જમૈકાએ પ્લેન પાછું મોકલ્યું, 75 ગુજરાતીઓ સવાર હતા, જાણો કારણ

દુબઈથી ઉડતું ચાર્ટર્ડ પ્લેન કિંગસ્ટનની રાજધાની જમૈકાથી પાછું ફેરવવામાં આવ્યું હતું. કહેવામાં આવી રહ્યું છે કે, આ વિમાનમાં ભારતના ગુજરાત રાજ્યના લગભગ 75 મુસાફરો સવાર હતા. પ્લેનમાં સવાર મુસાફરોના દસ્તાવેજોથી સ્થાનિક વહીવટીતંત્ર સંતુષ્ટ ન હતું.

આ મામલે વિદેશ મંત્રાલયના પ્રવક્તા રણધીર જયસ્વાલે કહ્યું કે, પ્લેન 7 મેના રોજ કિંગ્સટનથી દુબઈ પરત ફર્યું હતું. સાપ્તાહિક પ્રેસ કોન્ફરન્સમાં જયસ્વાલે જણાવ્યું કે, જર્મનીમાં નોંધાયેલ ચાર્ટર્ડ એરક્રાફ્ટ 2 મેના રોજ કેટલાક ભારતીય પ્રવાસીઓ સાથે દુબઈથી કિંગ્સટન માટે રવાના થયું હતું. કિંગ્સ્ટનમાં આગમન પર સ્થાનિક સત્તાધિકારી સંતુષ્ટ નહોતા કે વિમાનના મુસાફરો પ્રવાસીઓ હતા, જ્યારે કે તેઓએ હોટેલમાં રોકાવાનું પ્રી-બુક કરાવ્યું હતું.

તેમણે કહ્યું કે, દસ્તાવેજોથી સંતુષ્ટ ન હોવાને કારણે વિમાનને મુસાફરો સાથે દુબઈ પરત ફરવાનો આદેશ આપવામાં આવ્યો હતો. આ પછી પ્લેન કિંગસ્ટનથી તમામ મુસાફરોને સાથે લઈને દુબઈ માટે રવાના થયું.

જમૈકા ઓબ્ઝર્વરના અહેવાલ અનુસાર, વિમાનમાં કુલ 253 વિદેશી મુસાફરો સવાર હતા, જેમને સુરક્ષાના કારણોસર ઈમિગ્રેશન અધિકારીઓએ એરપોર્ટ પર રોક્યા હતા. જમૈકાના ડિપાર્ટમેન્ટ ઓફ નેશનલ સિક્યુરિટીએ જણાવ્યું હતું કે, નિયમો અને કાયદાના ભંગની શક્યતા ઘટાડવા માટે સ્થાનિક સત્તાવાળાઓ પ્લેન દ્વારા આવતા તમામ લોકોની સતત તપાસ કરે છે.

ગુજરાતના CID અધિકારીના જણાવ્યા અનુસાર, પ્લેન હાલમાં કેન્દ્રીય એજન્સીના રક્ષણ હેઠળ છે, જેમાં 75 મુસાફરો ગુજરાતના છે અને કેટલાક મુસાફરો પંજાબના છે. આ તમામ મુસાફરો પાસે પ્રવાસી વિઝા છે. એવું માનવામાં આવે છે કે, આ તમામ પ્રવાસીઓ મેક્સિકો બોર્ડર દ્વારા ગેરકાયદેસર રીતે અમેરિકા જવાનો પ્રયાસ કરી રહ્યા હતા.

અત્રે ઉલ્લેખનીય છે કે ગયા ડિસેમ્બરમાં પણ નિકારાગુઆનું એક વિમાન ભારતીયો સાથે ફ્રાન્સમાં લેન્ડ થયું હતું. ત્યાર પછી તમામ ભારતીયોને માનવ તસ્કરીની શંકાના આધારે ભારત પરત મોકલવામાં આવ્યા હતા. આ કેસમાં ગુજરાત CIDએ માનવ તસ્કરીના આરોપમાં 60થી વધુ લોકોને ગેરકાયદેસર રીતે અમેરિકા મોકલવાનો પ્રયાસ કરવા બદલ 14 એજન્ટો વિરુદ્ધ FIR નોંધી હતી.

અધિકારીઓએ જણાવ્યું હતું કે, યુનાઇટેડ આરબ અમીરાતના ફુજૈરાહથી ઉડાન ભરેલી લિજેન્ડ એરવેઝની ફ્લાઇટમાં સવાર 303 લોકોમાં ઓછામાં ઓછા 66 ગુજરાતના લોકો હતા, જેઓ નિકારાગુઆ પહોંચ્યા પછી મેક્સિકો બોર્ડર દ્વારા ગેરકાયદેસર રીતે US જવાના હતા. જો કે, પકડાયા પછી, તમામ મુસાફરોને 25 ડિસેમ્બર 2023ના રોજ મુંબઈ પરત મોકલવામાં આવ્યા હતા.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.