Notifications

Favourite List

ભારત-પાકિસ્તાન મેચ પહેલા ન્યૂયોર્કની પીચ પર બબાલ, શું થયું જાણો આખો મામલો

06 Jun, 2024
07:04 PM
PC: BCCI

તારીખ 5 જૂન 2024, જગ્યા નાસાઉ ક્રિકેટ કાઉન્ટી ઇન્ટરનેશનલ સ્ટેડિયમ, ન્યુ યોર્ક... અહીં ભારતે T20 વર્લ્ડ કપ 2024ની પ્રથમ મેચ રમી હતી. પરંતુ ન્યૂયોર્કના આ સ્ટેડિયમમાં હવે ડ્રોપ ઈન પિચ ટેન્શન બની ગઈ છે. આયર્લેન્ડ સાથેની મેચમાં ભારતીય ટીમને 'અનિયમિત ઉછાળ' જોવો પડ્યો હતો. આવી સ્થિતિમાં સવાલ એ છે કે, જો આયર્લેન્ડ સામેની પીચની આ હાલત છે તો 9 જૂને પાકિસ્તાન સામેની મેચમાં શું થશે?

હકીકતમાં, T20 વર્લ્ડ કપની પ્રથમ મેચ પહેલા, નાસાઉ કાઉન્ટીમાં ખુલ્લી તિરાડો સાથે ખતરનાક પીચ દરેક માટે ચિંતાનું કારણ બની ગઈ છે. ઈંગ્લેન્ડના પૂર્વ કેપ્ટન માઈકલ વોન અને ભારતીય દિગ્ગજ ઈરફાન પઠાણ સહિત ઘણા દિગ્ગજોએ ન્યૂયોર્કની પિચ પર સવાલ ઉઠાવ્યા છે. આ દિગ્ગજોએ પૂછ્યું કે, શા માટે આ પીચ પર વર્લ્ડ કપ મેચ યોજતા પહેલા કેટલીક પ્રેક્ટિસ મેચો ન રમાડાઈ.

આયર્લેન્ડ સામેની મેચ દરમિયાન રોહિત શર્માને ફાસ્ટ બોલર જોશ લિટલનો બોલ તેના જમણા હાથના ઉપરના ભાગે વાગ્યો હતો. આ કારણોસર તેને મેદાન છોડવું પડ્યું હતું. રિષભ પંતને પણ ડાબી કોણીમાં બાઉન્સર વાગ્યો હતો.

BCCIના એક સૂત્રએ કહ્યું, 'રોહિતની ઈજા ગંભીર નથી. તેણે પોતે કહ્યું છે કે, તે એક નાનકડી ઇજા છે. પાકિસ્તાન સામેની મેચ સુધી તે ઠીક થઇ જશે.' આયર્લેન્ડના હેરી ટેક્ટરને જસપ્રિત બુમરાહનો બોલ તેના ગ્લોવ્ઝમાંથી પસાર થઈને તેના હેલ્મેટ સાથે અથડાયો હતો જેના કારણે તેને કન્સશન ટેસ્ટ કરાવવો પડ્યો હતો.

ઇન્ટરનેશનલ ક્રિકેટ કાઉન્સિલ (ICC)એ કહ્યું હતું કે T20 વર્લ્ડ કપ માટે તૈયાર કરવામાં આવેલી ડ્રોપ-ઇન પિચો સેમી-ટ્રેલર ટ્રકમાં ફ્લોરિડાથી ન્યૂયોર્ક લાવવામાં આવી હતી, જ્યાં તેને નાસાઉ કાઉન્ટી ઇન્ટરનેશનલ ક્રિકેટ સ્ટેડિયમમાં સ્થાપિત કરવામાં આવી હતી. ભારતને આ સ્ટેડિયમમાં વધુ બે મેચ રમવાની છે.

અહેવાલો અનુસાર, ICC અધિકારીઓએ કહ્યું છે કે, ન્યૂયોર્કથી ફ્લોરિડા અથવા ટેક્સાસમાં કોઈપણ મેચને સ્થાનાંતરિત કરવાની કોઈ આકસ્મિક યોજના નથી, આ બંને સ્થળોએ કુદરતી પીચો છે.

ભારતના 2007 T20 વર્લ્ડ કપ ટાઇટલ જીતવાની ફાઇનલમાં 'પ્લેયર ઓફ ધ મેચ' રહેલા ઇરફાન પઠાણે ન્યૂયોર્કની પિચને અસુરક્ષિત ગણાવી છે. તેણે કહ્યું, 'અમે અમેરિકામાં ક્રિકેટને પ્રોત્સાહન આપવા માંગીએ છીએ, પરંતુ આ પીચ ખેલાડીઓ માટે સુરક્ષિત નથી. જો ભારતમાં આવી પીચ હોત તો લાંબા સમય સુધી ત્યાં ફરી મેચ રમાઈ ન હોત, આ પીચ સારી નથી. અમે વિશ્વ કપની વાત કરી રહ્યા છીએ, કોઈ દ્વિપક્ષીય શ્રેણીની નહીં.'

જ્યારે, ઇંગ્લેન્ડના ભૂતપૂર્વ કેપ્ટન માઇકલ વોને કહ્યું, 'અમેરિકામાં ક્રિકેટ આવવું સારી બાબત છે. પરંતુ આ માટે ખેલાડીઓને આ પ્રકારની પીચ પર રમવાનું અસ્વીકાર્ય છે. તમે વર્લ્ડ કપ રમવા માટે સખત મહેનત કરો છો અને પછી તમારે આવી પીચ પર રમવું પડે છે.'

ભારતના બેટિંગ કોચ વિક્રમ રાઠોડે કહ્યું કે, ભારત પાસે આનો સામનો કરવા માટે પૂરતો અનુભવ અને કૌશલ્ય છે. રાઠોડે કહ્યું, 'અમારા કંટ્રોલમાં હોય તે જ અમે નિયંત્રિત કરી શકીએ. આ એક પડકારજનક વિકેટ છે અને અમે એવી જ અપેક્ષા રાખી હતી, કારણ કે અમે અહીં પ્રેક્ટિસ મેચ રમી હતી.' તેમણે વધુમાં કહ્યું, 'આપણે આનો સામનો કરવાનો રસ્તો શોધવો પડશે. ટીમમાં કૌશલ્યની કોઈ કમી નથી અને પૂરતો અનુભવ પણ છે. અમને કોઈ સમસ્યા નહીં થાય.'

ભારતીય ટીમ મેનેજમેન્ટ કોઈ ઔપચારિક ફરિયાદ કરવા જઈ રહ્યું નથી, પરંતુ પિચને લઈને નારાજગી સ્વાભાવિક છે. સ્થાનિક સૂત્રએ કહ્યું કે, 'આ એક તાજી પીચ છે. તેના પર ઘાસ છે, પરંતુ મોટી મોટી તિરાડો પણ છે. આ પ્રકારની પીચ પર પહેલા કેટલીક પ્રેક્ટિસ મેચો થવી જોઈતી હતી. આ T-20 વિકેટ નથી અને ચારેય પિચો આવી છે.'

ભારતીય કપ્તાન રોહિત શર્મા નાસાઉ કાઉન્ટી સ્ટેડિયમમાં પિચના 'ડ્રોપ ઇન' અસમાન ઉછાળથી ખુશ ન હતા, જેના પર તેને 9 જૂને પાકિસ્તાન સામે T20 વર્લ્ડ કપની નિર્ણાયક મેચ પહેલા આયર્લેન્ડ સામેની પ્રથમ મેચમાં હાથમાં ઈજા થઈ હતી.

તેણે કહ્યું, 'નવું મેદાન, નવું સ્થળ અને અમે જોવા માગીએ છીએ કે, અહીં રમવું કેવું લાગે છે, મને લાગે છે કે પિચ હજી સ્થાયી નથી અને બોલરોને ઘણી મદદ કરી રહી છે, તેથી તમારી મૂળભૂત બાબતોને વળગી રહેવું અને ટેસ્ટ મેચ બોલિંગને યાદ રાખવું મહત્વપૂર્ણ હતું.'

આ મેચની તૈયારી અંગે રોહિતે કહ્યું, 'મને ખબર નથી કે પિચમાંથી શું અપેક્ષા રાખવી, પરંતુ અમે એ વિચારીને તૈયારી કરીશું કે, પિચ આવી જ હશે, આખી ટીમે તે મેચમાં સારું પ્રદર્શન કરવું પડશે. આશા છે કે, આજની જેમ તે મેચમાં પણ પ્રદર્શન સારું રહેશે.

ન્યૂયોર્કના આ જ સ્ટેડિયમમાં 9 જૂન (રવિવાર)ના રોજ ભારત-પાકિસ્તાનની મેચ પણ રમાવાની છે. ભારતીય ટીમ પાસે માત્ર સ્ટાર ફાસ્ટ બોલરોની ફોજ નથી, પાકિસ્તાની ટીમ પાસે પણ શાનદાર ફાસ્ટ બોલરો છે. પાકિસ્તાનની ટીમમાં મોહમ્મદ આમિર, શાહીન આફ્રિદી, નસીમ શાહ અને હરિસ રઉફ જેવા ફાસ્ટ બોલર છે. આવી સ્થિતિમાં ભારતીય બેટ્સમેનોએ સાવધાન રહેવું પડશે.

ઓસ્ટ્રેલિયામાં ડ્રોપ-ઇન પિચોનું કલ્ચર સૌથી વધુ રહ્યું છે. અગાઉ આવી તૈયાર પીચોનો ઉપયોગ કરવામાં આવતો હતો, જેથી ક્રિકેટ મેદાનનો ઉપયોગ અન્ય ઈવેન્ટ્સ માટે પણ થઈ શકે. આ મેદાનો પર મ્યુઝિક કોન્સર્ટ, રગ્બી અને ફૂટબોલ મેચ પણ યોજવામાં આવી છે. જ્યારે કેરી પેકરે 1970માં વર્લ્ડ સિરીઝ ક્રિકેટની શરૂઆત કરી, ત્યારે આવી ડ્રોપ-ઇન પિચોનો ઉપયોગ કરવામાં આવ્યો હતો. ઓસ્ટ્રેલિયામાં શિયાળાની મોસમમાં જ્યાં ફૂટબોલ મેચો યોજાય છે, તે મેદાન પર ક્રિકેટની સિઝન દરમિયાન ડ્રોપ-ઇન પીચોનો ઉપયોગ કરવામાં આવે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.

ગુજરાતનું અગ્રેસર ન્યૂઝ પોર્ટલ, અહીં વાત થાય છે માત્ર ગુજરાત અને ગુજરાતનાં હિતની... Download Khabarchhe APP www.khabarchhe.com/downloadApp