ઓસ્ટ્રેલિયામાં પાકિસ્તાન ટીમની બેઇજ્જતી.... ડૉક્ટરને વીઝા જ નથી મળ્યા એના વગર...

ભારતમાં આયોજિત ક્રિકેટ વર્લ્ડ કપ 2023માં પાકિસ્તાનની ટીમનું પ્રદર્શન ખાસ રહ્યું ન હતું અને તે સેમીફાઈનલમાં પણ પહોંચી શકી ન હતી. ખરાબ પ્રદર્શન પછી બાબર આઝમે ત્રણેય ફોર્મેટની કેપ્ટનશીપ છોડી દીધી હતી. આ પછી શાન મસૂદને ટેસ્ટ ટીમની બાગડોર અને ફાસ્ટ બોલર શાહીન આફ્રિદીને T20 ટીમની બાગડોર સોંપવામાં આવી હતી.

હવે પાકિસ્તાની ટીમ વર્લ્ડ કપની કડવી યાદોને ભૂલીને ઓસ્ટ્રેલિયાના પ્રવાસે ગઈ છે, જ્યાં તેને યજમાન ટીમ સામે ત્રણ મેચની ટેસ્ટ શ્રેણી રમવાની છે. હવે પાકિસ્તાનના ઓસ્ટ્રેલિયા પ્રવાસને લઈને એક મોટા સમાચાર સામે આવ્યા છે. રિપોર્ટ અનુસાર ઓસ્ટ્રેલિયા ગયેલી પાકિસ્તાનની સિનિયર ટીમની સાથે ડોક્ટર નથી. ઓસ્ટ્રેલિયા અને ન્યુઝીલેન્ડ પ્રવાસ માટે સોહેલ સલીમને સત્તાવાર ટીમ ડોક્ટર તરીકે નિયુક્ત કરવામાં આવ્યો હતો, પરંતુ તે હજુ સુધી ટીમ સાથે જોડાઈ શક્યો નથી.

પાકિસ્તાન ક્રિકેટ બોર્ડ (PCB)ના વિશ્વસનીય સૂત્રોએ મીડિયા સૂત્રોને જણાવ્યું કે, 'પાકિસ્તાન ક્રિકેટ બોર્ડ હાલમાં ડૉ. સલીમ માટે વિઝા મેળવવાનો પ્રયાસ કરી રહ્યું છે, વિઝા મળતાં જ તે પર્થમાં યોજાનારી પ્રથમ ટેસ્ટ મેચમાં ટીમ સાથે જોડાશે. આટલું જ નહીં, અબરાર અહેમદની જગ્યાએ પાકિસ્તાનની ટીમમાં પસંદગી પામેલા ઓફ સ્પિનર સાજિદ ખાન પણ વિઝાના કારણોસર ઓસ્ટ્રેલિયા જઈ શક્યા નથી.

ભૂતપૂર્વ ટેસ્ટ બેટ્સમેન શોએબ મોહમ્મદને UAEમાં રમાઈ રહેલા અંડર-19 એશિયા કપ માટે પાકિસ્તાનની જુનિયર ટીમના મેનેજર તરીકે નિયુક્ત કરવામાં આવ્યા હતા, પરંતુ તે પણ ટીમ સાથે જઈ શક્યા નથી. સૂત્રોએ કહ્યું, 'શોએબના પાસપોર્ટની સમયસીમા સમાપ્ત થઈ ગઈ હતી અને બોર્ડ તેને ઉકેલવાનો પ્રયાસ કરી રહ્યું છે. આશા છે કે તે ટૂંક સમયમાં UAEમાં ટીમ સાથે જોડાશે.

પાકિસ્તાની ટીમે તાજેતરમાં જ PM ઈલેવન સામે ચાર દિવસીય પ્રેક્ટિસ મેચ રમી હતી, જે ડ્રોમાં સમાપ્ત થઈ હતી. કેનબેરામાં રમાયેલી મેચમાં પાકિસ્તાની ટીમે 9 વિકેટે 391 રન બનાવી પ્રથમ દાવ ડિકલેર કર્યો હતો. પાકિસ્તાનના કેપ્ટન શાન મસૂદે પ્રથમ દાવમાં અણનમ 201 રન બનાવ્યા હતા. જવાબમાં, મેટ રેનશોની સદી (136*)ની મદદથી પ્રાઈમ મિનિસ્ટર ઈલેવનએ ચાર વિકેટે 367 રન બનાવ્યા હતા.

અહીં તમને જણાવી દઈએ કે, ઓસ્ટ્રેલિયા અને પાકિસ્તાન વચ્ચે ટેસ્ટ સીરીઝની પ્રથમ ટેસ્ટ મેચ 14 ડિસેમ્બરથી પર્થમાં રમાશે. આ સીરીઝ માટે ડાબોડી બેટ્સમેન સેમ અયુબ અને ફાસ્ટ બોલર ખુર્રમ શહજાદને પહેલીવાર પાકિસ્તાની ટેસ્ટ ટીમમાં જગ્યા મળી છે. 21 વર્ષના અયુબે ઘરેલુ ક્રિકેટમાં શાનદાર પ્રદર્શન કર્યું હતું.

3 ટેસ્ટ મેચ માટે પાકિસ્તાનની ટીમઃ શાન મસૂદ (કેપ્ટન), આમિર જમાલ, અબ્દુલ્લા શફીક, સાજિદ ખાન, બાબર આઝમ, ફહીમ અશરફ, હસન અલી, ઇમામ ઉલ હક, ખુર્રમ શહઝાદ, મીર હમઝા, M. રિઝવાન, મોહમ્મદ વસીમ, નોમાન અલી, સામ અયુબ, સલમાન આગા, સરફરાઝ અહેમદ, સઉદ શકીલ, શાહીન આફ્રિદી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.