ભારતને મેડલ અપાવનાર મનુએ કહ્યું- હું ભગવાન શ્રી કૃષ્ણની ભક્ત છું તેમણે કહેલું...

10 મીટર એર પિસ્ટોલ સ્પર્ધામાં મનુ ભાકરે ભારતને પેરિસ ઓલિમ્પિકમાં પહેલું મેડલ અપાવી દીધું છે. આ મેડલ જીત્યા બાદ મનુ ભાકરે કહ્યું હતું કે, હું ભગવાન શ્રીકૃષ્ણની ભક્ત છું અને છેલ્લી પળોમાં મેં તેમની વાતોને ધ્યાનમાં રાખીને મેડલ પર નિશાન સાધ્યું હતું. હું રોજ ગીતા વાચું છું. સાથે જ કર્મ કરવા પર ખૂબ વિશ્વાસ રાખું છું. હું ભવિષ્ય વિશે વધુ નથી વિચારતી.

તેણે કહ્યું હું ફક્ત મારું બેસ્ટ પ્રદર્શન કરવા પર ધ્યાન આપું છું. હું મારા ભાગ્યને તો કંટ્રોલ નથી કરી શકતી. ગીતામાં ભગવાન શ્રીકૃષ્ણએ અર્જુનને ફક્ત પોતાના કામ કરવા પર ફોકસ રાખવાનું કહ્યું હતું. એ જ બધું મારા મગજમાં પણ ચાલી રહ્યું હતું. મને ભગવદ ગીતામાંથી ધૈર્ય રાખવાની ક્ષમતા મળી છે.

કોણ છે મનુ ભાકર જેણે પેરિસમાં ઈતિહાસ રચ્યો, આવું કરનાર પ્રથમ ભારતીય મહિલા

ભારતીય મહિલા શૂટર મનુ ભાકરે ઓલિમ્પિક ગેમ્સમાં ઈતિહાસ રચ્યો છે. 22 વર્ષની મનુએ પેરિસ ઓલિમ્પિક ગેમ્સ 2024માં ભારતને પહેલો મેડલ અપાવ્યો છે. મહિલા શૂટર મનુ ભાકરે રવિવારે 28 જુલાઈના રોજ બીજા દિવસે મહિલાઓની 10 મીટર એર પિસ્તોલની ફાઇનલમાં શાનદાર પ્રદર્શન કરીને બ્રોન્ઝ મેડલ જીત્યો હતો. દક્ષિણ કોરિયાના યે જિન ઓહે 243.2 પોઈન્ટના ઓલિમ્પિક રેકોર્ડ ફાઈનલ સ્કોર સાથે ગોલ્ડ મેડલ જીત્યો હતો. દક્ષિણ કોરિયાના યેજી કિમે 241.3 પોઈન્ટ સાથે સિલ્વર મેડલ જીત્યો હતો.

મનુ 0.1 પોઈન્ટથી સિલ્વર મેડલ જીતવામાં ચૂકી ગઈ. પરંતુ તે ઓલિમ્પિક ઈતિહાસમાં મેડલ જીતનારી ભારતની પ્રથમ મહિલા શૂટર બની ગઈ છે. મનુએ 221.7ના સ્કોર સાથે બ્રોન્ઝ મેડલ જીત્યો હતો. છોકરીઓએ સતત ત્રીજી ઓલિમ્પિકમાં ભારત માટે મેડલ જીતવાની શરૂઆત કરી છે.

આ સાથે જ છેલ્લા 12 વર્ષથી ચાલી રહેલી ઓલિમ્પિક ગેમ્સમાં ભારતનો શૂટિંગનો દુષ્કાળ પણ ખતમ થઈ ગયો છે. લંડન ઓલિમ્પિક 2012 પછી શૂટિંગમાં ભારતનો આ પહેલો ઓલિમ્પિક મેડલ છે. રિયો ઓલિમ્પિક 2016 અને ટોક્યો ઓલિમ્પિકમાંથી ભારતીય શૂટર્સ ખાલી હાથે પરત ફર્યા હતા.

ભાકર મહિલાઓની 10 મીટર એર પિસ્તોલની ફાઇનલમાં પહોંચનારી પ્રથમ ભારતીય બની હતી. મનુએ 600માંથી 580 પોઈન્ટ મેળવ્યા અને 45 શૂટર્સમાં ત્રીજા સ્થાને રહીને ફાઇનલમાં ક્વોલિફાય થઈ. મનુએ ચાંગવાનમાં એશિયન શૂટિંગ ચેમ્પિયનશિપ 2023માં મહિલાઓની 25 મીટર પિસ્તોલ સ્પર્ધામાં પાંચમું સ્થાન મેળવ્યું અને ભારત માટે પેરિસ 2024 ઓલિમ્પિક ક્વોટા મેળવ્યો.

મનુએ 14 વર્ષની ઉંમરે શૂટિંગમાં કરિયર બનાવવાનો નિર્ણય લીધો હતો અને તે સમયે રિયો ઓલિમ્પિક 2016 પૂરો થયો હતો. આના એક અઠવાડિયામાં તેણે તેના પિતાને શૂટિંગ પિસ્તોલ લાવવા કહ્યું. હંમેશા તેનો ઉત્સાહ વધારતા તેના પિતા રામ કિશન ભાકરે તેને બંદૂક ખરીદી આપી હતી અને તે એક એવો નિર્ણય હતો, કે જેણે એક દિવસ મનુ ભાકરને ઓલિમ્પિયન બનાવી દીધી હતી.

2017ની નેશનલ શૂટિંગ ચેમ્પિયનશિપમાં, મનુ ભાકરે ઓલિમ્પિયન અને ભૂતપૂર્વ વર્લ્ડ નંબર-1 હીના સિદ્ધુને ચકિત કર્યા અને 242.3ના સ્કોર સાથે નવો રેકોર્ડ બનાવ્યો. આ કારણે તેણે 10 મીટર એર પિસ્તોલની ફાઇનલમાં હીનાને હરાવી હતી. તેણે 2017ની એશિયન જુનિયર ચેમ્પિયનશિપમાં સિલ્વર મેડલ જીત્યો અને પછીના વર્ષે મનુ ભાકરે બતાવી દીધું કે તે એક ખાસ ખેલાડી છે.

માત્ર 16 વર્ષની ઉંમરે, તે ISSF વર્લ્ડ કપમાં ગોલ્ડ મેડલ જીતનારી સૌથી નાની ઉંમરની યુવા ભારતીય બની હતી. આ સિવાય તેણે તેના પાર્ટનર ઓમ પ્રકાશ મિથરવલ સાથે મિક્સ ડબલ્સમાં ગોલ્ડ જીતવાનું લક્ષ્ય રાખ્યું હતું. મનુએ ઓસ્ટ્રેલિયાના ગોલ્ડ કોસ્ટમાં 2018 કોમનવેલ્થ ગેમ્સમાં ફરી એક નવો રેકોર્ડ બનાવ્યો અને મહિલાઓની 10 મીટર એર પિસ્તોલમાં ગોલ્ડ મેડલ જીત્યો હતો.

મનુ ભાકરનું ટોક્યો ઓલિમ્પિક અભિયાન 25 મીટર પિસ્તોલ સાથે સમાપ્ત થયું, જેમાં તે ફાઇનલમાં સ્થાન મેળવવાથી ચૂકી ગઈ. ટોક્યો 2020 પછી, મનુ ભાકર લિમામાં મહિલાઓની 10 મીટર એર પિસ્તોલમાં જુનિયર વર્લ્ડ ચેમ્પિયન બની અને ત્યારથી તે સતત જુનિયર સર્કિટ પર મેડલ જીતી રહી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.