શું ગંભીરે ખેલાડીઓને ખખડાવી નાખ્યા? તેણે જ આપ્યો જવાબ, રોહિત પાંચમી મેચમાં...

બોર્ડર-ગાવસ્કર ટ્રોફી (BGT) 2024-25 હેઠળ ભારત અને ઓસ્ટ્રેલિયા વચ્ચે પાંચ મેચની ટેસ્ટ શ્રેણી રમાઈ રહી છે. ભારતીય ટીમ ટેસ્ટ શ્રેણીમાં 1-2થી પાછળ છે. હવે સિરીઝની છેલ્લી મેચ સિડની ક્રિકેટ ગ્રાઉન્ડ (SCG) પર 3 જાન્યુઆરી (શુક્રવાર)થી રમાશે. ભારતીય સમય અનુસાર આ મેચ સવારે 5 વાગ્યે શરૂ થશે.

સિડની ટેસ્ટના એક દિવસ પહેલા ભારતીય ટીમના મુખ્ય કોચ ગૌતમ ગંભીરે પ્રેસ કોન્ફરન્સ સંબોધી હતી. આ દરમિયાન ગંભીરે કંઇક એવી વાતો કહી, જેના કારણે એવું લાગી રહ્યું છે કે ટીમની અંદરનું વાતાવરણ બરાબર લાગતું નથી. ગંભીરે કહ્યું કે, ડ્રેસિંગ રૂમની 'ડિબેટ્સ'ને સાર્વજનિક ન કરવી જોઈએ અને તેણે ખેલાડીઓ સાથે 'ઈમાનદારીથી' વાત કરી, કારણ કે માત્ર સારું પ્રદર્શન જ તેમને ટીમમાં રાખી શકે છે. ડ્રેસિંગ રૂમમાં તણાવના અહેવાલો વચ્ચે ગંભીરે કહ્યું કે તે માત્ર અહેવાલો છે, સત્ય નથી.

ગૌતમ ગંભીરે કહ્યું, 'જ્યાં સુધી ડ્રેસિંગ રૂમમાં ઈમાનદાર લોકો છે, ત્યાં સુધી ભારતીય ક્રિકેટ સુરક્ષિત હાથમાં છે. માત્ર એક જ વસ્તુ છે જે તમને ત્યાં રાખે છે અને તે છે તમારું પ્રદર્શન છે. કોચ અને ખેલાડી વચ્ચેની વાતચીત ડ્રેસિંગ રૂમમાં જ રહેવી જોઈએ. ડ્રેસિંગ રૂમમાં થયેલી કોઈપણ ચર્ચા રૂમની બહાર ન જવી જોઈએ.'

ગૌતમ ગંભીર કહે છે, 'બધું બરાબર છે, અમે આવતીકાલે વિકેટ જોઈને અંતિમ ઈલેવનની જાહેરાત કરીશું. ડ્રેસિંગ રૂમમાં પ્રામાણિકતા મહત્વપૂર્ણ છે. આ એક ટીમ ગેમ છે અને તમે બધા તેને સ્વીકારો છો. આ માત્ર અહેવાલો છે, સત્ય નથી. મારે કોઈ રિપોર્ટ પર ટિપ્પણી કરવાની જરૂર નથી. પ્રામાણિકતા મહત્વપૂર્ણ છે, અમે આગળ વધવા માંગીએ છીએ અને કેટલીક સારી વસ્તુઓ પ્રાપ્ત કરવા માંગીએ છીએ.'

ગંભીરે એ પણ કહ્યું કે, તેણે સિનિયર બેટ્સમેન વિરાટ કોહલી અને કેપ્ટન રોહિત શર્મા સાથે ટેસ્ટ મેચ જીતવાની રણનીતિ સિવાય કોઈ વાત કરી નથી, તેણે કહ્યું, 'દરેક ખેલાડી જાણે છે કે તેણે ક્યાં સુધારો કરવો છે. અમે તેમની સાથે માત્ર ટેસ્ટ મેચ કેવી રીતે જીતવી તે અંગે જ વાત કરી છે.'

ગૌતમ ગંભીરને એવું પણ પૂછવામાં આવ્યું કે શું રોહિત શર્મા કાલે રમશે? આના પર ગંભીરે કહ્યું, 'કાલે પિચ જોયા પછી અમે ટોસ સમયે પ્લેઈંગ ઈલેવન નક્કી કરીશું.' સિડની ટેસ્ટ પહેલા ભારતને મોટો ફટકો પડ્યો છે. ફાસ્ટ બોલર આકાશ દીપ પીઠની સમસ્યાને કારણે સિડની ટેસ્ટમાંથી બહાર થઈ ગયો છે. જોકે તેમણે તેનો વિકલ્પ જાહેર કર્યો ન હતો.

આકાશ દીપ વિશે ગૌતમ ગંભીરે કહ્યું કે, 'તે પીઠની સમસ્યાને કારણે બહાર છે. 28 વર્ષીય આકાશ દીપે બે ટેસ્ટ મેચોમાં કુલ 87.5 ઓવર ફેંકી હતી અને તેની સમસ્યા ભારે વર્કલોડના પરિણામે હોઈ શકે છે. આકાશે બ્રિસ્બેન અને મેલબોર્નમાં બે ટેસ્ટ રમીને પાંચ વિકેટ લીધી છે. તે કમનસીબ હતો કે, તેની બોલિંગ કરતી વખતે બંને મેચમાં ઘણા કેચ છૂટી ગયા હતા. આકાશની જગ્યાએ હર્ષિત રાણા અથવા પ્રસિદ્ધ કૃષ્ણમાંથી કોઈ એકને અંતિમ પ્લેઈંગ ઈલેવનમાં સ્થાન મેળવી શકે છે.

સિડની ટેસ્ટ માટે ઓસ્ટ્રેલિયાના પ્લેઈંગ ઈલેવન: સેમ કોન્સ્ટાસ, ઉસ્માન ખ્વાજા, માર્નસ લાબુશેન, સ્ટીવ સ્મિથ, ટ્રેવિસ હેડ, બ્યુ વેબસ્ટર, એલેક્સ કેરી (વિકેટકીપર), પેટ કમિન્સ, મિશેલ સ્ટાર્ક, નાથન લિયોન, સ્કોટ બોલેન્ડ.

ભારતની ટીમઃ રોહિત શર્મા (કેપ્ટન), જસપ્રિત બુમરાહ (વાઈસ-કેપ્ટન), યશસ્વી જયસ્વાલ, KL રાહુલ, અભિમન્યુ ઈસ્વરન, દેવદત્ત પડિકલ, શુભમન ગિલ, વિરાટ કોહલી, રીષભ પંત, સરફરાઝ ખાન, ધ્રુવ જુરેલ, રવિન્દ્ર જાડેજા, મોહમ્મદ સિરાજ, પ્રસિદ્ધ કૃષ્ણ, હર્ષિત રાણા, નીતિશ કુમાર રેડ્ડી, વોશિંગ્ટન સુંદર, તનુષ કોટિયન.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.