વન વિભાગના નવા વડા તરીકે 1990 બેચના IFS અધિકારી ડૉ.એ.પી.સિંહની નિમણૂક

ઈન્ડિયન ફોરેસ્ટ સર્વિસના 1990 બેચના IFS ઓફિસર ડૉ.એ.પી.સિંહની વન વિભાગના નવા વડા તરીકે નિમણૂક કરવામાં આવી છે. તેમને ગુજરાતના અગ્ર મુખ્ય વન સંરક્ષક અને ફોરેસ્ટ ફોર્સ વિભાગના વડા તરીકે નિયુક્ત કરવામાં આવ્યા છે. ડૉ.એ.પી.સિંહ એ M.Sc (પ્લાન્ટ સાયન્સ) કર્યું છે અને ગુજરાત રાજ્યમાં ઔષધીય છોડની વિવિધતા અને ફાર્માસ્યુટિકલ ઉદ્યોગોમાં Ph.D. કર્યું છે.

1992માં ડૉ. એ.પી. સિંહ ગુજરાત વન વિભાગમાં મદદનીશ વન સંરક્ષક (ACF) તરીકે જોડાયા હતા અને 1994 સુધી રાજપીપળા, ડાંગ અને દેવગઢ બારિયા ફોરેસ્ટ ડિવિઝનમાં સર્વિસ આપી હતી. 1995થી 1998 સુધી તેમણે સાબરકાંઠામાં સામાજિક વનીકરણ વિભાગમાં નાયબ વન સંરક્ષક (DCF) તરીકે કામ કર્યું હતું. ત્યારબાદ તેમણે વર્ષ 1998 થી 2000 સુધી રાજ્ય સિલ્વીકલ્ચરિસ્ટ તરીકે ડીસીએફ, સિલ્વીકલ્ચર, રાજપીપળા અને ત્યારબાદ વર્ષ 2000 થી 2003 સુધી ભરૂચ અને સુરત જિલ્લાઓને આવરી લઈ સીએફ, રાજપીપળા (પશ્ચિમ) ફોરેસ્ટ ડિવિઝનમાં તરીકે જવાબદારી સંભાળી.

ત્યાર બાદ ડૉ. એ.પી. સિંહ ઇન્ડિયન સિસ્ટમ ઓફ મેડિસિન અને હોમિયોપેથીના ડિરેક્ટર તરીકે નિયુક્ત થયા હતા અને 2003થી 2008 દરમિયાન આરોગ્ય અને પરિવાર કલ્યાણ વિભાગ હેઠળ આયુર્વેદ, હોમિયોપેથીના ડિરેક્ટર તરીકે વિવિધ ક્ષમતાઓમાં સર્વિસ આપી હતી. ગુજરાત મેડિસિનલ પ્લાન્ટ્સ બોર્ડના સભ્ય સચિવ; ગુજરાત આયુર્વેદિક વિકાસ મંડળના પ્રમુખ અને હોમિયોપેથિક કાઉન્સિલ ઓફ ગુજરાતના એડમિનિસ્ટ્રેટર તરીકે કામ કર્યું હતું. તેમણે ગુજરાતની ઔષધીય વનસ્પતિઓની વિવિધતાના વિકાસ અને સંરક્ષણ માટે કાર્યરત સ્વતંત્ર રાજ્ય ઔષધીય વનસ્પતિ બોર્ડની રચના કરી છે. 2008થી 2011 સુધી, તેમણે અરણ્ય ભવનમાં JICA પ્રોજેક્ટમાં વન સંરક્ષક તરીકે કામ કર્યું અને ત્યારબાદ વર્ષ 2011 થી 2014 સુધી, તેમણે ગુજરાત જૈવવિવિધતા બોર્ડ, ગાંધીનગરના સભ્ય સચિવ તરીકે કામ કર્યું હતું.

ત્યારબાદ તેમને જુનાગઢમાં વન્યપ્રાણી વર્તુળમાં મુખ્ય વન સંરક્ષક તરીકે નિયુક્ત કરવામાં આવ્યા હતા, જ્યાં તેમણે વર્ષ 2015 થી 2018 સુધી ફરજ બજાવી હતી. તેમના કાર્યકાળ દરમિયાન 2015માં 14 મી સિંહ ગણતરી હાથ ધરવામાં આવી હતી. ગીર અભયારણ્યની અધિસૂચના (ગોલ્ડન જ્યુબિલી) ના 50 માં વર્ષની ઉજવણી પણ વર્ષભર કરવામાં આવી હતી.

વર્ષ 2018-2019 સુધી તેમણે મુખ્ય વન સંરક્ષક, વર્કિંગ પ્લાન સર્કલ, સુરત તરીકે સેવા આપી હતી. ત્યારબાદ વર્ષ 2019 થી 2023 સુધી, તેમણે ગાંધીનગરમાં આવેલા અરણ્ય ભવનમાં મોનિટરિંગ અને મૂલ્યાંકન વિભાગમાં APCCF તરીકે અને વર્ષ 2023 થી અગ્ર મુખ્ય વન સંરક્ષક, સામાજિક વનીકરણ, ગુજરાત રાજ્ય તરીકે કામ કર્યું હતું. દરમિયાન, વન કવચ, હરિત વસુંધરા, કૃષિ વનીકરણ, હરિત વન પથ, શહેરી વનીકરણ જેવી વિવિધ નવી યોજનાઓ શરૂ કરવામાં આવી હતી અને અસરકારક રીતે અમલમાં મૂકવામાં આવી હતી. ઈન્ડિયા સ્ટેટ ઑફ ફોરેસ્ટ રિપોર્ટ, 2023 (ISFR, 2023) મુજબ, રાજ્યનું વૃક્ષ આવરણ વર્ષ 2021 ના 2.80% થી નોંધપાત્ર રીતે વધીને વર્ષ 2023 માં 3.38% થયું હતું.

નોંધનીય છે કે, IFS ડૉ. એ.પી. સિંહને વનસંવર્ધન, વન્યજીવન, સામાજિક વનીકરણ, ઔષધીય છોડ, જૈવવિવિધતા, બાહ્ય સહાયતા પ્રાપ્ત પ્રોજેક્ટ્સ વગેરેનો બહોળો અનુભવ છે. તેમણે સાબરકાંઠા જિલ્લાની કાર્યકારી યોજના પણ લખી છે અને પોરબંદર જિલ્લાની કાર્યકારી યોજના લખવા માટે માર્ગદર્શન આપ્યું છે અને ગીર રાષ્ટ્રીય ઉદ્યાન અને અભયારણ્ય મેનેજમેન્ટ પ્લાનની મધ્ય-ગાળાની સમીક્ષા કરી છે. તેમણે વિવિધ સંશોધન પત્રો અને લેખો તેમ જ ગુજરાતની આક્રમક એલિયન પ્રજાતિઓ પર પુસ્તક પણ લખ્યું છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.