પંજાબ CM મરિયમનું UAEના રાષ્ટ્રપતિની સાથે બંને હાથે અભિવાદન, પાકિસ્તાનમાં હંગામો

આ દિવસોમાં પંજાબના CM મરિયમ નવાઝ અને UAEના પ્રમુખ શેખ મોહમ્મદ બિન જાયદ વચ્ચેની મુલાકાતની પાકિસ્તાનમાં ખૂબ ચર્ચા થઈ રહી છે. તેમની મીટિંગની એક તસવીર વાઈરલ થઈ છે, જેમાં મરિયમ UAE પ્રેસિડેન્ટને તેમના બંને હાથ પર રાખીને તેમનું અભિવાદન કરી રહી છે. આ તસવીરે પાકિસ્તાનમાં ખળભળાટ મચાવી દીધો છે. PTI સહિત અનેક પક્ષોના નેતાઓ અને સામાન્ય પાકિસ્તાનીઓ પણ આ મુલાકાતને ઈસ્લામ વિરુદ્ધ ગણાવી રહ્યા છે. લોકોનો આરોપ છે કે મુસ્લિમ મહિલાએ આ રીતે બીજા કોઈ પુરુષને ન મળવું જોઈએ. ઘણા લોકો મૌલવીઓ પાસેથી મરિયમ વિરુદ્ધ ફતવાની માંગ કરી રહ્યા છે.

હકીકતમાં, મંગળવારે UAEના રાષ્ટ્રપતિ શેખ મોહમ્મદ બિન ઝાયેદ પાકિસ્તાનની મુલાકાતે ગયા હતા. આ દરમિયાન PM શાહબાઝ શરીફ અને તેમની ભત્રીજી અને પંજાબ પ્રાંતના CM મરિયમ નવાઝે તેમનું સ્વાગત કર્યું હતું. અભિવાદન દરમિયાન મરિયમની શેખ મોહમ્મદ સાથેની મુલાકાત પાકિસ્તાનમાં ચર્ચામાં છે. બંનેની એક તસવીર વાયરલ થઈ રહી છે. તસવીરમાં જોઈ શકાય છે કે, મરિયમ UAEના રાષ્ટ્રપતિના હાથ પર પોતાના બંને હાથ રાખીને સ્મિત કરી રહી છે. શાહબાઝ શરીફ બંને વચ્ચે ઉભા છે. આ તસવીરે પાકિસ્તાનમાં ખળભળાટ મચાવી દીધો છે. પાકિસ્તાનીઓ સોશિયલ મીડિયા પર વિવિધ પ્રકારની કોમેન્ટ કરી રહ્યા છે.

આ તસવીરની પાકિસ્તાન તહરીક-એ-ઈન્સાફ (PTI) અને અન્ય ઘણા લોકોએ આકરી ટીકા કરી છે. તેમનો દાવો છે કે, આ કૃત્ય ઇસ્લામિક સિદ્ધાંતોનું ઉલ્લંઘન છે. ટીકાકારો દલીલ કરે છે કે, એક મુસ્લિમ મહિલા તરીકે, તેણે 'ગૈર-મહરમ' (એવી વ્યક્તિ કે જેની સાથે તેમનો નજીકનો સબંધ નથી) સાથે હાથ મિલાવ્યો ન હોવો જોઈએ.

આ ઘટનાએ સોશિયલ મીડિયા પર વ્યાપક ચર્ચા જગાવી છે, લોકો એવા પ્રશ્નો ઉભા કરે છે કે શું CM રાજદ્વારી પ્રોટોકોલનું પાલન કરી રહ્યા છે કે, પરંપરાગત સીમાઓનું ઉલ્લંઘન કરી રહ્યા છે. સોશિયલ મીડિયા પર ટીકા ઉપરાંત ઘણા પાકિસ્તાની પત્રકારોએ પણ આ મુદ્દે પોતાનો અભિપ્રાય વ્યક્ત કર્યો છે. સોહરાબ બરકત નામના એક પત્રકારે ટિપ્પણી કરી હતી કે, પૂર્વીય સમાજમાં સ્ત્રીઓ સામાન્ય રીતે પુરુષો સાથે હાથ મિલાવવાનું ટાળે છે, સિવાય કે રાજદ્વારી કારણોસર આવું કરવું બિલકુલ જરૂરી ન હોય. તેમણે સૂચવ્યું કે આવા કિસ્સાઓમાં, ટૂંકમાં 'ટચ એન્ડ ગો' હેન્ડશેક પૂરતું છે, પરંતુ અહીં તેમણે તેમના બંને હાથનો ઉપયોગ કર્યો, જે અધાર્મિક છે.

મરિયમ નવાઝના હેન્ડશેકનો વિવાદ એવા સમયે સામે આવ્યો છે, જ્યારે UAE સાથે પાકિસ્તાનના સંબંધો પર સવાલો ઉઠી રહ્યા છે. શેખ મોહમ્મદ બિન ઝાયેદ અને ઉચ્ચ કક્ષાના આરબ અધિકારીઓનું એક પ્રતિનિધિમંડળ હાલમાં પાકિસ્તાનની મુલાકાતે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.