ટ્રમ્પ રાષ્ટ્રપતિ બનતાની સાથે જ US આર્મીમાંથી ટ્રાન્સજેન્ડર્સને હટાવી શકે છે

અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પ ટૂંક સમયમાં US સેનાના તમામ ટ્રાન્સજેન્ડર સભ્યોને હટાવી શકે છે. મીડિયા સૂત્રોના એક અહેવાલમાં આ અંગેની માહિતી આપવામાં આવી છે. જે મુજબ ટ્રમ્પ જાન્યુઆરી 2025માં રાષ્ટ્રપતિ પદ સંભાળવાના પહેલા જ દિવસે આને લગતા એક્ઝિક્યુટિવ ઓર્ડર પર હસ્તાક્ષર કરશે.

એવા સમયે, જ્યારે US સશસ્ત્ર દળોમાં ભરતી ઘટી રહી છે, સેનામાંથી ટ્રાન્સજેન્ડર કર્મચારીઓને કાઢી મુકવાનું પગલું હજારો સેવા કર્મચારીઓની બરતરફી તરફ દોરી શકે છે. તેમના પ્રથમ કાર્યકાળ દરમિયાન, ડોનાલ્ડ ટ્રમ્પે 2017માં જાહેરાત કરી હતી કે, ટ્રાન્સ લોકોને હવે US સૈન્યમાં સેવા કરવાની મંજૂરી આપવામાં આવશે નહીં. તેમણે કહ્યું કે, આનાથી ભારે તબીબી ખર્ચ અને વિક્ષેપ થશે. સૈન્યમાં ટ્રાન્સજેન્ડર લોકો પરનો પ્રતિબંધ 2019માં અમલમાં આવ્યો હતો, પરંતુ જેઓ પહેલેથી જ સૈન્યમાં સેવા આપી રહ્યા હતા, તેમને સેવા ચાલુ રાખવાની મંજૂરી આપવામાં આવી હતી.

આ પ્રતિબંધનો મુદ્દો, જે કોર્ટમાં પણ ઉઠાવવામાં આવ્યો હતો, તેને તે પછીથી રાષ્ટ્રપતિ જો બાઇડેનએ તેને પલટાવી નાખ્યો હતો. મીડિયા સૂત્રોના અહેવાલ અનુસાર, રિપબ્લિકન ટ્રમ્પ સૈન્યમાં સેવા આપતા તમામ ટ્રાન્સ લોકોને હાંકી કાઢવા અને બાઇડેનના આદેશને રદ કરવા તૈયાર છે.

સ્થાનિક સૂત્રએ મીડિયા કર્મીને બતાવ્યું કે, 'આ લોકોને એવા સમયે બહાર કાઢવામાં આવશે જ્યારે સૈન્ય જરૂરી લોકોની ભરતી કરી શકશે નહીં.' એક અખબારના જણાવ્યા અનુસાર, હાલમાં US સેનામાં લગભગ 15,000 ટ્રાન્સ લોકો સેવા આપી રહ્યા છે. મોર્ડન મિલિટરી એસોસિએશન ઓફ અમેરિકાના એક્ઝિક્યુટિવ ડિરેક્ટર રશેલ બ્રાનમેને જણાવ્યું હતું કે, 'સેનામાં ટ્રાન્સજેન્ડર લોકોને પ્રતિબંધિત કરવાથી સૈન્યની તૈયારીઓને લગતી કામગીરી નબળી પડી જશે અને તેની ભરતી અને જાળવણીની કટોકટી વધુ ખરાબ થશે, જ્યારે અમેરિકાના વિરોધીઓ માટે પણ કમજોરીનો સંકેત પણ આપશે.'

તેમણે કહ્યું, 'અચાનક 15,000થી વધુ સૈન્ય કર્મચારીઓને બરતરફ કરવાથી, ખાસ કરીને એ જોતા કે, ગયા વર્ષે સૈન્ય ભરતીના લક્ષ્ય કરતાં 41,000 ઓછી ભરતી કરવામાં આવી હતી, તે યુદ્ધ લડતા એકમો પર વહીવટી બોજ વધારે છે, સંકલનને નુકસાન પહોંચાડે છે અને કૌશલ્યનો તફાવત વધારે છે.'

5 નવેમ્બર, 2024ના રોજ યોજાયેલી US પ્રમુખપદની ચૂંટણી જીત્યા પછી ડોનાલ્ડ ટ્રમ્પનો શપથ ગ્રહણ સમારોહ, 20 જાન્યુઆરી, 2025ના રોજ US કેપિટલમાં યોજવાનું નક્કી છે, જ્યાં જાન્યુઆરી 2021માં રાષ્ટ્રપતિની ચૂંટણીમાં ટ્રમ્પની હાર પછી રમખાણો થયા હતા. આ વખતની ચૂંટણીમાં ટ્રમ્પે ઉપરાષ્ટ્રપતિ કમલા હેરિસને હરાવ્યા હતા.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.