રદ્દ થઈ શકે છે એશિયા કપ, BCCIની મોટી ટૂર્નામેન્ટ કરવાની તૈયારી, પાકિસ્તાનને ફટકો

એશિયા કપને લઈને BCCI અને PCB વચ્ચે પહેલેથી જ વિવાદ ચાલી રહ્યો છે. હવે સમાચાર આવી રહ્યા છે કે આ ODI ટૂર્નામેન્ટ રદ્દ થઈ શકે છે. દરમિયાન, ભારતીય ક્રિકેટ બોર્ડ ઘરઆંગણે બહુરાષ્ટ્રીય ટૂર્નામેન્ટ યોજવાની તૈયારીમાં વ્યસ્ત છે. પાકિસ્તાન માટે આ કોઈ મોટા ઝટકાથી ઓછું નથી.

પાકિસ્તાન ક્રિકેટ બોર્ડના હાઇબ્રિડ મોડલને 3 ક્રિકેટ બોર્ડે નકારી કાઢ્યું છે. BCCI પહેલેથી જ ODI એશિયા કપને તટસ્થ સ્થળે યોજવાની વાત કરી રહ્યું હતું, પરંતુ PCB તેના માટે તૈયાર નહોતું. હવે બાંગ્લાદેશ, અફઘાનિસ્તાન અને શ્રીલંકા ક્રિકેટ બોર્ડે PCBના હાઇબ્રિડ મોડલને નકારી કાઢ્યું છે. PCBના અધ્યક્ષ નજમ સેઠીએ વારંવાર કહ્યું છે કે, જો ટૂર્નામેન્ટ પાકિસ્તાનને બદલે તટસ્થ સ્થળે યોજાશે તો તેઓ ટૂર્નામેન્ટમાં ભાગ લેશે નહીં. હવે સમાચાર આવી રહ્યા છે કે આ વર્ષનો એશિયા કપ રદ્દ થઈ શકે છે. આ દરમિયાન BCCI ઘરઆંગણે બહુરાષ્ટ્રીય ટૂર્નામેન્ટનું આયોજન કરી શકે છે.

PCB એશિયા કપ માત્ર તટસ્થ સ્થળો પર યોજવા પર અડગ છે. એશિયન ક્રિકેટ કાઉન્સિલના એક સૂત્રએ મીડિયા સૂત્રોને જણાવ્યું કે, આ વર્ષે એશિયા કપ સંપૂર્ણપણે રદ્દ થઈ શકે તેવી શક્યતા છે. ભારત, શ્રીલંકા, બાંગ્લાદેશ અને અફઘાનિસ્તાન વર્લ્ડ કપ પહેલા 50 ઓવરના ફોર્મેટમાં બહુરાષ્ટ્રીય ટૂર્નામેન્ટ રમી શકે છે. એશિયા કપ ન થવાના કિસ્સામાં, ભારત એક જ સમયે ઘરઆંગણે 4 કે 5 દેશોની ટુર્નામેન્ટનું આયોજન કરવાની તૈયારી કરી રહ્યું છે. તેને ઓક્ટોબર-નવેમ્બરમાં યોજાનાર વર્લ્ડ કપની તૈયારી તરીકે પણ જોવામાં આવી રહ્યું છે.

સૂત્રએ કહ્યું કે, જો પાકિસ્તાન નહીં રમે તો પણ તેને એશિયા કપ કહેવામાં આવશે, પરંતુ બ્રોડકાસ્ટર પાકિસ્તાનની ગેરહાજરીમાં સોદા પર ફરીથી વાટાઘાટ કરશે. શ્રીલંકા, બાંગ્લાદેશ, અફઘાનિસ્તાન અને ભારતે એવું વલણ અપનાવ્યું છે કે એશિયા કપની યજમાની પાકિસ્તાન તેમ જ અન્ય કોઈ દેશમાં કરવી એ તર્કસંગત અથવા નાણાકીય રીતે શક્ય નથી. તેનું આયોજન શ્રીલંકામાં થવું જોઈએ, કારણ કે ભારત પાકિસ્તાનની યાત્રા કરી શકે નહીં.

સૂત્રએ જણાવ્યું હતું કે, આ વર્ષે એશિયા કપનું આયોજન નહિ થાય તેવી પૂરી સંભાવના છે, કારણ કે પાકિસ્તાન અને ભારત વચ્ચેની મેચો વિના બ્રોડકાસ્ટર્સ એ જ રકમ ઓફર કરે તેવી શક્યતા નથી જે તેઓ ACCને ઓફર કરી હોત જો પાકિસ્તાન હાજર હોત. તાજેતરની ઘટનાઓ પાકિસ્તાનને તેની ટીમને વર્લ્ડ કપ માટે ભારત ન મોકલવા માટે દબાણ કરી શકે છે. PCB પહેલા પણ આવી ધમકીઓ આપી ચૂક્યું છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.