ટ્રમ્પ કે કમલા હેરિસ? અમેરિકન હિંદુઓએ ખુલ્લેઆમ આ નેતાને આપ્યું સમર્થન

નવેમ્બરમાં યોજાનારી US પ્રમુખપદની ચૂંટણીને આડે 2 મહિનાથી પણ ઓછો સમય બાકી છે. આવી સ્થિતિમાં હવે અમેરિકામાં ચૂંટણી પ્રચાર પૂરજોશમાં ચાલી રહ્યો છે. દરમિયાન અમેરિકામાં રહેતા હિન્દુઓએ જણાવ્યું છે કે, તેઓ આ ચૂંટણીમાં બે મુખ્ય પક્ષોમાંથી ક્યા પક્ષને સમર્થન આપી રહ્યા છે. હિંદુ ફોર અમેરિકા ફર્સ્ટ નામની સંસ્થાએ જાહેરાત કરી છે કે, તે ચૂંટણીમાં રિપબ્લિકન ઉમેદવાર ડોનાલ્ડ ટ્રમ્પને સમર્થન આપશે. એટલું જ નહીં, આ જૂથ પેન્સિલવેનિયા, જ્યોર્જિયા અને નોર્થ કેરોલિના રાજ્યોમાં ડેમોક્રેટિક ઉમેદવાર ઉપપ્રમુખ કમલા હેરિસ વિરુદ્ધ અભિયાન શરૂ કરશે.

ગુરુવારે નિર્ણયની જાહેરાત કરતા, હિંદુઝ ફોર અમેરિકા ફર્સ્ટના પ્રમુખ અને સ્થાપક ઉત્સવ સંદુજાએ દાવો કર્યો હતો કે, જો હેરિસ ચૂંટણી જીતશે તો ભારત-અમેરિકા સંબંધો બગડી શકે છે. તેમણે કહ્યું, 'ચિંતા એ છે કે જો કમલા યુનાઇટેડ સ્ટેટ્સના પ્રમુખ બને છે, તો તે કેટલાક ઉદારવાદીઓને આગળ લાવી શકે છે, જે એશિયન-અમેરિકન મતદારોને પ્રભાવિત કરશે.' અત્રે ઉલ્લેખનીય છે કે, બાઇડેન-હેરિસ પ્રશાસને સરહદને સુરક્ષિત રાખી નથી. તેમણે કહ્યું કે, હેરિસ પ્રમુખ જો બાઇડેન પછી બીજા નંબરના નેતા છે અને તેમણે અમેરિકામાં ગેરકાયદેસર ઇમિગ્રન્ટ્સને રોકવા માટે કશું કર્યું નથી.' તેમણે જણાવ્યું, 'આ તમામ ગેરકાયદેસર વસાહતીઓને કારણે અપરાધ અને ડ્રગ હેરફેરમાં રેકોર્ડ વધારો કર્યો છે, અને તે લઘુમતી સમુદાયોને અસર કરી રહ્યું છે, ખાસ કરીને ઘણા એશિયન-અમેરિકન વ્યવસાય માલિકો.'

બીજી તરફ સંદુજાએ ઈમિગ્રેશન સિસ્ટમને વધુ મેરિટ આધારિત બનાવવાના ટ્રમ્પના પ્રયાસોની પ્રશંસા કરી હતી. તેમણે ભારત સાથે સંરક્ષણ અને ટેક્નોલોજી સહયોગને પ્રોત્સાહન આપવા પૂર્વ રાષ્ટ્રપતિના પ્રયાસોની પણ પ્રશંસા કરી હતી. તેમણે કહ્યું કે, 'ટ્રમ્પ ભારતના મોટા સમર્થક છે. તેમણે કહ્યું કે તેઓ PM નરેન્દ્ર મોદી સાથે સારા સંબંધ બાંધી શક્યા હોત અને અનેક સંરક્ષણ પ્રોજેક્ટ્સ પર સહયોગ કરી શક્યા હોત જે ભારતને ચીન સાથે સ્પર્ધા કરવા સક્ષમ બનાવશે.'

સંદુજાએ કહ્યું કે, હેરિસે ભારત સરકાર અને લોકો વિશે ઘણી વખત અપમાનજનક ટિપ્પણીઓ કરી છે, જ્યારે ટ્રમ્પે દેશની આંતરિક બાબતોમાં દખલગીરી કરી નથી. તેમણે દાવો કર્યો હતો કે, 'કમલા હેરિસ ભારત-US સંબંધોમાં અસ્થિરતા લાવશે.' તેમણે કહ્યું કે, હિંદુઝ ફોર અમેરિકા ફર્સ્ટ જ્યોર્જિયા, નોર્થ કેરોલિના, પેન્સિલવેનિયા, મિશિગન, વિસ્કોન્સિન, એરિઝોના અને નેવાદા જેવા રાજ્યોમાં હિન્દુઓ વચ્ચે હેરિસ વિરુદ્ધ અભિયાન ચલાવી રહી છે.

વળી સંદુજાએ કહ્યું કે, વૈશ્વિક હિંદુ સમુદાય બાંગ્લાદેશમાં હિંદુઓ પર થઈ રહેલા હુમલાને લઈને ચિંતિત છે. તેમણે કહ્યું, 'અમે તમામ સંબંધિત રાજકીય સંસ્થાઓને આ મુદ્દો ઉઠાવવા વિનંતી કરીશું.' તેમણે વધુમાં જણાવ્યું કે, 'હું રાષ્ટ્રપતિ ટ્રમ્પને ઘણો શ્રેય આપું છું, તેમના નેતૃત્વ હેઠળ સ્ટેટ ડિપાર્ટમેન્ટે ભારતીય ઉપખંડના વિવિધ ભાગો, જેમ કે અફઘાનિસ્તાન, પાકિસ્તાનમાં હિંદુઓ પર થતા અત્યાચારનો સ્વીકાર કર્યો. એ રાષ્ટ્રપતિ ટ્રમ્પ જ હતા, જેમણે હિન્દુ નરસંહારની વાતની કબૂલાત કરી હતી.'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.