T20 કેપ્ટનશિપની રેસમાં પછડાટ ખાધા પછી પહેલીવાર હાર્દિકે કહ્યુ- ક્યારેક પોતાના..

શ્રીલંકાના પ્રવાસ માટે ભારતીય ક્રિકેટ ટીમની જાહેરાત 18 જુલાઈના રોજ કરવામાં આવી હતી. સ્ટાર બેટ્સમેન સૂર્યકુમાર યાદવને શ્રીલંકા સામેની T-20 સિરીઝ માટે કેપ્ટન બનાવવામાં આવ્યો હતો, જ્યારે રોહિત શર્મા વનડે સિરીઝની કપ્તાની કરશે. નવાઈની વાત એ હતી કે, આ બંને સિરીઝ માટે શુભમન ગિલને વાઇસ કેપ્ટનશિપ મળી હતી.

જો કે હાર્દિક પંડ્યાનું નામ T-20 કેપ્ટનશિપની રેસમાં સૌથી આગળ હતું, પરંતુ તે સૂર્યકુમારથી પાછળ રહી ગયો. T20માં વાઇસ કેપ્ટનની જવાબદારી પણ હાર્દિક પાસેથી છીનવી લેવામાં આવી હતી. એટલે કે હાર્દિક હવે ટીમમાં ખેલાડી તરીકે T-20માં રમશે. હાર્દિક પંડ્યા માટે 18મી જુલાઈ 2024ની તારીખ તેના અંગત જીવનમાં મહત્વની હતી. તેણે તે જ દિવસે તેની પત્ની નતાશા સ્ટેનકોવિક સાથે અલગ થવાનું નક્કી કર્યું.

હાર્દિક પંડ્યા આ સમયે મેદાનની અંદર અને બહાર ઘણા પડકારોનો સામનો કરી રહ્યો હોવા છતાં, તમે તેના ચહેરા પર જરાક પણ ચિંતા જેવું જોઈ શકતા નથી, જે તેણે સારી રીતે છુપાવી છે. તાજેતરની ઘટનાઓને કારણે તે ચર્ચાનો વિષય બન્યો હતો. પરંતુ તેની 'સ્પોર્ટ્સ એપેરલ બ્રાન્ડ'ના લોન્ચિંગ પ્રસંગે, તેણે તેની બધી લાગણીઓ છુપાવી અને ફિટનેસ પર લાંબી વાત કરી.

પંડ્યાએ કહ્યું, 'જ્યારે આપણું શરીર થાકતું નથી, ત્યારે આપણું દિમાગ થાકી જાય છે. તેથી જીવનમાં ઘણીવાર હું મારી સહન કરવાની મર્યાદાઓને આગળ ધપાવવા સક્ષમ હતો. એવું ત્યારે જ થયું જ્યારે મારું દિમાગ થાકી ગયું પણ હું મારા શરીરને આગળ વધવાનું કહેતો રહ્યો. જો તમે અને હું 20-20 વખત પ્રયાસો કરીએ છીએ, તો બંનેમાં કોઈ ફરક નથી, પરંતુ જો હું 25 પ્રયાસો કરીશ અને મારી જાતને પડકારીશ, તો આગલી વખતે હું 25 પ્રયાસો કરીશ, તો પછીની વખતે હું 30 પ્રયાસો કરીશ.'

30 વર્ષીય પંડ્યાએ કહ્યું, 'કેટલીકવાર તમારા દિમાગને વિચારો વગર રાખવું ખૂબ જ જરૂરી છે. જ્યારે મારો ટ્રેનર મને 10 પુશ અપ્સ કરવાનું કહે છે, ત્યારે હું હંમેશા 15 પુશ અપ્સ કરું છું. આનાથી મારી સહનશક્તિ વધી છે અને મને લાગે છે કે, ફિટનેસ પ્રવાસ શરૂ કરવા ઇચ્છતા દરેક વ્યક્તિએ આના પર ધ્યાન કેન્દ્રિત કરવું જોઈએ.'

તાજેતરમાં રમાયેલા T20 વર્લ્ડ કપમાં હાર્દિક પંડ્યાનું પ્રદર્શન જોરદાર રહ્યું હતું. તે તાજેતરમાં ઇન્ટરનેશનલ ક્રિકેટ કાઉન્સિલ (ICC) T20 રેન્કિંગમાં નંબર-1 ઓલરાઉન્ડર બન્યો હતો. તેણે હેનરિક ક્લાસેન અને ડેવિડ મિલરની મહત્વની વિકેટ લઈને T20 વર્લ્ડ કપની ફાઇનલમાં મેચનો પલટો કર્યો હતો. પંડ્યાએ T20 વર્લ્ડ કપની ફાઈનલ મેચમાં 20 રન આપીને 3 વિકેટ લીધી હતી. આ સ્ટાર ઓલરાઉન્ડરે T20 વર્લ્ડ કપ 2024ની 8 મેચમાં 144 રન બનાવ્યા હતા, જે દરમિયાન તેની એવરેજ 48 હતી. પંડ્યાએ 7.64ના ઇકોનોમી રેટથી બોલિંગ કરી અને આ 8 વર્લ્ડ કપ મેચોમાં 11 વિકેટ લીધી.

શ્રીલંકા પ્રવાસ માટે ભારતની T20 ટીમઃ સૂર્યકુમાર યાદવ (કેપ્ટન), શુભમન ગિલ (વાઈસ-કેપ્ટન), યશસ્વી જયસ્વાલ, રિંકુ સિંહ, રિયાન પરાગ, રીષભ પંત (વિકેટકીપર), સંજુ સેમસન (વિકેટકીપર), હાર્દિક પંડ્યા, શિવમ દુબે, અક્ષર પટેલ, વોશિંગ્ટન સુંદર, રવિ બિશ્નોઈ, અર્શદીપ સિંહ, ખલીલ અહેમદ અને મોહમ્મદ સિરાજ.

ભારતની ODI ટીમઃ રોહિત શર્મા (કેપ્ટન), શુભમન ગિલ (વાઈસ-કેપ્ટન), વિરાટ કોહલી, KL રાહુલ (વિકેટકીપર), રીષભ પંત (વિકેટકીપર), શ્રેયસ અય્યર, શિવમ દુબે, કુલદીપ યાદવ, મોહમ્મદ સિરાજ, વોશિંગ્ટન સુંદર, અર્શદીપ સિંહ, રિયાન પરાગ, અક્ષર પટેલ, ખલીલ અહેમદ અને હર્ષિત રાણા.

ભારત-શ્રીલંકા શ્રેણીનું શેડ્યૂલ: 27 જુલાઈ-1લી T20, પલ્લેકલે, 28 જુલાઈ-બીજી T20, પલ્લેકલે, 30 જુલાઈ-3જી T20, પલ્લેકલે, 2 ઓગસ્ટ-1લી ODI, કોલંબો, 4 ઓગસ્ટ-2જી ODI, કોલંબો, 7 ઓગસ્ટ-ત્રીજી ODI, કોલંબો.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.