ભારતીય મૂળની યુવતી પાસેથી છેતરપિંડીથી મિસ યુનિવર્સ ફિજીનો તાજ લઈ લીધો, થયો વિવાદ

મિસ સાઉથ આફ્રિકાનો વિવાદ હજુ શમ્યો પણ નથી, ત્યાં તો એક બીજો વિવાદ નવી બ્યુટી ક્વીન કોન્ટેસ્ટ વિવાદોના પડછાયા હેઠળ આંતરરાષ્ટ્રીય હેડલાઈન્સ બનાવી રહી છે. તાજેતરમાં, દક્ષિણ પેસિફિક દેશ ફિજીમાં આ જોવા મળ્યું હતું. દરેક જાણે છે કે ફીજીમાં મોટી સંખ્યામાં ભારતીય મૂળના લોકો રહે છે. આવી જ એક ફિજી ભારતીય અને MBA સ્ટુડન્ટ 24 વર્ષની મંશિકા પ્રસાદે તાજેતરમાં મિસ યુનિવર્સ ફિજીનો તાજ જીત્યો હતો. આખી પ્રક્રિયા સરળ રીતે ચાલી, જીતને લઈને તે રાત્રે કોઈ વિવાદ થયો ન હતો. બીજા દિવસે, મંશિકા પ્રસાદે જ્યુરી જજો સાથે ફોટોગ્રાફી, મુસાફરી અને અન્ય તમામ ઔપચારિકતાઓ કરવાનું ચાલુ રાખ્યું.

બે દિવસ પછી, મંશિકા પ્રસાદ માટે બધું બદલાઈ ગયું જ્યારે સંસ્થા મિસ યુનિવર્સ ફિજી (MUF)એ એક નિવેદન બહાર પાડ્યું કે, મિસ ફિજી સ્પર્ધા દરમિયાન નિયમોનું ગંભીર ઉલ્લંઘન થયું હતું. વોટિંગ દરમિયાન છેતરપિંડી થઈ હતી અને મંશિકાને જીતાડવામાં આવી હતી, કારણ કે ઇવેન્ટ મેનેજરને તેનાથી આર્થિક ફાયદો થવાનો હતો. તેથી, નવું સુધારેલું પરિણામ ટૂંક સમયમાં જાહેર કરવામાં આવશે. તેના થોડા જ કલાકોમાં મંશિકાને કહેવામાં આવ્યું કે, તેનો તાજ છીનવાઈ રહ્યો છે અને તે નવેમ્બરમાં મિસ યુનિવર્સ સ્પર્ધામાં ફિજીનું પ્રતિનિધિત્વ કરી શકશે નહીં.

તેના બદલે 30 વર્ષીય નાદીન રોબર્ટ્સ જે આ સ્પર્ધામાં રનર અપ રહી હતી તેને મિસ યુનિવર્સ ફિજી જાહેર કરવામાં આવી હતી. નાદીન ઓસ્ટ્રેલિયાના સિડનીમાં એક મોડેલ અને પ્રોપર્ટી ડેવલપર છે. તેની માતા ફિજીની છે. મંશિકા પ્રસાદ આ ઘટનાક્રમથી ચોંકી ગયા હતા. તેણે એક નિવેદન આપીને પોતાને સોશિયલ મીડિયાથી દૂર કર્યા અને કહ્યું કે, પડદા પાછળ ઘણું બધું થયું છે, જેના વિશે જનતાને જાણ નથી. ઊલટું, નાદિને મિસ યુનિવર્સ ફિજીને અનિયમિતતાઓને સુધારવા અને સુધારેલા પરિણામો જાહેર કરવા માટે તાત્કાલિક પગલાં લેવા બદલ આભાર માન્યો.

મીડિયા સૂત્રોના અહેવાલ અનુસાર સાત જજોની પેનલમાં મંશિકાએ 4-3થી આ સ્પર્ધા જીતી હતી. બીજા દિવસે તે નિર્ણાયકો સાથે બોટ ટ્રીપ પર ગઈ, પરંતુ ત્યાં સુધી વિજેતાની સત્તાવાર જાહેરાત કરવામાં આવી ન હતી. પરંતુ એક જજ, રીરી ફ્રેબિયાની, તે પ્રવાસમાં ગયા ન હતા. તે લક્સ પ્રોજેક્ટ્સ કંપનીની પ્રતિનિધિ હતી. આ એક પ્રોપર્ટી ડેવલપમેન્ટ ફર્મ છે. આ કંપનીએ પોતે જ મિસ યુનિવર્સ ઓર્ગેનાઈઝેશન (MUO) પાસેથી ફિજીમાં મિસ યુનિવર્સનો ખિતાબ મેળવવાનું લાઇસન્સ મેળવ્યું હતું. તેથી 7 જજોની પેનલમાં તેના એક પ્રતિનિધિનો પણ સમાવેશ કરવામાં આવ્યો હતો. હકીકતમાં, કોઈપણ દેશમાં આવી સ્પર્ધાનું આયોજન કરવા માટે લાયસન્સ ખરીદવું ખૂબ જ મોંઘું કામ છે, તેથી જ 1981 પછી પહેલીવાર આ પ્રકારની મિસ યુનિવર્સ ફિજી સ્પર્ધાનું આયોજન ફિજીમાં થઈ શકે છે. ફ્રેન્ચાઇઝ લાયસન્સ ખરીદ્યા પછી, કંપની આયોજક બને છે અને સંબંધિત દેશમાં ઇવેન્ટ્સનું આયોજન કરે છે અને તેના ખર્ચને પહોંચી વળવા માટે આયોજન, સ્પોન્સરશિપ અને ટિકિટ વેચે છે.

મીડિયા સૂત્રોના જણાવ્યા અનુસાર, જ્યારે રીરી ફેબ્રિયાની ન ગઈ ત્યારે તેની સાથે રૂમ શેર કરનાર અન્ય જજે મેલિસા વ્હાઇટે તેને કારણ પૂછ્યું, તો રીરીએ કહ્યું કે, તેના બોસ જેમીએ તેને દિવસ માટે ઘણું કામ આપ્યું હતું. તેથી તે બોટની સફર પર જઈ શકશે નહીં. એકંદરે, સાંજ સુધીમાં એ સ્પષ્ટ થઈ ગયું કે, લક્સ કંપની સ્પર્ધાના પરિણામોથી ખુશ નથી. તેની અખબારી યાદીમાં કહેવામાં આવ્યું છે કે, આ સ્પર્ધાનું લાયસન્સ મેળવનાર વ્યક્તિને પણ મત આપવાનો અધિકાર છે અને મંચના સંચાલકોએ તેના મતની ગણતરી કરી નથી. મતલબ કે સ્ટેજ પર હાજર 7 જજોની પેનલ સિવાય, આ આઠમો મત પણ ગણવો જોઈએ જે સ્પર્ધાનું લાઇસન્સ (લક્સ પ્રોજેક્ટ્સ) મેળવનાર વ્યક્તિનો છે. આ સાથે એવું પણ કહેવામાં આવ્યું હતું કે, તે વોટ નિર્ણાયક માનવામાં આવશે અને તેણે આ આઠમો વોટ નાદીન રોબર્ટ્સને આપ્યો. આ રીતે, મંશિકા પ્રસાદ અને નાદીન રોબર્ટ્સ વચ્ચે મેચ 4-4 થી ટાઈ થઈ હતી પરંતુ લક્સના નિર્ણાયક મતને કારણે, નાદિનને વિજેતા જાહેર કરવામાં આવી હતી.

બસ પછી શું? ફિજીમાં સોશિયલ મીડિયાથી લઈને સમસ્ત મીડિયા જગતમાં આની ચર્ચા શરૂ થઈ હતી. જ્યારે લક્સ પ્રોજેક્ટ્સની તપાસ કરવામાં આવી ત્યારે જાણવા મળ્યું કે આ કંપની ઓસ્ટ્રેલિયન બિઝનેસમેન જેમી મેકઇન્ટાયરની છે અને જિમીના લગ્ન નાદિન રોબર્ટ્સ સાથે થયા છે. એટલે કે આ કારણે જ નદીનને કોઈપણ રીતે જીતાડવાનો પ્રયાસ કરવામાં આવ્યો હતો.

નિર્ણાયકોની પેનલે એવો પણ વાંધો ઉઠાવ્યો હતો કે, જ્યારે આખી સ્પર્ધા દરમિયાન આવું કંઈ જ નહોતું ત્યારે આઠમા મતની ગણતરી કેવી રીતે થશે. તેનો ક્યાંય ઉલ્લેખ નહોતો. જો પેનલમાં કંપનીનો પ્રતિનિધિ પહેલેથી હાજર હોય તો પણ આઠમો મત કેવી રીતે માન્ય રહેશે? જ્યારે સ્પર્ધા દરમિયાન આવી કોઈ માંગ કરવામાં આવી ન હતી.

આ મામલો મિસ યુનિવર્સ ઓર્ગેનાઈઝેશન (MUO) સુધી પણ પહોંચ્યો અને તેણે પોતાના સ્તરે આ મામલાની તપાસ કરી. ત્યાર પછી તેણે મિસ યુનિવર્સ ફિજી (MUF) સંસ્થા સાથે વાત કરી અને અંતે મામલો મંશિકા પ્રસાદની તરફેણમાં ગયો. મતલબ કે આખરે મંશિકા પ્રસાદને ફરીથી મિસ યુનિવર્સ ફિજી જાહેર કરવામાં આવી અને તે નવેમ્બરમાં મેક્સિકોમાં મિસ યુનિવર્સ સ્પર્ધામાં સત્તાવાર રીતે ભાગ લેશે. નાડીન રોબર્ટ્સના દાવાને રદિયો આપ્યો હતો. પોતાનું ગુમાવેલું સન્માન મળ્યા પછી હવે મંશિકા પ્રસાદ ખૂબ જ ખુશ છે અને નવેમ્બરની તૈયારીમાં વ્યસ્ત છે. જ્યારે નાદીન રોબર્ટ્સ હજી પણ ઇન્સ્ટાગ્રામ પર પોતાને રિયલ મિસ યુનિવર્સ ફિજી 2024 તરીકે લખી રાખેલું છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.