Volvo C40 રિચાર્જ ભારતમાં રજૂ, એક ચાર્જમાં 530 km ભાગશે, આટલી મિનિટમાં થશે ચાર્જ

વોલ્વોએ ભારતીય બજારમાં તેની બીજી ઇલેક્ટ્રિક કાર રજૂ કરી છે, જેનું નામ C40 રિચાર્જ છે. અગાઉ, કંપનીએ XC40 રિચાર્જ નામની ઇલેક્ટ્રિક SUV લોન્ચ કરી હતી. હવે આ સ્વીડિશ કંપની C40 રિચાર્જ દ્વારા પ્રીમિયમ EV કાર ખરીદનારાઓને નવા વિકલ્પો આપવાની તૈયારી કરી રહી છે. Volvo C40 રિચાર્જની કિંમત ઓગસ્ટમાં જાહેર કરવામાં આવશે. શાનદાર લુક અને ફીચર્સ સાથે, અમે વોલ્વોની નવી ઇલેક્ટ્રિક SUV વિશે તમામ વિગતો જણાવવા જઈ રહ્યા છીએ, જે સિંગલ ચાર્જ પર 530 Km સુધીની ડ્રાઇવિંગ રેન્જ અને ઝડપી ચાર્જિંગ સુવિધાથી સજ્જ છે.

Volvo C40 રિચાર્જ ભારતમાં સિંગલ ટોપ-સ્પેક વેરિઅન્ટમાં ઓફર કરવામાં આવે છે. આ ઇલેક્ટ્રિક SUVમાં 78kWh બેટરી પેક આપવામાં આવ્યું છે. સિંગલ AWD વર્ઝન અને ડ્યુઅલ-ઇલેક્ટ્રિક મોટર સેટઅપ સાથે C40 રિચાર્જ 405bhp પાવર અને 660Nm પીક ટોર્ક જનરેટ કરે છે. કંપનીનો દાવો છે કે C40 રિચાર્જ એક ચાર્જ પર 530 Km સુધી ચાલી શકે છે. વોલ્વોએ તેનું નવું ઇલેક્ટ્રિક વાહન 150kW DC ફાસ્ટ ચાર્જર સપોર્ટ સાથે રજૂ કર્યું છે અને દાવો કરે છે કે, તેની બેટરી માત્ર 27 મિનિટમાં 10 થી 80 ટકા સુધી ચાર્જ થઈ શકે છે.

Volvo C40 રિચાર્જના દેખાવ અને ડિઝાઇન વિશે વાત કરીએ તો, તે XC40 રિચાર્જનું કૂપ વર્ઝન છે. આ ઈલેક્ટ્રિક SUV 6 આકર્ષક રંગ વિકલ્પોમાં ઓફર કરવામાં આવે છે, જેમ કે ક્રિસ્ટલ વ્હાઇટ, ઓનીક્સ બ્લેક, ફ્યુઝન રેડ, ક્લાઉડ બ્લુ, સેજ ગ્રીન અને જોર્ડન બ્લુ. બૉડી-કલર્ડ ક્લોઝ-ઑફ ફ્રન્ટ ફેસ, થોરના હેમરથી પ્રેરિત LED હેડલેમ્પ્સ, વર્ટિકલ LED ટેલલેમ્પ્સ, 19-ઇંચના 5-સ્પોક ડાયમંડ-કટ એલોય વ્હીલ્સ જેવી બાહ્ય સુવિધાઓ તેને જોવા માટે મજબૂત બનાવે છે.

Volvo C40 નું ઈન્ટિરિયર અને ફીચર્સ શાનદાર છે. તેમાં બ્લેક થીમ આધારિત કેબિન, ડેશબોર્ડ પર 9-ઇંચની વર્ટિકલ ટચસ્ક્રીન ઇન્ફોટેનમેન્ટ સિસ્ટમ, ગૂગલ મેપ્સ, ગૂગલ આસિસ્ટન્ટ અને પ્લે સ્ટોરની ઇન-બિલ્ટ એક્સેસ, ડિજિટલ ડ્રાઇવર ડિસ્પ્લે સહિત તમામ આવશ્યક માનક અને સલામતી સુવિધાઓ મળે છે.

Volvo C40 રિચાર્જની ડિલિવરી સપ્ટેમ્બરમાં શરૂ થશે. કંપનીનું કહેવું છે કે, વર્ષ 2040 સુધીમાં તે તેના તમામ વાહનોને ઇલેક્ટ્રિક કરી દેશે. અહીં તમને જણાવી દઈએ કે, લક્ઝરી EV સેગમેન્ટમાં Volvoનો માર્કેટ શેર 25% છે અને કંપની તેને વધુ વધારવાનો પ્રયાસ કરી રહી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.