જો તમે મારુતિ સુઝુકીનું કોઈ વાહન ખરીદવાની ઈચ્છા રાખો છો તો, આ ખબર તમને નિરાશ કરશે. કારણ કે, કંપનીએ પોતાના વાહનોની કિંમતમાં વધારો કરવાનો નિર્ણય કર્યો છે. ખરેખર પાછલાં કેટલાક વર્ષોથી ઘણું નુકસાન સહન કર્યા પછી દરેક વાહન નિર્માતા કંપની આ પ્રકારનો નિર્ણય લેવા માટે મજબુર બની છે.
દેશની સૌથી મોટી કાર નિર્માતા કંપની મારુતિ સુઝુકી ટૂંક સમયમાં જ પોતાના વાહનોની કિંમતમાં વધારો કરવા જઈ રહી છે. કંપનીએ આજે તેના તમામ વાહનોની કિંમતમાં વધારો કરવાની જાહેરાત કરી છે, જે 1 એપ્રિલ 2023થી અમલમાં આવશે. જો કે કંપનીએ હજુ સુધી એ માહિતી શેર કરી નથી કે વાહનોની કિંમતમાં કેટલો વધારો કરવામાં આવશે.
મારુતિ સુઝુકીએ આજે ગુરુવારે જાહેરાત કરી હતી કે, કંપની એપ્રિલ 2023માં કિંમતોમાં વધારો કરશે. કંપનીનું કહેવું છે કે, મેન્યુફેક્ચરિંગ વાહનોની કિંમતમાં વધારાને કારણે વાહનોની કિંમતમાં આ વધારો કરવામાં આવી રહ્યો છે. કંપનીએ સ્ટોક એક્સચેન્જ ફાઇલિંગમાં જણાવ્યું હતું કે, 'મારુતિ સુઝુકી સતત ખર્ચ ઘટાડવા અને વધારાને આંશિક રીતે સરભર કરવાનો પ્રયાસ કરી રહી છે, પરંતુ તેમ છતાં કિંમત વધારવી જરૂરી બની ગઈ છે.' મારુતિ સુઝુકીએ હજુ સુધી જણાવ્યું નથી કે વાહનોની કિંમતમાં કેટલો વધારો કરવામાં આવશે. તે વિવિધ મોડેલો પર આધાર રાખે છે.
કંપનીએ ચાલુ નાણાકીય વર્ષમાં બીજી વખત કિંમતમાં વધારો કર્યો છે. આ પહેલા એપ્રિલ 2022માં વાહનોની કિંમતમાં વધારો કરવામાં આવ્યો હતો. મારુતિ સુઝુકીએ ગયા વર્ષે ડિસેમ્બરમાં કહ્યું હતું કે તે વધતા ખર્ચની અસરને ઘટાડવા માટે તેના વાહનોની કિંમતોમાં વધારો કરશે.
મારુતિ સુઝુકી ઉપરાંત, દેશની સૌથી મોટી ટુ-વ્હીલર ઉત્પાદક Hero MotoCorpએ પહેલાથી જ જાહેરાત કરી હતી કે કંપની 1 એપ્રિલથી તેના વાહનોની લાઇન-અપની કિંમતો વધારશે. હીરો મોટોકોર્પનું પણ કહેવું છે કે, ઉત્પાદન ખર્ચમાં વધારાને કારણે વાહનોની કિંમતમાં વધારો કરવામાં આવી રહ્યો છે. Hero MotoCorpની બાઇક અને સ્કૂટરની કિંમતમાં લગભગ 2 ટકાનો વધારો કરવામાં આવશે.
Hero MotoCorpએ જણાવ્યું હતું કે OBD2 (ઓન-બોર્ડ ડાયગ્નોસ્ટિક્સ) સંક્રમણને કારણે કિંમતમાં વધારો થવાને કારણે કિંમતમાં સુધારો કરવો જરૂરી બન્યો છે. 1 એપ્રિલથી, વાહનોને રીઅલ-ટાઇમ ડ્રાઇવિંગ ઉત્સર્જન સ્તરને મોનિટર કરવા માટે ઓન-બોર્ડ સ્વ-નિદાન ઉપકરણ હોવું જરૂરી રહેશે. હાલમાં, વાહન ઉત્પાદકો તેમના વાહનોને BS6 ફેઝ-2 માટે તૈયાર કરી રહ્યા છે, જે આવતા મહિનાથી લાગુ કરવામાં આવશે.
15.jpg)
