આટલા રૂપિયા ચૂકવો અને દુનિયાના સૌથી શક્તિશાળી દંપત્તિ સાથે પ્રાઇવેટ ડીનર કરો

રિપબ્લિકન પાર્ટીના ધનિક સમર્થકોને અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પ અને ભાવિ ફર્સ્ટ લેડી મેલાનિયા ટ્રમ્પ સાથે ખાનગી રાત્રિભોજન કરવાની અને અંગત સમય વિતાવવાનો મોકો છે, પરંતુ આ માટે તેમને ભારે કિંમત ચૂકવવી પડશે, જે લગભગ 20 લાખ ડૉલર છે. (લગભગ રૂ. 17 કરોડ).

મીડિયા સૂત્રોના જણાવ્યા અનુસાર, 'ટ્રમ્પ વેન્સ ઈનોગ્યુરલ કમિટી બેનિફિટ્સ' નામની જાહેરાત અનુસાર, જે દાતાઓ કેમ્પેન માટે 1 મિલિયન ડૉલર ચૂકવે છે અથવા 2 મિલિયન ડૉલર એકત્ર કરે છે તેઓને 19 જાન્યુઆરીએ વિશ્વના સૌથી શક્તિશાળી દંપત્તિમાંના એકની સાથે સાથે ચાલવા માટે વિશેષ તક પ્રાપ્ત થશે.

રાત્રિભોજનના આ ઉદ્ઘાટન સમારોહને 'શિખર સમારોહ' તરીકે બતાવવામાં આવી રહ્યો છે, જેમાં ઉપસ્થિત લોકોને 20 જાન્યુઆરીએ ટ્રમ્પના ઉદ્ઘાટનની છ ટિકિટો પણ મળી શકે છે. આ ફ્લાયર મેલાનિયા ટ્રમ્પના ઉદ્ઘાટન સમારોહમાં ભાગીદારીની પુષ્ટિ કરે છે.

2024ના ચૂંટણી પ્રચાર દરમિયાન તે મોટાભાગે લાઈમલાઈટથી દૂર રહ્યા હતા. તેમણે અમુક જ કાર્યક્રમોમાં ભાગ લીધો હતો. અહેવાલો સૂચવે છે કે, તેઓ તેમના પતિના બીજા કાર્યકાળ દરમિયાન જાહેરમાં ઓછા દેખાઈ શકે એમ છે. તેઓ ન્યૂયોર્ક સિટીમાં પોતાનો સમય વિતાવી શકે છે, જ્યાં તેમનો પુત્ર બૈરન ટ્રમ્પ અભ્યાસ કરી રહ્યો છે.

વિશિષ્ટ દાતાઓ કેટલાક અન્ય લાભો પણ મેળવી શકે છે, જેમાં ટ્રમ્પના કેબિનેટના નોમિનીઓ સાથે સ્વાગત અને ઉપપ્રમુખ-ચુંટાયેલા સેનેટર જેડી વેન્સ અને તેમની પત્ની ઉષા સાથે અલગ ડિનરનો સમાવેશ થાય છે.

મીડિયા સૂત્રોના એક અહેવાલ મુજબ, જેઓ 50,000 ડૉલર અને 1 મિલિયન ડૉલર વચ્ચે યોગદાન આપે છે, તેઓને ઉદ્ઘાટનની સાંજે 'સ્ટારલાઇટ બોલ'માં હાજરી આપવાની તક મળશે.

ઉદઘાટન સમારોહ માટે ખાનગી ભંડોળ ઊભું કરવું એ નવા રાષ્ટ્રપતિઓ માટે સામાન્ય પ્રથા છે, કારણ કે કરદાતાના નાણાં સત્તાવાર સમારંભો જેવા કે શપથ ગ્રહણ અને કેપિટોલમાં ઉદ્ઘાટન ભોજન સમારંભો માટે ફાળવવામાં આવે છે. ખાનગી દાનમાં ઉદ્ઘાટન પરેડ, સંગીત સમારોહ અને બોલ જેવા કાર્યક્રમોનો સમાવેશ થાય છે.

ઈન્ડિપેન્ડન્ટ મુજબ, પ્રમુખ જો બાઇડેનની ઉદ્ઘાટન સમિતિએ 2021માં લોકો તરફથી 500,000 ડૉલર અને કોર્પોરેશનો તરફથી 1 મિલિયન ડૉલર સુધીનું દાન સ્વીકાર્યું હતું, જ્યારે બરાક ઓબામાએ 2009માં તેમના પ્રથમ ઉદ્ઘાટન માટે 53 મિલિયન ડૉલર એકત્ર કર્યા હતા.

અગાઉની ઉદઘાટન સમિતિઓથી વિપરીત, ટ્રમ્પ વેન્સ કમિટી કરના હેતુઓ માટે રાજકીય બિનનફાકારક તરીકે બનાવવામાં આવી છે અને તેમાં દાન આપવા માટેની કોઈ મર્યાદા નથી. 2016માં ટ્રમ્પની પ્રથમ ઉદ્ઘાટન સમિતિને લઈને થયેલા વિવાદોને જોતા આ કમિટીથી લોકોને આશ્ચર્ય થયું છે.

આ પ્રયાસે રેકોર્ડ 107 મિલિયન ડૉલર એકત્ર કર્યા, જેમાંથી કેટલાક દાનની માહિતી કથિત ગેરકાયદે વિદેશી દાનની તપાસ કરતી ફેડરલ એજન્સી પાસે ગયા, પરિણામે એક દાતાને 12 વર્ષની જેલની સજા થઈ હતી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.