સતીશ કૌશિક કેસમાં નવો ટ્વીસ્ટ, ફાર્મ હાઉસ પર હતો વોન્ટેડ બિઝનેસમેન, દવાઓ મળી

બોલિવુડ એક્ટર અને ડિરેક્ટર સતીશ કૌશિકના મોતના કેસમાં હવે નવો ટ્વીસ્ટ આવી ગયો છે. આ કેસની તપાસ કરી રહેલી દિલ્હી પોલીસને દિલ્હીના એ ફાર્મ હાઉસ પરથી કેટલીક દવાઓ મળી છે, જ્યાં મોત અગાઉ સતીશ કૌશિક પાર્ટીમાં સામેલ થયા હતા. હાલમાં દિલ્હી પોલીસ એ જાણવાનો પ્રયત્ન કરી રહી છે કે, મોત પાછળનું અસલી કારણ શું છે. રિપોર્ટ્સ મુજબ, દિલ્હી પોલીસનું કહેવું છે કે, એક્ટર સતીશ કૌશિકના મોતના યોગ્ય કારણને જાણવા માટે વિસ્તૃત પોસ્ટમોર્ટમ રિપોર્ટની રાહ જોઈ રહ્યા છીએ.

જિલ્લા પોલીસની ક્રાઇમ ટીમે દક્ષિણ પશ્ચિમ દિલ્હીમાં એ ફાર્મ હાઉસની મુલાકાત લીધી, જ્યાં પાર્ટી આયોજિત કરવામાં આવી હતી અને ત્યાંથી કેટલીક દવાઓ મળી આવી છે. જાણકારોએ જણાવ્યું કે, એક ઉદ્યોગપતિના ફાર્મ હાઉસ પર પાર્ટીનું આયોજન કરવામાં આવ્યું હતું. પોલીસ મહેમાનોનોની લિસ્ટ શોધી રહી છે. પાર્ટીમાં એક એવો ઉદ્યોગપતિ પણ સામેલ હતો જે એક કેસમાં વોન્ટેડ છે.

એક વાત એ પણ સામે આવી છે કે, જે સતીશ કૌશિકનો મિત્ર માલૂ છે, તેનું બિજવાસનમાં ફાર્મ હાઉસ છે. તેના પર વર્ષો જૂનો એક રેપ કેસ હતો, પરંતુ તે ક્યાંનો કેસ હતો તે પોલીસ ચેક કરી રહી છે. ફાર્મ હાઉસ પર જે 10-12 લોકો આવ્યા હતા, તેમની લિસ્ટ પણ તૈયાર કરવામાં આવી રહી છે. જો કે, પોલીસ અધિકારીઓનું કહેવું છે કે, પોસ્ટમોર્ટમમાં કંઈ શંકાસ્પદ આવ્યું નથી.

ડૉક્ટરોએ તેને હાર્ટ એટેક જ બતાવ્યો છે, બાકી શરીરમાં કંઈ હતું, તે પૂરો પોસ્ટમોર્ટમ રિપોર્ટ આવ્યા બાદ સ્પષ્ટ થશે, જેના માટે વિસરા સેમ્પલ પ્રિઝર્વ કરાવી દેવામાં આવ્યા છે. જે આપત્તિજનક દવાઓના પેકેટ મળ્યા છે તે કોના માટે હતા, કોણે ઉપયોગ કર્યા, તેની સાથે સતીશ કૌશિકનો કોઈ સંબંધ છે કે નહીં, એ તપાસ બાદ સ્પષ્ટ થશે. ઉલ્લેખનીય છે કે, પોતાના 4 દશક લાંબા કરિયરમાં થિયેટર, સિનેમા, ટીવી અને OTT મંચ પર એક્ટિંગ, ડિરેક્શન, લેખક અને નિર્માતા તરીકે છાપ છોડનારા ફિલ્મકાર સતીશ કૌશિકનું ગુરુવારે દિલ્હીમાં કથિત રીતે હાર્ટ એટેક આવવાના કારણે નિધન થઈ ગયું. તેઓ 66  વર્ષના હતા.

તેઓ દિલ્હીમાં હોળી મનાવવા ગયા હતા. ફિલ્મ ‘જાને ભી દો યારો’ અને ‘મિસ્ટર ઈન્ડિયા’માં યાદગાર ભૂમિકા ભજવનારા સતીશ કૌશિક દિલ્હીમાં એક મિત્રના ઘરે હતા, ત્યારે જ અચાનક તેમને બેચેની અનુભવાઈ. તેમણે પોતાના ડ્રાઇવરને તેમને હૉસ્પિટલ લઈ જવા કહ્યું. મોડી રાત્રે લગભગ 1:00 વાગ્યે તેમને (હૉસ્પિટલ લઈ જતી વખત) રસ્તામાં જ હાર્ટ એટેક આવ્યો. સતીશ કૌશિકનું પોસ્ટમોર્ટમ દિલ્હીની દીનદયાલ ઉપાધ્યાય હૉસ્પિટલમાં કરવામાં આવ્યું.