KKRએ ફાઇનલમાં સનરાઇઝર્સ હૈદરાબાદને હરાવીને IPL 2024નું ટાઇટલ જીત્યું. KKRએ ત્રીજી વખત આ ખિતાબની લડાઈ જીતી છે. આ ખિતાબ જીતવા માટે KKRને 20 કરોડ રૂપિયા જ્યારે રનર અપ ટીમ સનરાઈઝર્સ હૈદરાબાદને 12.5 કરોડ રૂપિયા મળ્યા હતા. એવું માનવામાં આવે છે કે, IPL 2024માં કુલ 46.5 કરોડ રૂપિયાની રકમ વહેંચવામાં આવી હતી. ભૂતપૂર્વ ચેમ્પિયન અને ટૂર્નામેન્ટમાં ત્રીજા સ્થાને રહેલી રાજસ્થાન રોયલ્સને રૂ. 7 કરોડ જ્યારે ચોથા સ્થાને રહેલી રોયલ ચેલેન્જર્સ બેંગ્લોરને રૂ. 6.5 કરોડ મળ્યા હતા. આ ઉપરાંત સમગ્ર ટીમને અનેક પ્રકારના પુરસ્કારોનું વિતરણ કરવામાં આવ્યું હતું. ચાલો આજે જાણી લઈએ કે આ IPLમાં પોતાની કાબેલિયતથી કોણે કેટલા પૈસાની કમાણી કરી છે. આ પૈસા ખેલાડીઓને તેમનો પગાર મળ્યો તે ઉપરાંત આપવામાં આવ્યા છે.
15 કરોડનો વિરાટ કોહલી સમગ્ર IPL ટૂર્નામેન્ટમાં સૌથી વધુ રન બનાવીને ઓરેન્જ કેપનો ખિતાબ જીતવામાં સફળ રહ્યો હતો. આ માટે તેને 10 લાખ રૂપિયા મળ્યા હતા. કોહલીએ આ સમગ્ર સિઝનમાં શાનદાર બેટિંગ કરી અને કુલ 15 મેચમાં 741 રન બનાવ્યા. તેણે 61.75ની એવરેજથી આ રન બનાવ્યા, જેમાં એક સદી અને 5 અડધી સદી સામેલ છે. તેનો સર્વોચ્ચ સ્કોર અણનમ 113 રન હતો. જો વિરાટ કોહલીને મળેલી 10 લાખની રકમને તેણે બનાવેલા 741 રનથી ભાગવામાં આવે તો તેણે પ્રતિ રન લગભગ 1350 રૂપિયાની કમાણી કરી હતી.
પંજાબ કિંગ્સના બોલર હર્ષલ પટેલે સૌથી વધુ વિકેટ લઈને પર્પલ કેપનો ખિતાબ જીત્યો હતો. પટેલે આ સમગ્ર સિઝનમાં શાનદાર બોલિંગ કરી હતી અને 14 મેચમાં 24 વિકેટ લેવામાં સફળ રહ્યો હતો. આ માટે તેને 10 લાખ રૂપિયા મળ્યા હતા. જો તેની રકમને 24 વડે ભાગવામાં આવે તો તેણે લીધેલી દરેક વિકેટ માટે 42 હજાર રૂપિયાની કમાણી થઈ હતી.
સનરાઇઝર્સ હૈદરાબાદના સ્ટાર ખેલાડી અભિષેક શર્માએ આખી IPL ટૂર્નામેન્ટમાં સૌથી વધુ સિક્સ ફટકારી છે. તેણે 42 સિક્સર ફટકારી, જેના માટે તેને 10 લાખ રૂપિયા મળ્યા. આ હિસાબે તેના એક સિક્સની કિંમત લગભગ 24 હજાર રૂપિયા હતી. તેણે આખી ટુર્નામેન્ટમાં 202.212ના સ્ટ્રાઈક રેટથી 484 રન બનાવ્યા, જેમાં આ 42 સિક્સરનો સમાવેશ થાય છે. તેના પછી હૈદરાબાદ ટીમના હેનરિક ક્લાસેન અને વિરાટ કોહલીએ 38-38 સિક્સ ફટકારી હતી.
સનરાઇઝર્સ હૈદરાબાદના અન્ય ખેલાડી, ટ્રેવિસ હેડ, સમગ્ર ટુર્નામેન્ટ દરમિયાન સૌથી વધુ ચોગ્ગાનો રેકોર્ડ ધરાવે છે. તેણે 64 બાઉન્ડ્રી ફટકારી હતી. તેને 10 લાખ રૂપિયાનું રોકડ ઇનામ મળ્યું. આ હિસાબે તેના દરેક ચોગ્ગાની કિંમત 15,625 રૂપિયા થાય છે. તેની પાછળ વિરાટ કોહલી હતો, જેણે 62 ચોગ્ગા ફટકાર્યા હતા.
IPL 2024ની આખી સિઝનમાં સર્વશ્રેષ્ઠ કેચ KKRના ખેલાડી રમનદીપ સિંહે લીધો હતો. તેણે આ કેચ ત્યારે લીધો જ્યારે લખનઉ સુપર જાયન્ટ્સ સાથે KKRની મેચ ચાલી રહી હતી. રમનદીપ સિંહે આ અદ્ભુત કેચ લઈને લખનઉના અરશિન કુલકર્ણીને પેવેલિયન પરત ફરવા મજબૂર કર્યો હતો. રમણદીપે 21 મીટર દોડ્યા પછી આ કેચ લીધો હતો. રમણદીપની ટીમ KKR આ મેચ જીતી હતી. તેને સુપરમેન પણ કહેવામાં આવતો હતો.
દિલ્હી કેપિટલ્સના ખેલાડી જેક ફ્રેઝર-મેકગર્કનો સમગ્ર IPL 2024 સીઝન દરમિયાન સૌથી વધુ સ્ટ્રાઈક રેટ હતો. તેનો સ્ટ્રાઈક રેટ 234.04 રહ્યો છે. આનાથી તે સિઝનનો ઇલેક્ટ્રિક સ્ટ્રાઈકર બન્યો. આ 22 વર્ષના સ્ટ્રાઈકરે 9 મેચમાં 330 રન બનાવ્યા છે.
ઈન્ડિયા સ્પોર્ટ્સ સ્પોન્સરશિપના રિપોર્ટ અનુસાર, 2008માં IPLની શરૂઆતથી અત્યાર સુધીમાં IPL ઈન્ડસ્ટ્રી 8 ગણી વધી છે. 2008માં IPLની શરૂઆત થઈ ત્યારે આ ઈન્ડસ્ટ્રીની કિંમત 2,423 કરોડ રૂપિયા હતી, જે 2023માં વધીને 15,766 કરોડ થઈ ગઈ છે. પ્રથમ વખત આ ઉદ્યોગ રૂ. 15,000 કરોડને પાર કરી ગયો છે.
ભારતીય ક્રિકેટ કંટ્રોલ બોર્ડ (BCCI)એ 2022માં ઈન્ડિયન પ્રીમિયર લીગ એટલે કે IPLમાંથી રૂ. 2400 કરોડથી વધુની કમાણી કરી હતી. 2022માં જ, BCCIએ 2023 થી 2027 સુધીની તમામ IPL ટૂર્નામેન્ટના પ્રસારણ અને ડિજિટલ સ્ટ્રીમિંગ અધિકારો ડિઝની અને વાયાકોમ જેવી અમેરિકન કંપનીઓને રૂ. 51,547 કરોડમાં વેચ્યા હતા, જે નોંધપાત્ર આવકનો સ્ત્રોત બની છે. આ આંકડા BCCIએ પોતાની વેબસાઈટ પર જ જાહેર કર્યા છે. એવો અંદાજ છે કે, આ વખતે પણ BCCIએ આનાથી પણ વધુ કમાણી કરી હશે.
