'ભૂલ મારી છે, ગુસ્સો PM મોદી પર ના કાઢો', રૂપાલાએ ફરી ક્ષત્રિય સમાજની માફી માગી

ગુજરાતની રાજકોટ લોકસભા બેઠક પરથી BJPના ઉમેદવાર પરષોત્તમ રૂપાલાએ ફરી એકવાર આ સમુદાયની માફી માંગી છે. જસદણમાં યોજાયેલી ચૂંટણી સભાને સંબોધતા રૂપાલાએ કહ્યું કે, 'મારી ભૂલ થઈ હતી, મેં જાહેરમાં માફી પણ માંગી છે. મારો કોઈ ખોટો ઈરાદો ન હતો, હું ક્ષત્રિય સમાજની વચ્ચે ગયો અને માફી માંગી, તેઓએ મને જવાબ પણ આપ્યો. પરંતુ PM નરેન્દ્ર મોદીનો વિરોધ શા માટે?

પરષોત્તમ રૂપાલાએ ક્ષત્રિય સમાજને જણાવ્યું હતું કે, 'તમે તમારા રાષ્ટ્રના યોગદાનને યાદ કરો, BJPના વિકાસમાં તમારું પણ મોટું યોગદાન રહ્યું છે. જ્યારે રોજના 18 કલાક કામ કરનારા PM મોદી દેશ સિવાય બીજું કંઈ વિચારતા નથી, 140 કરોડ લોકોને પોતાનો પરિવાર માને છે અને તેમની વિકાસયાત્રામાં અનેક ક્ષત્રિયો PM મોદીની સાથે રહ્યા છે, તો પછી તેઓ તેમનો વિરોધ મારા કારણે કેમ કરી રહ્યા છે? હું મારી ભૂલ સ્વીકારું છું. પરંતુ PM મોદી વિરુદ્ધ ક્ષત્રિય સમુદાયનું ઉભું થવું મને યોગ્ય નથી લાગતું. કૃપા કરીને PM મોદી સામે જે ગુસ્સો દર્શાવવામાં આવી રહ્યો છે તેના પર પુનર્વિચાર કરો.'

જો કે, BJPના ડેમેજ કંટ્રોલના તમામ પ્રયાસો છતાં ગુજરાત, ઉત્તર પ્રદેશ અને રાજસ્થાન જેવા રાજ્યોમાં ક્ષત્રિય સમુદાયનો ગુસ્સો ઓછો થતો જણાતો નથી. છેલ્લા કેટલાક અઠવાડિયાથી આ રાજ્યોમાં BJP વિરુદ્ધ સમુદાય દ્વારા નિયમિત વિરોધ જોવા મળી રહ્યો છે. એવું કહેવાય છે કે, BJPની મુખ્ય વોટ બેંક રાજપૂતો પ્રથમ બે તબક્કામાં મતદાન મથકોથી દૂર રહ્યા હતા. અહીં તમને જણાવી દઈએ કે, ક્ષત્રિય સમાજના સતત વિરોધ પછી પણ પરષોત્તમ રૂપાલાએ પોતાનું નામાંકન પાછું ખેંચ્યું ન હતું. ત્યારથી ગુજરાતમાં ક્ષત્રિય સમાજ BJPના તમામ ઉમેદવારોનો ભગવા ઝંડા સાથે ધાર્મિક રથ લઈને વિરોધ કરી રહ્યો છે.

ક્ષત્રિય પુરુષો BJPની સભાઓમાં પહોંચીને સૂત્રોચ્ચાર કરી રહ્યા છે. રૂપાલાના વિરોધમાં ક્ષત્રિય મહિલાઓ ઉપવાસ કરી રહી છે. રૂપાલાએ મીટીંગ દરમિયાન કહ્યું હતું કે, 'હું અહીંના તમામ નેતાઓને વિનંતી કરું છું કે, ક્ષત્રિય સમાજના આગેવાનો સાથે સમજણનો નવો સેતુ બાંધવાનો પ્રયાસ કરો. હું આ અપીલ ચૂંટણીને કારણે નથી કરી રહ્યો. તે જીત અને હાર વિશે પણ નથી. આ એક એવો વિષય છે જે આપણા સામાજિક જીવનના સંબંધોને સ્પર્શે છે. હું ક્ષત્રિય સમાજને વિનંતી કરું છું કે તેને રાજનીતિથી દૂર રાખો.'

રૂપાલા પાટીદાર સમાજમાંથી આવે છે. બ્રિટિશ શાસન દરમિયાન ભૂતપૂર્વ ક્ષત્રિય શાસકો વિરુદ્ધ તેમની કથિત ટિપ્પણીઓ પછી સમુદાય તેમની સામે વિરોધ કરી રહ્યો છે. 23 માર્ચે સોશિયલ મીડિયા પર એક વીડિયો વાયરલ થયો હતો, જેમાં રૂપાલાને રાજકોટમાં એક દલિત કાર્યક્રમમાં બોલતા બતાવવામાં આવ્યા હતા. વીડિયોમાં, તે કથિત રીતે કહેતા સાંભળવામાં આવ્યો હતો, 'અંગ્રેજોએ આપણા પર શાસન કર્યું... તેઓએ આપણા પર અત્યાચાર કરવામાં કોઈ કસર છોડી ન હતી. રાજાઓ પણ નમી ગયા. તેઓએ (રાજાઓ) તેમની (બ્રિટિશરો) સાથે ખાવાનું ખાધું અને તેમની સાથે તેમની પુત્રીઓના લગ્ન પણ કર્યા. પરંતુ આપણા રૂખી (દલિત) સમુદાયે ન તો પોતાનો ધર્મ બદલ્યો કે ન તો અંગ્રેજો સાથે મૈત્રીપૂર્ણ સંબંધો સ્થાપ્યા, જ્યારે તેમના પર સૌથી વધુ અત્યાચારો થયા હતા.' આ નિવેદન પર ક્ષત્રિય સંગઠનોએ રોષ વ્યક્ત કર્યો હતો.

ક્ષત્રિય સમાજની માંગ છે કે, ક્યાં તો 69 વર્ષીય રૂપાલા સ્વેચ્છાએ લોકસભાની ચૂંટણીમાંથી ખસી જાય અથવા BJPએ તેમની ટિકિટ રદ કરવી જોઈએ. પરંતુ BJPએ રૂપાલાની ટિકિટ જાળવી રાખી છે. જેને લઈને ક્ષત્રિયોએ 24 એપ્રિલે રૂપાલા સામે પોતાનો વિરોધ શરૂ કર્યો હતો. સમાજના આગેવાનોએ મહેસાણા, આણંદ, સુરત અને જામનગરમાં ક્ષત્રિય સંમેલનોનું આયોજન કર્યું હતું. ક્ષત્રિયના ગુસ્સાને શાંત કરવા માટે, ગુજરાત BJP પ્રમુખ C.R. પાટીલે તેમના ગાંધીનગર નિવાસસ્થાને CM ભૂપેન્દ્ર પટેલની હાજરીમાં સમુદાયના નેતાઓ સાથે બેઠક પણ યોજી હતી. તેમણે કહ્યું, 'ક્ષત્રિય સમુદાય હંમેશા BJP સાથે જોડાયેલો છે. 3 એપ્રિલે, અમે ક્ષત્રિય સમાજની 90 સંકલન સમિતિના વડાઓ સાથે બેઠક યોજી અને તેમને સમજાવ્યા. પરષોત્તમ રૂપાલાએ બંને હાથ જોડીને તેમની ટિપ્પણી બદલ ક્ષત્રિય સમાજની માફી માંગી છે. ક્ષત્રિય સમાજે રૂપાલાને મોટું મન રાખીને માફ કરી દેવું જોઈએ.'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.