વર્લ્ડ કપ ટીમમાં સ્થાન ન મળતા છલકાયું ચહલનું દર્દ- હવે તો આદત પડી ગઈ છે...
![](https://khabarchhe.com/uploads/mc_path/1696146290Yuzvendra-Chahal.jpg)
ભારતીય લેગ સ્પિનર યુઝવેન્દ્ર ચહલ ફરી એકવાર અલગ પડી ચુક્યો છે. 5 ઓક્ટોબરથી શરૂ થઈ રહેલા વર્લ્ડ કપમાં તેને ભારતીય ટીમમાં જગ્યા મળી નથી. વર્તમાન સમયમાં વિશ્વના સર્વશ્રેષ્ઠ લેગ સ્પિનરોમાંથી એક ચહલ કદાચ આ આંચકા માટે માનસિક રીતે તૈયાર હતો. જો કે, આ કંઈ પહેલીવાર નથી જ્યારે તેને આ રીતે મોટી ટુર્નામેન્ટમાંથી બહાર રાખવામાં આવ્યો હોય. આ પહેલા 2021માં UAEમાં રમાયેલા T20 વર્લ્ડ કપમાં પણ તેને ટીમમાં જગ્યા મળી ન હતી અને તેના પછીના વર્ષે એટલે કે 2022 T20 વર્લ્ડ કપમાં સિલેક્શન થવા છતાં તેને ઈલેવનમાં રમવા માટે પણ લાયક માનવામાં ન આવ્યો.
ક્રિકેટના પ્રતિષ્ઠિત મેગેઝિન વિઝડન સાથે વાત કરતા યુઝવેન્દ્ર ચહલનું દર્દ આખરે છલકાઈ જ ગયું. આ 33 વર્ષીય ક્રિકેટરનું કહેવું છે કે, હવે તેને ટીમમાંથી બહાર રહેવાની આદત પડી ગઈ છે. આ તેમના જીવનનો એક ભાગ બની ગયો છે. ભારતીય ટીમ દ્વારા અવગણવામાં આવ્યા પછી ઈંગ્લેન્ડમાં કાઉન્ટી ક્રિકેટ રમી રહેલા ચહલે કહ્યું, 'હું સમજું છું કે માત્ર 15 ખેલાડીઓની પસંદગી થઈ શકે છે. આ વર્લ્ડ કપ છે, જ્યાં તમે 17 કે 18 ખેલાડીઓને લઈ શકતા નથી. મને પણ ખરાબ લાગે છે, પરંતુ જીવનમાં મારું લક્ષ્ય આગળ વધતા રહેવાનું છે.'
ચહલ, જે હરિયાણા માટે સ્થાનિક ક્રિકેટ રમે છે અને ઇન્ડિયન પ્રીમિયર લીગમાં રાજસ્થાન રોયલ્સનો ભાગ છે, કહે છે કે, તે ઘરે બેસવા માંગતો ન હતો તેથી કાઉન્ટી રમવા માટે ભારત છોડી ગયો. ચહલના કહેવા પ્રમાણે, 'મને અહીં લાલ બોલથી તક મળી રહી છે. હું ભારતમાં પણ રેડ બોલ ફોર્મેટમાં રમવા માંગુ છું, તેથી આ મારા માટે સારો અનુભવ સાબિત થઈ રહ્યો છે.'
વર્લ્ડ કપ માટે ભારતીય ટીમમાં ત્રણ સ્પિનરોની પસંદગી કરવામાં આવી છે. રવિન્દ્ર જાડેજા, કુલદીપ યાદવ અને રવિચંદ્રન અશ્વિન. અગાઉ અક્ષર પટેલ આ ટીમનો ભાગ હતો, પરંતુ ઈજાગ્રસ્ત થયા બાદ છેલ્લી ઘડીએ અનુભવી અશ્વિન તેની જગ્યાએ સામેલ થયો હતો. જાડેજા ભારતીય ધરતી પર પોતાની બોલિંગ સ્ટાઈલથી ખતરનાક સાબિત થશે અને સાથે જ બેટિંગમાં પણ પોતાની તાકાત બતાવશે. અશ્વિનની બેટિંગ ક્ષમતા પર કોઈને શંકા નથી. કુલદીપ યાદવ ચાઈનામેન સ્ટાઈલથી પોતાના વિરોધીઓને ઘૂંટણિયે પાડવા માટે સંપૂર્ણ રીતે તૈયાર છે.
ચહલે તેની કાઉન્ટી આઉટિંગ વિશે વાત કરતા કહ્યું કે, તે ઈંગ્લેન્ડમાં ટોચના સ્તરની ક્રિકેટ રમીને ખુશ છે અને ઉમેર્યું કે તે ભારત માટે ટેસ્ટ ક્રિકેટ રમવા માંગે છે. ચહલે કહ્યું, 'મેં કોચ સાથે પણ વાત કરી હતી, અને તેઓ ખુશ છે કે, હું ક્યાંક તો રમી રહ્યો છું, કારણ કે તમે નેટમાં ગમે તેટલી પ્રેક્ટિસ કરી શકો છો, પરંતુ મેચ એક મેચ છે. મને અહીં ખૂબ જ સારા સ્તરે ફર્સ્ટ ક્લાસ, કાઉન્ટી મેચ રમવાની તક મળી રહી છે. અહીં ઘણું શીખવાનું મળે છે.'
નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.
તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.
ગુજરાતનું અગ્રેસર ન્યૂઝ પોર્ટલ, અહીં વાત થાય છે માત્ર ગુજરાત અને ગુજરાતનાં હિતની... Download Khabarchhe APP www.khabarchhe.com/downloadApp