ટીમ ઈન્ડિયાના સીતા-ગીતા, ઈશાન અને શુભમન એકલા રહી શકતા નથી, કોહલીએ ખોલ્યા રહસ્યો

ભારતીય ક્રિકેટ ટીમ અને રોયલ ચેલેન્જર્સ બેંગ્લોરના સ્ટાર બેટ્સમેન વિરાટ કોહલીનું બેટ આ સિઝનમાં ઘણા રન બનાવી રહ્યું છે. અત્યાર સુધી તેણે માત્ર 4 મેચમાં 316 રન બનાવ્યા છે. આ સમયગાળા દરમિયાન તેણે બે અડધી સદી અને એક સદી પણ રમી છે. કોહલીએ એક ઈન્ટરવ્યુમાં પોતાના શરૂઆતના દિવસોને યાદ કર્યા, જ્યારે સોશિયલ મીડિયાનો એટલો પ્રભાવ નહોતો અને ચાહકો તમને દરેક જગ્યાએ ઘેરી લેતા ન હતા. કોહલીએ શુભમન ગિલ અને ઈશાન કિશનને લઈને પણ મોટું નિવેદન આપ્યું છે.

રમતગમતની દુનિયામાં કે સામાન્ય જીવનમાં પણ બે છોકરાઓ વચ્ચેની મિત્રતાને ઘણીવાર જય-વીરુનું નામ આપવામાં આવે છે, પરંતુ વિરાટ કોહલીએ ઈશાન કિશન અને શુભમન ગિલની જોડીને સીતા-ગીતા કહી હતી. હકીકતમાં શુભમન ગિલ અને ઈશાન કિશન અંડર-19 ક્રિકેટના દિવસોથી એકબીજાના ખાસ મિત્રો છે. હવે બંને સિનિયર ટીમમાં પણ સાથે રમે છે. ક્રિકેટ મેચ દરમિયાન પણ બંને ઘણી વખત એકબીજાની મજાક ઉડાવતા જોવા મળ્યા છે અને સાંભળ્યા છે. આવી સ્થિતિમાં જ્યારે પૂર્વ કેપ્ટન અને સિનિયર ખેલાડી વિરાટ કોહલીને તેમની મિત્રતા વિશે પૂછવામાં આવ્યું તો, વિરાટ કોહલીએ મજાકિયા જવાબ આપ્યો.

એક ઈવેન્ટ દરમિયાન વિરાટ કોહલીએ કહ્યું, 'આ લોકો એકલા રહી શકતા નથી. બંનેને એકબીજાથી અલગ કરવા મુશ્કેલ છે, કારણ કે બંને એકબીજાની કંપનીનો આનંદ માણે છે. પછી તે રાત્રિભોજનનો સમય હોય કે ટીમ મીટિંગ. સોશિયલ મીડિયા પર વાયરલ થયેલા વીડિયોમાં વિરાટ કહે છે, 'સીતા અને ગીતા ખૂબ જ ફની છે. મને પણ ખબર નથી કે શું થઈ રહ્યું છે. વધારે તો હું કંઈ નથી કહી શકતો, પરંતુ આ લોકો પ્રવાસમાં એકલા ન રહી શકે. જો અમે લોકો બહાર જમવા જઈએ તો તેઓ સાથે આવશે. મેં તેમને ક્યારેય એકલા જોયા નથી.'

Virat 😭😭
Sita geeta ~ ishan and shubman
pic.twitter.com/3h3bam38NR

— khushi (@vc975625) April 11, 2024

શુભમન ગિલ અને ઈશાન કિશન બંને IPL 2024માં તાકાત બતાવી રહ્યા છે. હાર્દિક પંડ્યા બહાર થયા પછી ગિલ ગુજરાત ટાઇટન્સનું સુકાન સંભાળી રહ્યો છે ત્યારે BCCIના સેન્ટ્રલ કોન્ટ્રાક્ટમાંથી બહાર થયા પછી ઇશાન કિશન મુંબઇ ઇન્ડિયન્સ માટે પૂરું જોર લગાવી દેવામાં લાગ્યો છે, પરંતુ અત્યાર સુધી તેણે ચાર મેચમાં માત્ર 92 રન જ બનાવ્યા છે. જ્યારે શુભમન ગીલે સતત બે હાફ સેન્ચુરી બનાવી છે. આવી સ્થિતિમાં હવે ઈશાન કિશનને 2 જૂનથી શરૂ થઈ રહેલા T-20 વર્લ્ડ કપ માટે ભારતીય ટીમમાં જગ્યા બનાવવા માટે ચમત્કાર જ કરવો પડશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.