વિધાનસભાની ચૂંટણી વખતે વંકાયેલા દિનુ મામાને ભાજપે બરોડા ડેરીના પ્રમુખ બનાવ્યા

ગુજરાત વિધાનસભા 2022ની ચૂંટણી વખતે ભાજપથી નારાજ થયેલા દિનેશ પટેલ ઉર્ફે દિન મામાને ભાજપ મનાવીને પાર્ટીમાં લાવ્યું હતું અને હવે આ જ દિનુ મામાને બરોડા ડેરીના પ્રમુખનો તાજ પહેરાવવામાં આવ્યો છે. વિધાનસભાની ચૂંટણીમાં દિનેશ પટેલ પાદરા બેઠક પરથી અપક્ષ લડ્યા હતા, પરંતુ હારી ગયા હતા. બરોડા ડેરીના પ્રમુખ તરીકે દિનુ મામાનું નામ ભાજપ નેતા ગોરધન ઝડફિયાએ જાહેર કર્યું છે.

બરોડા ડેરીના પ્રમુખ તરીકે સતીષ પટેલે રાજીનામું આપ્યા પછી દિનુ મામાનું નામ ચર્ચામાં હતું. ભાજપ પ્રદેશ ઉપાધ્યક્ષ અને મધ્ય ગુજરાતના પ્રભારી ગોરધન ઝડફિયાએ ગુરુવારે દિનુ મામાના નામની જાહેરાત કરી હતી. ઝડફિયાના આ નિર્ણયના વડોદરા ભાજપના નેતાઓએ આવકાર્યો છે.

બરોડા ડેરીના પ્રમુખ પદેથી રાજીનામું આપ્યા પછી સતીષ પટેલે કહ્યું હતું કે, તેઓ જિલ્લા ભાજપ પ્રમુખની જવાબદારી સંભાળી રહ્યા છે. ભાજપનો એક વ્યકિત એક હોદ્દાના નિયમ મુજબ પાર્ટીના આદેશથી મેં બરોડા ડેરીના પ્રમુખ તરીકે રાજીનામું આપ્યું છે. પાર્ટી જેને પ્રમુખ બનાવશે તેને સહકાર આપીશ.

દિનુ મામાએ પ્રમુખ તરીકેના ભાર સંભાળ્યા પછી કહ્યું હતું કે, બરોડા ડેરીના માથે એક પણ રૂપિયાનું દેવું નથી અને બોડેલી ખાતે એક નવો પ્લાન્ટ પણ તૈયાર કરવામાં આવ્યો છે.

બરોડા ડેરી એક સહકારી સંસ્થા છે. બરોડા ડેરી સાથે આસપાસના 3 જિલ્લાના 1.25 લાખ દૂઘ ઉત્પાદકો જોડાયેલા છે. વડોદરા, છોટાઉદેપુર, નર્મદા જિલ્લાનો તિલકવાડા તાલુકો દૂધ કાર્યક્ષેત્રમાં સામેલ છે. 1,156 જેટલા ગામડાના કો-ઓપરેટિવ સોસાયટીઓ બરોડા ડેરી સાથે સંકળાયેલી છે, બરોડા ડેરીમાં રોજ 5 લાખ 70 હજાર લીટર જેટલું દૂધ આવે છે.

દિનેશ પટેલને વડોદરાના લોકો દિનુ મામા તરીકે વધારે ઓળખે છે. ગુજરાત વિધાનસભા 2022ની ચૂંટણી વખતે ભાજપે દિનુ મામાને ટિકીટ નહોતી આપી, એટલે તેમણે નારાજ થઇને પાદરા બેઠક પરથી અપક્ષ તરીકે ચૂંટણી લડી હતી, પરંતુ તેઓ હારી ગયા હતા.એ પછી દિનુ મામાની પ્રદેશ પ્રમુખ સી આર પાટીલની હાજરીમાં ઘર વાપસી કરવામાં આવી હતી.

બરોડા ડેરીના પ્રમુખ ની આજે યોજાયેલી ચૂંટણીમાં ફરી એકવાર દીનુ મામા બિનહરીફ જાહેર થયા છે. બરોડા ડેરીના પ્રમુખ અને ઉપપ્રમુખની અઢી વર્ષની બીજી ટર્મ માટે ચૂંટણી યોજાતા ભાજપના મેન્ડેટ મુજબ ડેરીના પ્રમુખ તરીકે વડોદરા જિલ્લા ભાજપના પ્રમુખ સતીશ નિશાળીયા અને ઉપ-પ્રમુખ પદે જીબી સોલંકી ચૂંટાયા હતા. પરંતુ ત્યારબાદ એક વ્યક્તિ એક હોદ્દા ના નિયમ પ્રમાણે પ્રદેશ પ્રમુખે સતીશ પટેલનું રાજીનામું માંગતા તેમણે ડેરીના પ્રમુખ પદે રાજીનામું આપ્યું હતું.