શેખ હસીના, આ તમારો દેશ છે, તમારું સ્વાગત છે, પણ... બાંગ્લાદેશ સરકારે આપી ચેતવણી

બાંગ્લાદેશની વચગાળાની સરકારમાં ગૃહ બાબતોના સલાહકાર (ગૃહમંત્રીના સમકક્ષ) સખાવત હુસૈને કહ્યું છે કે, શેખ હસીનાએ દેશમાં પાછા ફરવું જોઈએ અને રાજકારણમાં ફરી જોડાવું જોઈએ. હુસૈને કહ્યું કે હસીનાએ દેશમાં પાછા ફરવું જોઈએ અને નવા ચહેરાઓ સાથે તેમની પાર્ટી અવામી લીગનું પુનર્ગઠન કરવું જોઈએ. હુસૈને કહ્યું કે ભૂતપૂર્વ PM શેખ હસીના પર દેશ છોડવાનું કોઈ દબાણ નહોતું, તેમણે પોતાની મરજીથી ઢાકા છોડી દીધું હતું. કોઈએ તેમને આવું કરવા દબાણ કર્યું નથી. હુસૈને કહ્યું કે, અમે તેમને પાછા ફરવા અને તેમની પાર્ટીનું પુનર્ગઠન કરવા કહીશું. જો કે, જો તે દેશમાં પરત ફરશે અને કોઈપણ પ્રકારની અશાંતિ ફેલાવવાનો પ્રયાસ કરશે તો કાયદો તેની સાથે કાર્યવાહી કરશે.

ઢાકા ટ્રિબ્યુનના અહેવાલ મુજબ, સખાવત હુસૈને સોમવારે શેખ હસીનાને સંબોધીને કહ્યું, 'અમને જાણવા મળ્યું છે કે, તમે દેશમાં પાછા ફરવાની યોજના બનાવી રહ્યા છો. પ્રશ્ન એ છે કે તમે અહીંથી ગયા જ કેમ? તમે તમારી સ્વતંત્ર ઇચ્છાથી ગયા હતા અને કોઈએ તમને દબાણ કર્યું નથી. આ તમારો દેશ છે અને અમે તમારું સન્માન કરીએ છીએ. જો તમે પાછા આવવાનું નક્કી કરો છો તો તમારું સ્વાગત છે. એક જ વિનંતી છે કે તમે પાછા આવીને લોકોને ઉશ્કેરવાનું કે અરાજકતા ફેલાવવાનો પ્રયાસ કરવાનું ટાળો. જો તમે આમ કરશો તો તે તમારા માટે મુશ્કેલ બની શકે છે.'

બાંગ્લાદેશની વચગાળાની સરકારના વડા મોહમ્મદ યુનુસ, M સખાવત અને અન્ય મહત્વના નેતાઓએ હિન્દુ વિદ્યાર્થીઓ અને યુવાનો સાથે બેઠક યોજી છે. આ મીટિંગ પછી ગૃહ મંત્રાલયમાં પ્રેસ સાથે વાત કરતી વખતે સખાવતે હસીનાની વાપસીના સવાલનો જવાબ આપ્યો. તેમણે કહ્યું કે, જ્યારે રાષ્ટ્રીય પાર્ટીના નેતા હુસૈન મુહમ્મદ ઈરશાદને દેશ છોડવાનો અથવા જેલમાં જવાનો વિકલ્પ આપવામાં આવ્યો ત્યારે ઈરશાદે જેલમાં જવાનું પસંદ કર્યું. અમે કહીશું કે, શેખ હસીનાએ પણ પરત ફરવું જોઈએ.

સખાવતે કહ્યું કે, કોઈ પણ રાજકીય પક્ષ પર પ્રતિબંધ મૂકવો જોઈએ નહીં, કારણ કે આવા પગલાં સામાન્ય રીતે ચોક્કસ એજન્ડા પૂરા કરવા માટે લેવામાં આવે છે. તેણે જમાત-એ-ઈસ્લામી પર પ્રતિબંધ મૂકવાનો પણ ઈન્કાર કર્યો હતો. તેમણે કહ્યું કે એક પોલિટિકલ પાર્ટીઝ એક્ટ બનાવવામાં આવશે, જે દેશમાં સરમુખત્યારશાહીને બદલે જવાબદાર સરકાર હોવા પર ભાર મૂકશે. કોઈપણ રાજકારણી રાજનીતિની રમત રમવા માંગે છે તે આ માળખામાં રહીને તે કરી શકે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.