સિલિકોન વેલી બેંકના ડૂબવાથી ભારતની આ કંપનીને ફટકો, 64 કરોડ રૂપિયા જમા હતા

અમેરિકામાં બેન્કિંગ ક્રાઈસિસની અસર ભારતીય શેરબજાર પર પણ જોવા મળી હતી. સેન્સેક્સ અને નિફ્ટી નજીવા વધારા સાથે કારોબારની શરૂઆત કર્યા બાદ ખરાબ રીતે તૂટી પડ્યા હતા. BSE સેન્સેક્સ 1000 પોઈન્ટથી વધુ લપસી ગયો. દરમિયાન, જ્યાં અમેરિકાથી આવેલા સમાચારે બજારમાં હલચલ મચાવી દીધી છે, તો બીજી તરફ સિલિકોન વેલી બેંક પર લાગેલા તાળાને કારણે ભારતીય કંપની નઝારા ટેક્નોલોજીસની મોટી રકમ ફસાઈ ગઈ છે અને તેનો સ્ટોક પણ કડાકાભેર તૂટ્યો છે.

પહેલાથી જ આશંકા હતી કે, સિલિકોન વેલી બેંકના ડૂબવાની અસર ભારતીય સ્ટાર્ટઅપ પર જોવા મળી શકે છે. તેનું મુખ્ય કારણ એ છે કે SVBએ સ્ટાર્ટઅપ્સને ભંડોળ પૂરું પાડતી બેંક છે. સ્ટાર્ટઅપ ઇકોસિસ્ટમ માટે સૌથી મોટી બેંક સિલિકોન વેલી બેંક (SVB)ની નાદારીએ રાતોરાત આ ક્ષેત્રમાં અનિશ્ચિતતા ઊભી કરી દીધી છે. નઝારા ટેક્નોલોજી કંપનીની બે સબસિડિયરી કંપનીઓની 7.75 મિલિયન ડૉલર (આશરે રૂ. 64 કરોડ)ની રકમ સિલિકોન વેલી બેંકમાં ફસાયેલી છે.

મીડિયાથી પ્રાપ્ત થતાં અહેવાલ મુજબ, કિડોપિયા ઇન્ક અને મીડિયાવર્કઝ ઇન્ક, નઝારા ટેક્નોલોજીસની પેટાકંપનીઓની આ રકમ સિલિકોન વેલી બેંકમાં જમા છે. બેંક ડૂબવાની સાથે જ આ રકમ અટકી જવાના સમાચારની અસર કંપનીના શેર પર જોવા મળી હતી અને સોમવારે સપ્તાહના પ્રથમ કારોબારી દિવસે કંપનીના શેરમાં શરૂઆતના વેપારમાં 7 ટકાનો ઘટાડો થયો હતો. BSE પર લિસ્ટેડ કંપનીનો શેર 6.70 ટકા ઘટીને રૂ. 483.05ની નીચી સપાટીએ પહોંચ્યો હતો.

ગેમિંગ અને સ્પોર્ટ્સ મીડિયા પ્લેટફોર્મ નઝારા ટેકનો સ્ટોક તેની માર્કેટ લિસ્ટેડ કિંમતથી લગભગ 75 ટકા ઘટી ગયો છે. કંપનીનો IPO માર્ચ 2021માં રજૂ કરવામાં આવ્યો હતો. તેની પ્રાઇસ બેન્ડ 1100-1101 રૂપિયા નક્કી કરવામાં આવી હતી. જ્યારે, તેના શેર BSE પર રૂ.1971માં લિસ્ટેડ થયા હતા. તદનુસાર, લિસ્ટિંગ દિવસથી શેરની નવીનતમ કિંમત 75% થી વધુ ઘટી છે. બીજી બાજુ, જો શેરના 52-સપ્તાહના ઉચ્ચ સ્તર સાથે સરખામણી કરવામાં આવે તો, 11 માર્ચ, 2022ના રોજ, તેની કિંમત 933.78 રૂપિયા હતી, જેનો અર્થ છે કે હવે કિંમત 46% ઘટી ગઈ છે.

સિલિકોન વેલી બેંક અમેરિકાની 16મી સૌથી મોટી બેંક છે. તે અમેરિકાની મુખ્ય બેંક છે જે નવા યુગની ટેક કંપનીઓ અને વેન્ચર કેપિટલ ઇન્વેસ્ટમેન્ટ કંપનીઓને નાણાકીય સહાય પૂરી પાડે છે. જોકે, US ફેડરલ રિઝર્વે છેલ્લા 18 મહિનામાં વ્યાજદરમાં વધારો કર્યો છે. જેના કારણે આવી કંપનીઓને ભારે નુકસાન થયું છે. આ એક માત્ર બેંક નથી, પરંતુ અમેરિકાની બીજી મોટી સિગ્નેચર બેંકને પણ બંધ કરી દેવામાં આવી છે.