનો શ્રેય છીનવી રહ્યા છે કોચ ગંભીર? કેપ્ટન ઐયરે આપ્યો આ જવાબ

શ્રેયસ અય્યરની આગેવાની હેઠળની ટીમો છેલ્લા ચાર વર્ષમાં બે વખત ઈન્ડિયન પ્રીમિયર લીગ (IPL)ની ફાઇનલમાં પહોંચી છે, પરંતુ કોલકાતા નાઈટ રાઈડર્સ (KKR)ના ખેલાડીને ટીમના 'મેન્ટર' ગૌતમ ગંભીરને પોતાના કરતા વધુ લાઇમલાઇટ મળવા અંગે કોઈ ફરિયાદ નથી. શ્રેયસની આગેવાની હેઠળની KKR ટીમ રવિવારે સનરાઈઝર્સ હૈદરાબાદ સામે IPLની 17મી સીઝનની ફાઈનલ રમશે. અગાઉ 2020માં શ્રેયસની કપ્તાનીમાં દિલ્હી કેપિટલ્સ આ લીગની ફાઇનલમાં પહોંચી હતી.

શ્રેયસને પૂછવામાં આવ્યું કે, શું તેને લાગે છે કે કેપ્ટન તરીકે તેની સિદ્ધિઓને પૂરતું મહત્વ આપવામાં આવ્યું નથી. મુંબઈના આ ખેલાડીએ જવાબમાં કહ્યું, 'તમે લોકોએ (મીડિયા) આ વાતને અતિશયોક્તિ કરી છે. એક સુકાની તરીકે હું કેવો રહ્યો, તે નક્કી કરવાનું તમારા પર આધારિત છે.' જ્યારે 'માર્ગદર્શક' તરીકે ગંભીરના યોગદાન વિશે પૂછવામાં આવ્યું ત્યારે શ્રેયસે તેને એવા લોકોમાંથી એક ગણાવ્યો જેઓ T20 ફોર્મેટમાં રમતને શ્રેષ્ઠ રીતે સમજે છે. તેણે કહ્યું, 'ગૌતમ ભાઈ વિશે, મને લાગે છે કે, તેમને રમત કેવી રીતે રમાય છે તે વિશે ઘણું જ્ઞાન છે. તેણે KKR સાથે પહેલા બે ટાઇટલ જીત્યા છે. અમારે હરીફ ટીમો સામે કેવી રીતે રમવાનું છે, તે સંદર્ભમાં તેની વ્યૂહરચના પરફેક્ટ રહી છે.

શ્રેયસને આશા છે કે, સનરાઇઝર્સ સામેની ફાઇનલમાં ડગ-આઉટમાંથી ગંભીરના અમૂલ્ય યોગદાનથી KKR શાનદાર પ્રદર્શન કરી શકશે. તેણે કહ્યું, 'અમે આશા રાખીએ છીએ કે, અમે તેની સમજ સાથે આ ગતિવિધિ ચાલુ રાખીશું.' છેલ્લા છ મહિના આ જમણા હાથના બેટ્સમેન માટે ઉતાર-ચઢાવથી ભરેલા છે. ભારત માટે ટેસ્ટ મેચ ન રમવાને કારણે તેણે BCCIનો સેન્ટ્રલ કોન્ટ્રાક્ટ ગુમાવ્યો હતો. શ્રેયસે રણજી ટ્રોફીની ફાઇનલમાં પુનરાગમન કર્યું હતું અને વિદર્ભ સામે બીજી ઇનિંગમાં 95 રનની મહત્વપૂર્ણ ઇનિંગ રમી હતી.

જો કે, 29 વર્ષીય આ ખેલાડી વર્તમાન IPL સિઝનમાં બેટથી બહુ પ્રભાવશાળી રહ્યો નથી અને તે T20 વર્લ્ડ કપની ટીમમાં સ્થાન મેળવવાની દોડમાં દૂર દૂર સુધી નહોતો. શ્રેયસે નિરાશા વ્યક્ત કરી હતી કે, લોકો તેની પીઠની ઈજા વિશે તેના પર વિશ્વાસ કરતા નથી. તેણે કહ્યું, 'લાંબા ફોર્મેટમાં વર્લ્ડ કપ પછી હું ચોક્કસપણે સંઘર્ષ કરી રહ્યો હતો. જ્યારે મેં મારી ચિંતા વ્યક્ત કરી, ત્યારે કોઈ તેની સાથે સંમત નહોતું.' ભારત માટે ત્રણેય ફોર્મેટમાં 124 મેચોમાં 4000થી વધુ રન બનાવનાર શ્રેયસે કહ્યું કે, ભૂતકાળ પર ધ્યાન કેન્દ્રિત કરવાને બદલે તેણે પોતાના નિયંત્રણ હેઠળની વસ્તુઓ પર ધ્યાન કેન્દ્રિત કરવાનું યોગ્ય માન્યું. તેણે કહ્યું, 'જ્યારે IPL નજીક આવી રહી હતી ત્યારે હું મારું શ્રેષ્ઠ પ્રદર્શન આપવા માંગતો હતો. અમે આમાં અમારી યોજનાઓ અને વ્યૂહરચનાઓને લાગુ કરવામાં સફળ રહ્યા.'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.