LPG સિલિન્ડર થયો મોંઘો, આજથી થઈ રહ્યા છે આ 6 ફેરફાર, તમારા ખિસ્સા પર પડશે અસર

આજથી નવું વર્ષ 2023 શરૂ થયું છે અને પહેલા જ દિવસથી સામાન્ય માણસ સાથે જોડાયેલા ઘણા મહત્વપૂર્ણ ફેરફારો થયા છે. આવા ઘણા ફેરફારો છે, જેની સીધી અસર તમારા નાણાકીય વ્યવસ્થા પર પડશે. બેંકિંગ સંબંધિત નિયમોથી લઈને LPG સિલિન્ડરની કિંમતમાં ફેરફાર કરવામાં આવ્યા છે. જાણો આજથી કયા મોટા ફેરફારો થઈ રહ્યા છે.

ગેસ કંપનીઓ દર મહિનાની પહેલી તારીખે LPGના ભાવમાં ફેરફાર કરે છે. આવી સ્થિતિમાં નવા વર્ષની શરૂઆતમાં અથવા તો 1 જાન્યુઆરી 2023ના રોજ પણ LPG સિલિન્ડરની કિંમતોમાં મોટો ફેરફાર કરવામાં આવ્યો છે. 1 જાન્યુઆરી 2023થી કોમર્શિયલ સિલિન્ડરના ભાવમાં વધારો થયો છે. તે જ સમયે, ઘરેલુ ગેસ સિલિન્ડરની કિંમતો યથાવત છે. હવે કોમર્શિયલ સિલિન્ડર માટે 25 રૂપિયા વધુ ખર્ચવા પડશે. દિલ્હીમાં હવે કોમર્શિયલ સિલિન્ડર 1769 રૂપિયામાં મળશે. જ્યારે મુંબઈમાં તેની કિંમત 1721 રૂપિયા, કોલકાતામાં 1870 રૂપિયા અને ચેન્નાઈમાં 1917 રૂપિયા હશે.

1 જાન્યુઆરી, 2023થી GST ઈ-ઈનવોઈસિંગ અથવા ઈલેક્ટ્રોનિક બિલના નિયમોમાં ફેરફાર થવા જઈ રહ્યો છે. સરકારે ઈ-ઈનવોઈસિંગ માટે 20 કરોડ રૂપિયાની મર્યાદા ઘટાડીને 5 કરોડ રૂપિયા કરી દીધી છે. આ નિયમ 2023ના પહેલા દિવસથી લાગુ થશે. આ નિયમ લાગુ થવાથી હવે એવા ઉદ્યોગપતિઓ માટે ઈલેક્ટ્રોનિક બિલ જનરેટ કરવું જરૂરી બનશે જેમનો વાર્ષિક 5 કરોડથી વધુનો બિઝનેસ છે.

રિઝર્વ બેંક ઓફ ઈન્ડિયા (RBI) દ્વારા બહાર પાડવામાં આવેલી નવી માર્ગદર્શિકા અનુસાર, 1 જાન્યુઆરી, 2023થી, બેંક લોકર સંબંધિત નિયમોમાં ફેરફાર થવા જઈ રહ્યો છે. નવા નિયમો લાગુ થયા બાદ બેંકો નિયંત્રણમાં આવી જશે અને તેઓ બેંક લોકરને લઈને ગ્રાહકો સાથે મનમાની કરી શકશે નહીં. આ પછી બેંકોની જવાબદારી વધુ વધશે. કારણ કે લોકરમાં રાખેલા ગ્રાહકના સામાનને કોઈ પણ કારણસર નુકસાન થશે તો તેની જવાબદારી બેંકની રહેશે. અહીંયા તમને જણાવી દઈએ કે, ગ્રાહકોએ 31 ડિસેમ્બર સુધી બેંક સાથે એક કરાર પર હસ્તાક્ષર કરવા પડશે, જેના દ્વારા ગ્રાહકોને SMS અને અન્ય માધ્યમો દ્વારા લોકરના નિયમોમાં ફેરફાર વિશે જાણ કરવામાં આવશે.

ખાનગી ક્ષેત્રની બેંક HDFCએ તેના ક્રેડિટ કાર્ડના નિયમોમાં ફેરફાર કરવાનો નિર્ણય કર્યો છે, જે 1 જાન્યુઆરી 2023થી અમલમાં આવી રહ્યો છે. જો તમે આ બેંકના ક્રેડિટ કાર્ડનો ઉપયોગ કરી રહ્યાં છો, તો તમારા માટે આ ફેરફારને જાણવો મહત્વપૂર્ણ છે. વાસ્તવમાં, HDFC ક્રેડિટ કાર્ડના પેમેન્ટ પર મળતા રિવોર્ડ પોઈન્ટનો નિયમ બદલાવા જઈ રહ્યો છે. તમારા માટે 31 ડિસેમ્બર 2022 સુધીમાં તમારા બધા રિવોર્ડ પૉઇન્ટની ચુકવણી કરવી વધુ સારું રહેશે.

જો તમે પણ નવા વર્ષમાં તમારા અથવા તમારા પરિવાર માટે કાર ખરીદવાનું વિચારી રહ્યા છો, તો તમારે વધુ ખર્ચ કરવો પડી શકે છે. વાસ્તવમાં, 2023ની શરૂઆતથી, મારુતિ સુઝુકી, MG મોટર્સ, હ્યુન્ડાઈ, રેનોથી લઈને ઓડી અને મર્સિડીઝ જેવી કંપનીઓ તેમના વાહનોની કિંમતમાં વધારો કરવા જઈ રહી છે. ટાટા દ્વારા 2 જાન્યુઆરી, 2023થી તેના કોમર્શિયલ વાહનોની કિંમતમાં વધારો કરવાની જાહેરાત પણ કરવામાં આવી છે.

આ પાંચ મોટા ફેરફારો સાથે, 1 જાન્યુઆરી, 2023થી, એક નવો નિયમ ફોન ઉત્પાદક કંપનીઓ અને તેની આયાત-નિકાસ કરનારી કંપનીઓ માટે પણ આવશે. આ અંતર્ગત કંપનીઓ માટે દરેક ફોનના IMEI નંબરનું રજીસ્ટ્રેશન જરૂરી રહેશે. ટેલિકોમ્યુનિકેશન વિભાગે IMEI સાથે છેડછાડના મામલાઓને રોકવા માટે આ તૈયારી કરી છે. વિદેશી પ્રવાસીઓ સાથે ભારતમાં આવેલા ફોનનું રજિસ્ટ્રેશન પણ ફરજિયાત રહેશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.