જેસન ગિલેસ્પીએ પેટ કમિન્સ પર પૈસાના વરસાદ પર ઉઠાવ્યા સવાલ, કહ્યું- T20 તેનું...

ઓસ્ટ્રેલિયાના પૂર્વ ઝડપી બોલર જેસન ગિલેસ્પીએ ઈન્ડિયન પ્રીમિયર લીગ (IPL 2024)ની હરાજીમાં પેટ કમિન્સને મળેલી રકમ પર ઘણા સવાલો ઉઠાવ્યા છે. તે કહે છે કે પેટ કમિન્સનું ક્રિકેટના આ ફોર્મેટ એટલે કે T20માં શ્રેષ્ઠ પ્રદર્શન નથી. જો કે, જેસન ગિલેસ્પીએ મિશેલ સ્ટાર્કને રૂ. 24.75 કરોડની મોટી રકમમાં વેચવાનું સમર્થન કર્યું છે.

મંગળવારે 19 ડિસેમ્બરે દુબઈમાં IPL 2024 માટે ખેલાડીઓની હરાજી કરવામાં આવી હતી. આ દરમિયાન મુંબઈ ઈન્ડિયન્સ, રોયલ ચેલેન્જર્સ બેંગ્લોર, ચેન્નાઈ સુપર કિંગ્સ અને સનરાઈઝર્સ હૈદરાબાદ વચ્ચે બિડિંગ સ્પર્ધા જોવા મળી હતી. આ હરાજીમાં ઓસ્ટ્રેલિયાનો કેપ્ટન પેટ કમિન્સ બીજા નંબરનો સૌથી મોંઘો ખેલાડી હતો. સનરાઇઝર્સ હૈદરાબાદે તેને ખરીદવા માટે 20.50 કરોડ રૂપિયાનો ખર્ચ કર્યો હતો.

જેસન ગિલેસ્પીએ કહ્યું, 'પેટ કમિન્સ ચોક્કસપણે ખૂબ જ સારો બોલર છે અને એક ઉત્તમ કેપ્ટન પણ છે. અમે આ ઘણી વાર જોયું છે, પરંતુ મને નથી લાગતું કે T20 ક્રિકેટ તેમનું શ્રેષ્ઠ ફોર્મેટ છે. મને લાગે છે કે તે ટેસ્ટ ક્રિકેટમાં એક મહાન બોલર છે અને ટેસ્ટ ક્રિકેટ તેની આવકનો શ્રેષ્ઠ સ્ત્રોત છે.'

અહીં તમને જણાવી દઈએ કે, પેટ કમિન્સના વેચાણના થોડા સમય પછી તરત જ મિશેલ સ્ટાર્ક IPL ઈતિહાસનો સૌથી મોંઘો ખેલાડી બની ગયો હતો. KKRએ તેમને ખરીદ્યા. સ્ટાર્કે અત્યાર સુધી IPLની એક સિઝન રમી છે. આમાં તેણે 27 મેચમાં 34 વિકેટ ઝડપી છે.

મિશેલ સ્ટાર્ક વિશે ગિલેસ્પીએ કહ્યું, 'મને લાગે છે કે તે એક મહાન ખેલાડી છે. આ એક મોટી રકમ છે, આપણે બધા જાણીએ છીએ, પરંતુ IPL પણ એક મોટી ટુર્નામેન્ટ છે. હું મિશેલ સ્ટાર્ક માટે ખૂબ જ ખુશ છું. મને લાગે છે કે આ દર્શાવે છે કે ટીમ લેફ્ટ આર્મ ફાસ્ટ બોલિંગ અને લેફ્ટ આર્મ સ્વિંગ બોલિંગને કેટલું મહત્વ આપે છે.

અહીં તમને જણાવી દઈએ કે, આ પહેલીવાર નથી જ્યારે પેટ કમિન્સને IPLની હરાજીમાં આટલી મોટી રકમ મળી હોય. અગાઉ 2020 IPLમાં તેને કોલકાતા નાઈટ રાઈડર્સે 15.5 કરોડ રૂપિયામાં ખરીદ્યો હતો.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.