પોપે અમેરિકાના રાષ્ટ્રપતિ તરીકે કોને વોટ આપવા કહ્યું, બંને ઉમેદવારોને નહીં ગમે

વિશ્વના સૌથી મોટા ખ્રિસ્તી ધર્મગુરુ પોપ ફ્રાન્સિસે અમેરિકન કેથોલિક ખ્રિસ્તીઓને રાષ્ટ્રપતિની ચૂંટણીમાં કમલા હેરિસ અને ડોનાલ્ડ ટ્રમ્પ વચ્ચેના 'ઓછા શેતાની ઉમેદવાર'ને પસંદ કરવાની સલાહ આપી છે.

એશિયાના ચાર દેશોના પ્રવાસ પરથી રોમ પરત ફરતી વખતે ફ્રાન્સિસે શુક્રવારે પ્લેનમાં પ્રેસ કોન્ફરન્સ કરી હતી. આમાં તેણે કમલા અને ટ્રમ્પનું નામ લીધા વગર તેમની ટીકા કરી હતી.

પોપે કહ્યું, 'મત ન આપવો એ ખરાબ બાબત છે. જ્યારે તમે મતદાન કરો ત્યારે તમારે ઓછા દુષ્ટ ઉમેદવારને પસંદ કરવાનો હોય છે. કોણ ઓછું દુષ્ટ છે? તે મહિલા (કમલા) હોય કે તે સજ્જન (ટ્રમ્પ)? મને ખબર નથી. દરેકે તેમની વિવેકબુદ્ધિનો ઉપયોગ કરીને તેમને ઓળખવાની જરૂર છે.'

પોપે કહ્યું, ટ્રમ્પ અને કમલા બંને જીવનની વિરુદ્ધ છે, પોપે કહ્યું કે, બંને ઉમેદવાર જીવનની વિરુદ્ધ છે. તે સજ્જન (ટ્રમ્પ) હોય, જે ઇમિગ્રન્ટ્સને દેશમાંથી હાંકી કાઢતા હોય, અથવા કમલા હેરિસ, જે ગર્ભમાં બાળકોને મારવાનું સમર્થન કરે છે.

પોપે કહ્યું કે, પ્રવાસીઓને દેશમાંથી બહાર કાઢવું એ 'ગંભીર પાપ' છે. તેમણે કહ્યું કે, સ્થળાંતર કરનારાઓને ભગાડીને તેમને વધુ સારું જીવન જીવતા અટકાવવા બિલકુલ યોગ્ય નથી. આ એક પ્રકારની નિમ્નતા છે.

અગાઉ 2016માં પણ પોપ ફ્રાન્સિસે માઈગ્રન્ટ્સ અંગેના તેમના વલણ માટે ટ્રમ્પની નિંદા કરી હતી. તેમણે કહ્યું હતું કે, જે કોઈ સ્થળાંતર કરનારાઓને બહાર રાખવા માટે દિવાલ બનાવે છે તે 'સાચો ખ્રિસ્તી' નથી.

પોપે કહ્યું, ઉંમર ભલે ગમે તેટલી નાની હોય, તેના જીવનનો અંત લાવવો બરાબર નથી. પોપ ગર્ભપાતના મુદ્દે ઘણી વખત ટિપ્પણી કરી ચૂક્યા છે. તેમણે ઓક્ટોબર 2018માં કહ્યું હતું કે, કોઈપણ સમસ્યાનો ઉકેલ શોધવા માટે માનવ જીવનનો અંત લાવો યોગ્ય નથી. ભલે તેની ઉંમર કેટલી પણ નાની કેમ ન હોય.

પોપ ફ્રાન્સિસને ગાઝા યુદ્ધને લઈને પણ પ્રશ્નો પૂછવામાં આવ્યા હતા. તેમણે કહ્યું, 'જ્યારે તમે માર્યા ગયેલા બાળકોના મૃતદેહો જુઓ છો, જ્યારે તમે સાંભળો છો કે, શાળાઓમાં બોમ્બમારો કરવામાં આવ્યો છે, ત્યારે તે સાંભળીને ખૂબ જ દુઃખ થાય છે. તે ખૂબ જ ભયાનક છે.'

પોપે કહ્યું, 'એવું કહેવાય છે કે આ સ્વ-બચાવ માટેનો સંઘર્ષ છે, પરંતુ ક્યારેક મને લાગે છે કે, આ એક ઘણું મોટું યુદ્ધ છે. મને આ કહેતા અફસોસ થાય છે, પરંતુ મને શાંતિની દિશામાં કોઈ પગલાં લેવામાં આવતા હોય એવું દેખાઈ નથી રહ્યું.'

અમેરિકામાં ખ્રિસ્તી ધર્મ: પ્યુ રિસર્ચ સેન્ટર (PRC) અનુસાર, એપ્રિલ 2024માં અમેરિકામાં કેથોલિક ખ્રિસ્તીઓની સંખ્યા લગભગ 20 ટકા હતી. અમેરિકાની વસ્તી લગભગ 262 મિલિયન છે. તેમાંથી 5.2 કરોડ કેથોલિક છે.

PRC મુજબ, આમાંથી 52 ટકા રિપબ્લિકન પાર્ટીને અને 44 ટકા ડેમોક્રેટિક પાર્ટીને સમર્થન આપે છે. સર્વે અનુસાર, 75 ટકા કેથોલિક ખ્રિસ્તીઓ પોપ ફ્રાન્સિસ વિશે સકારાત્મક અભિપ્રાય ધરાવે છે.

અમેરિકામાં ખ્રિસ્તી ધર્મ સૌથી મોટો ધર્મ છે. ગેલપ પોલમાં 2024માં 68 ટકા લોકો ખ્રિસ્તી ધર્મમાં માનતા હતા. મહત્તમ 33 ટકા પ્રોટેસ્ટન્ટ છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.