ટાટા પંચને ટક્કર આપવા આવી રહી છે હ્યુન્ડાઈની સસ્તી SUV! કંપનીએ ટીઝર રીલિઝ કર્યુ

સબ કોમ્પેક્ટ SUV સેગમેન્ટ ભારતીય બજારમાં ઝડપથી લોકપ્રિયતા મેળવી રહ્યું છે. ઓછી કિંમત, સારી માઈલેજ અને ઓછા મેન્ટેનન્સને કારણે લોકો આ સેગમેન્ટની કારને ખૂબ પસંદ કરી રહ્યા છે. તાજેતરમાં ટાટા મોટર્સે આ સેગમેન્ટમાં તેનું નવું ટાટા પંચ લોન્ચ કર્યું, હવે દક્ષિણ કોરિયન કાર ઉત્પાદક હ્યુન્ડાઈ પણ આ સેગમેન્ટમાં તેની નવી મિની-SUV લોન્ચ કરવાની તૈયારી કરી રહી છે. કંપનીએ આજે સોશિયલ મીડિયા પર તેની આગામી SUVનું ટીઝર પણ રીલિઝ કર્યું છે. કહેવામાં આવી રહ્યું છે કે, આ SUV કિંમત અને ફીચર્સના મામલે ટાટા પંચને ટક્કર આપશે.

Hyundaiના ઓફિશિયલ ટ્વિટર હેન્ડલ પરથી આ નવી SUVનું ટીઝર રીલિઝ કરવામાં આવ્યું છે. ટીઝર માત્ર કારનો સાઈડ-વ્યુ મિરર બતાવે છે અને પોસ્ટ લખે છે, 'તમારું સ્થાન લેવા માટે ટૂંક સમયમાં આવી રહ્યું છે, થિંગ આઉટ સાઈડ'. લાંબા સમયથી એવી ચર્ચા ચાલી રહી હતી કે કંપની ટૂંક સમયમાં જ સબ-કોમ્પેક્ટ SUVને માર્કેટમાં રજૂ કરવાની તૈયારી કરી રહી છે, જેને Ai3 કોડનેમ આપવામાં આવ્યું છે. જાણકારી અનુસાર, આ SUV ઓગસ્ટ મહિનામાં વેચાણ માટે લોન્ચ થઈ શકે છે.

આ SUVને વિવિધ પ્રસંગોએ ટેસ્ટિંગ દરમિયાન ઘણી વખત જોવામાં આવી છે. હવે કંપનીએ પહેલીવાર આ SUVનું ટીઝર રીલિઝ કર્યું છે. ભારતીય બજારમાં કંપની દ્વારા ઓફર કરવામાં આવેલી આ સૌથી નાની અને સસ્તી SUV હશે. આ SUVની સાઈઝ ગ્લોબલ માર્કેટમાં વેચાતી Hyundai Casper જેવી જ હશે, એ પણ શક્ય છે કે તેની ડિઝાઇન પણ Casperથી પ્રેરિત હશે.

જો કે Hyundai Ai3 વિશે વધુ માહિતી મળી નથી, પરંતુ શક્ય છે કે, તેની લંબાઈ 3.8 મીટરની આસપાસ હશે. આ સિવાય તેમાં સ્પ્લિટ હેડલેમ્પ સેટઅપ, ડે ટાઈમ રનિંગ લાઈટ્સ વગેરે આપી શકાય છે. આ કાર Hyundaiના K1 પ્લેટફોર્મ પર આધારિત હશે, જેના પર Grand i19 Nios બનાવવામાં આવી છે. બોક્સી લુક અને ડિઝાઈનવાળી SUV ફીચર્સની બાબતમાં વેન્યુ સાથે ઘણું શેર કરી શકે છે.

An all-new SUV coming soon to take you places.#Hyundai #HyundaiIndia #HyundaiCars #ThinkOutside #ComingSoon #ILoveHyundai pic.twitter.com/qPc1oAzRGn

— Hyundai India (@HyundaiIndia) April 5, 2023

Hyundai Ai3માં, કંપની 1.2 લિટર નેચરલ એસ્પિરેટેડ પેટ્રોલ એન્જિન પ્રદાન કરી શકે છે, જે વેન્યુ, ગ્રાન્ડ i10 અને ઓરામાં પણ જોવા મળે છે. શક્ય છે કે, તેને માત્ર પેટ્રોલ એન્જિન સાથે જ ઓફર કરવામાં આવશે અને તેમાં ડીઝલ એન્જિનનો વિકલ્પ નહીં મળે. મીડિયા રિપોર્ટ્સમાં સૂત્રોને ટાંકીને જણાવવામાં આવ્યું છે કે, કંપની આ SUVનું ઉત્પાદન જુલાઈ મહિનાથી ચેન્નાઈમાં તેના પ્લાન્ટમાં શરૂ કરશે. આ SUVને તહેવારોની સિઝનના અવસર પર લોન્ચ કરવામાં આવી શકે છે.